فرانتسيا ءوز توبىندا ەشكىمگە ۇتىلماي, ءبىرىنشى ورىن يەلەندى. بۇل قالىپتى جاعداي. الايدا ارگەنتينانىڭ حورۆاتيادان ۇتىلىپ, جاعدايىن ناشارلاتىپ العانى كۇتپەگەن وقيعا ەدى. كۇنى كەشە عانا ولار ويىننىڭ سوڭىنا تامان گول سوعىپ, نيگەريادان 3 ۇپايدى ءىلىپ اكەتتى. ەندى پلەي-وففتا ەكى ۇجىمنىڭ جولى ءتۇيىسىپ تۇر. «بارسەلونانىڭ» قورعاۋشىسى سامۋەل يۋمتيتي ەندى ارىپتەسى لەونەل مەسسيدى تۇساپ ۇستاۋى كەرەك. بۇل ويىن 30 ماۋسىم كۇنى وتەدى.
نيگەريا مەن ارگەنتينا اراسىنداعى ويىننىڭ ۇزدىگى اتانعان لەونەل ءۇش الەم چەمپيوناتىندا گول سوقتى. ءومىرىنىڭ ءاربىر ونجىلدىعىندا گول سوعىپ كەلە جاتقانىن دا فيفا ءباسپاسوزى تىلگە تيەك ەتتى. 2006 جىلعى چەمپيوناتتا گول سوققاندا ول 18 جاستا بولسا, 2014 جىلى 27-دە ەدى. ەندى مىنە 31-گە كەلگەن تۇستا تاعى دا كوزگە ءتۇستى. مەسسيدىڭ نيگەريا قاقپاسىنا سوققان گولى «بارسەلونانىڭ» دا جەكە تاريحىنا ەندى. سەبەبى سوڭعى ءۇش چەمپيونات قاتارىنان 100-گولدى يسپان كلۋبىنىڭ ويىنشىلارى سالىپ كەلەدى. مىسالى, 2010 جىلى ينەستا, 2014 جىلى نەيمار, 2018 جىلى مەسسي.
ويىن سوڭىنان كەيىن ارگەنتينا كەلەسى كەزەڭگە شىققانىن ەستىپ, بوركىن اسپانعا اتتى. وسى شاقتا مەسسي باس باپكەر حورحە ءسامپاوليدى قۇشاقتاپ الدى. بۇل جاعدايدى ءباسپاسوز ءارتۇرلى تالقىلاپ, باپكەر مەن كاپيتاننىڭ قايتا دوستاسقانى دەپ توپشىلادى. ەستەرىڭىزدە بولسا, حورۆاتيامەن بولعان ماتچتان كەيىن لەو مەسسي باپكەردى سىناپ, «كەلەسى ويىندا الاڭعا كىمدەر شىعاتىنىن باپكەرسىز-اق ءوزىمىز اقىلداسامىز» دەپ سۇحبات بەردى. ەندى, شاماسى مەسسي مەن سامپاولي قايتا دوستاسقان سەكىلدى. بۇل جايىندا باس باپكەر ويىن جاسىرماي ايتتى. «مەسسي مەنى قۇشاقتاپ العان كەزدە باقىتتان باسىم اينالدى. مەن كوماندامەن ۇلكەن جەتىستىككە جەتكىم كەلەدى. ال ول ءۇشىن مەسسيدىڭ كومەگى كەرەك. فۋتبولشىلار بۇگىنگىدەي وعان كومەك بەرىپ وتىرسا, ءبىز المايتىن قامال قالمايدى» دەپ اعىنان جارىلدى ارگەنتينا باپكەرى.
ايتپاقشى وسى ويىندى تريبۋنادان تاماشالاعان اتاقتى ارگەنتينالىق ديەگو مارادونا دارىگەرلەردىڭ كومەگىنە جۇگىندى. كەيىننەن ءتىپتى ديەگو ارماندانىڭ اۋرۋحاناعا جاتقىزىلعانى جايلى دا اقپارات شىقتى. بىراق مارادونا ءوزىن جاقسى سەزىنەتىنىن ايتتى.
الەم چەمپيوناتىنىڭ ويىندارىن قالت جىبەرمەي تاماشالاپ وتىرعان «بارسەلونا» باسشىلىعى 2 ويىنشىعا قىزىعۋشىلىق تانىتتى. ونىڭ ءبىرى گەرمانياعا گول سوققان, مەكسيكالىق جارتىلاي قورعاۋشى يرۆينگ لوسسانو. انتۋان گريزماندى ساتىپ الا الماعان سوڭ كاتالوندىق كلۋب پسۆ ۇجىمىنىڭ باسشىلىعىنا رەسمي تۇردە ۇسىنىس تاستاپتى. سونىمەن بىرگە, «بارسەلونا» چەمپيوناتتا جارق ەتكەن دانيالىق كريستيان ەريكسەن مەن الەكساندر گولوۆينگە دە قۇدا تۇسپەكشى.
الەم چەمپيوناتى كەزىندە كوپتەگەن ءىرى كومپانيالار جاقسى جارناما جاساپ, ىستەرىن العا جىلجىتىپ جاتقاندا گەرمانيا ەكونوميكاسى فۋتبولدان زارداپ شەگىپ جاتىر. «Deutsche Welle» اگەنتتىگىنىڭ ەسەپتەۋىنشە گەرمانيا-وڭتۇستىك كورەيا اراسىنداعى ويىن كەزىندە نەمىس جۇمىسشىلارىنىڭ 30 پايىزى قىزمەتتەرىن توقتاتا تۇرىپ, ويىن تاماشالاعان. سونىڭ كەسىرىنەن گەرمانيا ەكونوميكاسىنا 200 ميلليون ەۋرو كولەمىندە زيان كەلگەن. ەگەر گەرمانيا قۇراماسى جەڭىسكە جەتە بەرەتىن بولسا, بۇل شىعىننىڭ كولەمى ودان ءارى ارتا بەرەدى. بۇل جەردە ەڭ باستى كەدەرگى رەسەي مەن گەرمانيانىڭ اراسىنداعى ۋاقىت ايىرماشىلىعى بولىپ تۇر.
ەرمۇحامەد ماۋلەن,
«ەگەمەن قازاقستان»
