قازاقستاننىڭ عارىشتىق زەرتتەۋلەر ينستيتۋتىنىڭ نەگىزىن قالاعان ومىرزاق سۇلتانعازيننىڭ ەسىمى وتاندىق عىلىمعا ولشەۋسىز ۇلەس قوسقان قايراتكەرلەر قاتارىندا اتالادى. ومىرزاق ماحمۇت ۇلىنىڭ ەسىمى فيزيكا-ماتەماتيكا سالاسىنداعى سيرەك ءارى ماڭىزدى زەرتتەۋلەرمەن دە تىعىز بايلانىستى. عارىش سالاسىنا قاتىستى زەرتتەۋلەرى ەلىمىز عانا ەمەس, الىس-جاقىن شەتەلدەردە جوعارى باعالانعانى بەلگىلى. ول كارلوۆ, پاريج, كيوتو, ستەنفورد جانە مەريلەند ۋنيۆەرسيتەتتەرىنە, باناح اتىنداعى حالىقارالىق ماتەماتيكالىق مەكتەپتەردە عىلىمي دارىستەر وقىپ, ناسا (اقش), كنەس (فرانتسيا) سياقتى شەتەلدىك جەتەكشى عارىشتىق اگەنتتىكتەرمەن عىلىمي بايلانىستار ورناتتى.
ال «مير» كەشەنى بورتىندا, حالىقارالىق عارىش ستانساسىندا عارىشكەرلەر ت.اۋباكىروۆ پەن ت.مۇساباەۆ قاتىسقان عىلىمي زەرتتەۋلەر مەن تاجىريبەلەردىڭ ءتورت باعدارلاماسىن ازىرلەۋ مەن جۇزەگە اسىرۋعا تىكەلەي اتسالىسقانى وتاندىق عارىش سالاسىنداعى شوقتىعى بيىك جەتىستىكتەردىڭ بىرەگەيى.
ومىرزاق ماحمۇت ۇلىنىڭ عىلىمي جەتەكشىلىگىمەن جارىق كورگەن مونوگرافيالار مەن وقۋلىقتار بۇگىندە ەلىمىزدىڭ جوعارى وقۋ ورىندارى ستۋدەنتتەرى ءۇشىن قۇندى ەڭبەكتەر بولىپ تابىلادى.
قالالىق مادەنيەت جانە ارحيۆتەر باسقارماسى باسشىسىنىڭ ورىنباسارى دانيار اليەۆ وسى يگى شارانى قولعا الىپ, جۇزەگە اسىرىپ وتىرعان عالىمنىڭ وتباسىنا, ۇلتتىق كىتاپحانا ديرەكتورى ج.سەيدۋمانوۆقا ريزاشىلىق ءبىلدىردى.
ال عالىمنىڭ جارى رايحان عانيقىزى كىتاپحاناعا عالىمنىڭ ماتەماتيكا, فيزيكا سالاسىنداعى عىلىمي كىتاپتارىن سىيعا تارتىپ, يگى شاراعا اتسالىسىپ وتىرعان ازاماتتارعا العىس ايتتى.
ەلۆيرا سەرىكقىزى,
«ەگەمەن قازاقستان»
الماتى
