اقپارات ايدىنىنداعى ارىپتەسىمىزگە دە كەرەگى وسى ەكەن, تۋعان ولكەسى تۋرالى توگىلىپ ءبىر اڭگىمە ايتسىن.
– قازاقستاندا دا وسىنداي جەرلەر بار ما دەيسىڭ. سەن تۇگىلى, ءبىزدىڭ جاقتىڭ ادامدارىنىڭ ءبارى سارىسۋ جاقتا مۇنداي كەرەمەت جەرلەر, تابيعاتتىڭ تىلسىم قۇبىلىستارى مەن جاقپار-جاقپار تاۋلارى بار ەكەنىن بىلە بەرمەيدى, – دەدى ارىپتەسىمىز. ءسوزىنىڭ جانى بار. قياندا جاتقان سارىسۋ اۋدانىنىڭ الىس ەكەنى راس.
قىسقاسى, وسى سۋرەت سارىسۋ اۋدانىنا باستاعان ساپارىمىزعا تۇرتكى بولىپ تىندى. ءبىز دە قازاققا ءتاڭىر تارتۋ ەتكەن تابيعاتتىڭ تاماشاسىن بىلمەي وتەر مە ەدىك, وسىلايشا عايىپتان جامبىل وبلىسىنداعى سارىسۋ اۋدانىنا, ونىڭ ىشىندە جاڭاتاس قالاسىنا جولىمىز تۇسپەگەندە.
سونىمەن سۋرەتتەگى قاراتاۋ سىلەمدەرىنەن 300 مەتر بيىكتىكتە ورنالاسقان پيراميدانى ءوز كوزىمىزبەن كورۋدىڭ ءساتى ءتۇستى. ۋاقىت مۇجىگەن بۇل پيراميدانى ادام تۇرعىزدى ما, الدە تابيعات-انانىڭ شەبەر قولىنان شىقتى ما, ءبىر اللاعا ايان. ءبىر اقيقاتى, بۇل جەردە قۇپياسى اشىلماعان جۇمباق تاستار دا, ۇڭگىرلەر دە كوپ. پيراميدانىڭ ءدال ىرگەسىندە قاراۋىلتوبە بار. جوڭعار, قالماق شاپقىنشىلىقتارى كەزىندە ونىڭ ىشىندەگى ۇلكەن ۇڭگىردە بۇل تاۋدا ەلىمىزدى قورعاعان بابالارىمىز دامىلداپ, قاراۋىلداپ جاتقان دەسەدى. جاۋ كەلە جاتقاندا وسى توبەدەن ءتۇتىن شىعارىپ, بەلگى بەرگەن كورىنەدى.
وسى ءبىر قىسقا عانا ساپاردا تۇنىپ تۇرعان تابيعات ءتۋريزمدى دامىتىپ, ونى تابىس كوزىنە اينالدىرۋعا سۇرانىپ تۇرعان سارىسۋدىڭ تاماشا تاۋلارىن, شوقاي داتقا, كۇيشى ىقىلاستىڭ كەسەنەسى سياقتى تاريحي ورىندارىن ارالاۋ مۇمكىندىگىن جىبەرگەن جوقپىز.
ءبىزدى الىستان ارباعان پيراميداعا دا جەتتىك-اۋ, بىراق, شىنىن ايتۋ كەرەك, تۋرا تۇبىنە بارا المادىق. سوندىقتان دا بۇل پيراميدا سۋرەتتەگىدەي كىشىگىرىم ەمەس.
ايناش ەسالي,
«ەگەمەن قازاقستان»
جامبىل وبلىسى,
سارىسۋ اۋدانى
