شاراعا كاسىپوداقتار فەدەراتسياسىنىڭ الەۋمەتتىك-ەكونوميكالىق ماسەلەلەرى جانە الەۋمەتتىك ارىپتەستىك جونىندەگى كوميتەت توراعاسى ساتىبالدى داۋلەتالين, «اتامەكەن» ۇلتتىق كاسىپكەرلەر پالاتاسىنىڭ الەۋمەتتىك سالا جانە الەۋمەتتىك ارىپتەستىك كوميتەتىنىڭ توراعاسى تالعات دوسكەنوۆ جانە جۇمىس بەرۋشىلەر كونفەدەراتسياسىنىڭ اتقارۋشى ديرەكتورى ۆالەنتينا برەۋسوۆا قاتىسىپ, اكتسيا تۋرالى كەڭىنەن اڭگىمەلەپ بەردى.
اكتسيانىڭ نەگىزگى ماقساتى – ەڭبەكتى قورعاۋ شارتتارىنا, وندىرىستە توتەنشە جاعدايلاردىڭ الدىن الۋ, جۇمىس بەرۋشىلەردىڭ جۇمىسشىلارعا لايىقتى جانە قاۋىپسىز ەڭبەك شارتتارىن قالىپتاستىرۋعا مۇددەلى بولۋى, ۇجىمدىق الەۋمەتتىك جاۋاپكەرشىلىكتى دامىتۋ, ەڭبەكتى قورعاۋ ماسەلەلەرىنە جۇمىسشىلاردىڭ كەڭىنەن قاتىسۋىن قامتاماسىز ەتۋ, كوپشىلىكتىڭ نازارىن اۋدارۋ.
حالىقارالىق دەرەكتەر ۇيىمىنىڭ رەسمي مالىمەتى بويىنشا, الەمدە كۇن سايىن التى مىڭنان استام ادام وندىرىستە قايتىس بولادى. ال جاستاردىڭ اراسىنداعى جازاتايىم وقيعا, ەرەسەكتەرگە قاراعاندا 40 پايىزعا كوپ.
ساتىبالدى داۋلەتاليننىڭ ايتۋىنشا, ەلىمىزدە وندىرىستەگى جازاتايىم وقيعالاردىڭ سانى جىل سايىن ازايىپ كەلە جاتىر. «2018 جىلدىڭ العاشقى جارتىجىلدىق قورىتىندىسى بويىنشا 579 جازاتايىم وقيعا تىركەلىپ, 70 ادام قايتىس بولعان. بىراق وتكەن جىلمەن سالىستىرعاندا ازايىپ كەلە جاتىر. جازاتايىم وقيعالاردىڭ باسىم بولىگى مەتاللۋرگيا, قۇرىلىس سالاسىندا بولادى», دەيدى ول.
سونداي-اق رەسپۋبليكالىق كاسىپوداقتار فەدەراتسياسىندا بيىلعى جىلدى «ەڭبەك قاۋىپسىزدىگى جانە ەڭبەكتى قورعاۋ جىلى» دەپ جاريالادى. بۇل باستاما ەڭبەك قاۋىپسىزدىگى جانە ەڭبەكتى قورعاۋ سالاسىندا ەڭبەك زاڭناماسىنىڭ ساقتالۋىنا قوعامدىق باقىلاۋدى كۇشەيتۋگە باعىتتالعان. الەۋمەتتىك سەرىكتەستەرمەن قولعا الىنعان اكتسيانىڭ قورىتىندىسىن شىعارۋ كەلەسى جىلدىڭ جەلتوقسان ايىنا جوسپارلانعان.
ءالي بيتورە,
«ەگەمەن قازاقستان»
