فوتوكورمەنىڭ اشىلۋ سالتاناتىنداعى سوزىندە قازاقستاننىڭ ۆەنا قالاسىنداعى حالىقارالىق ۇيىمدار جانىنداعى تۇراقتى وكىلى قايرات سارىباي استانانىڭ كوپجاقتى ديپلوماتيا مەن بىتىمگەرشىلىكتىڭ ءىرى حالىقارالىق ورتالىعىنا اينالعانىن اتاپ ءوتتى. وسى ورايدا, 2010 جىلى استانادا ەقىۇ قاتىسۋشى مەملەكەتتەرىنىڭ «ەركىن, دەموكراتيالىق, ورتاق جانە بولىنبەس ەۋرواتلانتيكالىق جانە ەۋرازيالىق قاۋىپسىزدىك قوعامداستىعىن» قالىپتاستىرۋ قاعيداتىنا مۇددەلىلىگىن بىلدىرگەن ەقىۇ تاريحي ءسامميتىنىڭ ءرولىن اتاپ ءوتتى. قازاقستاندىق ديپلومات «ەۋرازيا جۇرەگىندەگى زاماناۋي, قارقىندى دامىپ كەلە جاتقان قالا بەيبىتشىلىك, قاۋىپسىزدىك پەن دامۋدى نىعايتۋدا الداعى ۋاقىتتا دا ۇلكەن ءرول اتقارادى», دەپ مالىمدەدى.
قازاقستان رەسپۋبليكاسىنىڭ ۆەنا قالاسىنداعى حالىقارالىق ۇيىمدار جانىنداعى تۇراقتى وكىلدىگى تاراپىنان دايىندالعان ەكسپوزيتسيا قوناقتاردى باس قالانىڭ ارحيتەكتۋرالىق, مادەني جانە سپورت وبەكتىلەرىمەن قاتار, استانادا وتكەن ءىرى جانە ماڭىزدى حالىقارالىق ءىس-شارالارىمەن تانىستىردى. وعان قوسا, استانا مەرەيتويىنا وراي قازاقستاننىڭ سىرتقى ىستەر مينيسترلىگى دايىنداعان قالانىڭ قالىپتاسۋى مەن دامۋى تۋرالى «استانا – بەيبىتشىلىك قالاسى» اتتى ارنايى ۆيدەو-تاسپا كورسەتىلدى.
فوتوكورمەگە ەقىۇ باس حاتشىسى توماس گرەمينگەر, تۇراقتى وكىلدەر, ۇيىمعا قاتىسۋشى-مەملەكەتتەر مەن ىنتىماقتاستىق بويىنشا سەرىكتەس مەملەكەتتەردىڭ وكىلدەرى جانە ەقىۇ اتقارۋشى قۇرىلىمدىق بولىمشەلەرىنىڭ قىزمەتكەرلەرى, سونداي-اق گەندەرلىك قارجىلاندىرۋ بويىنشا وقۋ سەمينارىنا قاتىسۋ ماقساتىندا اۋسترياعا ىسساپارمەن كەلگەن دەلەگاتسيا مۇشەلەرى, ونىڭ ىشىندە قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارلارى ەلەنا تاراسەنكو مەن ءلاززات سۇلەيمەن دە كورمەنىڭ اشىلۋىنا قاتىستى.
اتالعان فوتوكورمە استانا مەرەيتويىن اتاۋ شەڭبەرىندەگى اۋسترياداعى مەرەكەلىك جوبالار لەگىنىڭ ءبىرى بولدى.
سول كۇنى ەقىۇ تۇراقتى كەڭەس وتىرىسى بارىسىندا استاناداعى ەقىۇ باعدارلامالار ءوفيسىنىڭ باسشىسى دەرد سابو «قازاقستان-2050 ستراتەگياسى», «بەس ينستيتۋتسيونالدىق رەفورمانى جۇزەگە اسىرۋ جونىندەگى – «100 ناقتى قادام» ۇلت جوسپارى, سونداي-اق قازاقستاننىڭ پرەزيدەنتى نۇرسۇلتان نازارباەۆ-
تىڭ قازاقستان حالقىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جانە ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋلارىندا العا قويىلعان ماقساتتاردى جۇزەگە اسىرۋعا قولعابىس كورسەتەتىنىن جانە ەقىۇ وكىلدىگى ءوز جۇمىسىن سوعان قاراي نەگىزدەگەنىن حابارلادى.
د.سابو ەقىۇ باعدارلامالار ءوفيسىنىڭ 2017 جىلدىڭ شىلدەسىنەن باستاپ 2018 جىلدىڭ ماۋسىمىنا دەيىن قازاقستاننىڭ ءبىرسىپىرا قالالارى مەن وڭىرلەرىندە قاۋىپسىزدىك, ەكونوميكا, ەكولوگيا جانە ادام قۇقىقتارى مەن بوستاندىقتارى ىسپەتتەس سالالاردا ءىس-شارالار وتكىزگەنىن ايتتى.
تۇراقتى كەڭەس وتىرىسى بارىسىندا قازاقستان تۇراقتى وكىلى قارىمتا بايانداماسىندا ەقىۇ وكىلدىگىنىڭ جۇمىسىنا وڭ باعا بەرىپ, باعدارلامالىق جوبالاردىڭ سانىنان بۇرىن ساپاسىنا نازار اۋدارۋعا شاقىردى. سونداي-اق ەقىۇ وكىلدىگىنىڭ جۇمىسىن زامان تالابىنا ساي ءارى ەقىۇ استانا ءسامميتى بارىسىندا العا قويىلعان ماقساتتاردى جۇزەگە اسىرۋدىڭ ماڭىزدىلىعىن اتاپ ءوتتى.
«ەگەمەن-اقپارات»
