ءتورت راۋندقا جوسپارلانعان ايقاستا وتانداسىمىز جەرگىلىكتى بوكسشى دارەل حارريسپەن كەزدەسىپ, تورەشىلەردىڭ ءبىراۋىزدان شىققان شەشىمىمەن قارسىلاسىنان باسىم ءتۇستى. وتانداسىمىزدىڭ امەريكالىقتان شەبەرلىگى دە, جەڭىسكە دەگەن جىگەرلىگى دە اسىپ ءتۇسىپ, تورەشىلەردى مويىنداتتى.
اسحات ءۋاليحانوۆ جاراقاتىنا بايلانىستى اراعا جىل سالىپ رينگكە قايتا ورالعان بولاتىن. ول سوڭعى رەت شارشى الاڭعا وتكەن جىلدىڭ ءساۋىر ايىندا شىققان. بۇل ونىڭ كاسىپقوي بوكستاعى ءتورتىنشى ايقاسى جانە ءۇشىنشى جەڭىسى. ال حارريس قاتارىنان ءۇشىنشى جەكپە-جەگىندە جەڭىلىسكە ۇشىرادى.
ايتا كەتەيىك, ءۋاليحانوۆ كاسىپقوي بوكستاعى وتكەن جىلدىڭ ەڭ ۇزدىك مەنەدجەرى ەگيس كليماسپەن جۇمىس ىستەيدى.
فۋلسانگ 7-ورىنعا كوتەرىلدى
بيىل 105-رەت ۇيىمداستىرىلىپ جاتقان «تۋر دە فرانس» كوپكۇندىگىنىڭ توعىزىنشى جارىس كۇنى اياقتالىپ, ۆەلوشاباندوزدار ارراستان رۋبەگە دەيىنگى 156,5 شاقىرىم قاشىقتىققا سوزىلعان باسەكەنىڭ ەڭ ماڭىزدى جولىن ءجۇرىپ ءوتتى.
«استانا» ۆەلوكومانداسىنىڭ كاپيتانى ياكوب فۋلسانگ جارىس بارىسىندا قۇلاعاننان كەيىن, كوماندا ءوز كوشباسشىسىن نەگىزگى توپقا جەتكىزۋ ءۇشىن بارىن سالدى. سونداي-اق ومار فرايلە دە مارەگە جاقىنداعاندا «استانا» كاپيتانىنا كومەكتەسۋ ءۇشىن پەلوتونعا قايتا ورالۋعا ءماجبۇر بولدى. ناتيجەسىندە ياكوب فۋلسانگ تانەل كانگەرتپەن بىرگە مارە سىزىعىن قالىڭ توپپەن بىرگە كەسىپ ءوتتى.
رۋبەدەگى سپرينتتە نەمىس دجون دەگەنكولب مارەگە ءبىرىنشى كەلسە, بەلگيالىق گرەگ ۆان اۆەرمات ەكىنشى, يۆا لامپار ۇزدىك ۇشتىكتىڭ قاتارىنان كورىندى. كەزەڭ قورىتىندىسى بويىنشا, «استانا» كومانداسىنىڭ كاپيتانى ياكوب فۋلسانگ جالپى ەسەپتە 7-ورىنعا كوتەرىلدى.
1 كۇمىس, 1 قولا مەدال يەلەندى
گەرمانيانىڭ سااربريۋككەن قالاسىندا ەرلەر مەن قىزدار اراسىندا دزيۋدودان ەۋروپا كۋبوگى اياقتالدى. بايراقتى باسەكەدە 26 ەلدەن كەلگەن 387 دزيۋدوشى باق سىنادى. ولاردىڭ اراسىندا قازاقستاندىق سپورتشىلار دا بار.
جارىستىڭ ءبىرىنشى كۇنىندە 66 كيلودا قازاقستاندىق دزيۋدوشى عۇسمان قىرعىزباەۆ كۇمىس جۇلدەگە يە بولدى. فينالدىق باسەكەدە ول گرۋزيالىق بالۋان تورنيك ناگياشۆيليمەن بەلدەسىپ, ەسە جىبەردى. ال اسا اۋىر سالماقتا بەلدەسكەن وتانداسىمىز سانجار جابباروۆ (+100 كگ) ەۋروپا كۋبوگىنىڭ قولا جۇلدەگەرى اتاندى. جابباروۆ جۇبانىش بەلدەسۋىندە ءوز كوماندالاسى ەراسىل قاجىباەۆتى جەڭىپ, ءۇشىنشى ساتىدان كورىندى.
جارىس ناتيجەسىندە قازاقستان قۇراماسى جالپىكوماندالىق ەسەپتە 9-شى ورىندى يەلەندى. ءبىرىنشى ورىندا 4 التىن جەڭىپ العان رەسەي قۇراماسى تۇر.
دايىنداعان
ءالي بيتورە,
«ەگەمەن قازاقستان»
