جيىنعا قاتىسقان ءبىرىنشى ۆيتسە-مينيستر ارمان ەۆنيەۆ قازاقستاننىڭ قول جەتكىزگەن باسەكەگە قابىلەتتىلىك دەڭگەيىن قولداۋ جانە ونىڭ ودان ءارى كەڭەيۋى ءۇشىن اگروونەركاسىپتىك كەشەندى مەملەكەتتىك رەتتەۋدىڭ تاسىلدەرى قايتا قارالىپ, ىشكى نارىقتىڭ قورعالۋىنا, سىرتقى ساۋدا نارىعىن كەڭەيتۋگە, ساۋدا-لوگيستيكالىق ينفراقۇرىلىمدى دامىتۋ مەن اگروونەركاسىپتىك كەشەن سۋبەكتىلەرىن قارجىلاندىرۋدىڭ قولجەتىمدىلىگىن ارتتىرۋعا باسا نازار اۋدارىلعانىن اتاپ ءوتتى.
«شىعارىلعان جالپى اۋىل شارۋاشىلىعى ونىمدەرى 3,9 پايىزعا, وندىرىلگەن تاماق ونىمدەرى 6,3 پايىزعا ارتتى. اۋىل شارۋاشىلىعى ونىمدەرىنىڭ ەكسپورتى 3 ايدا 47 پايىزعا, ونىڭ ىشىندە وڭدەلگەن ونىمدەر ەكسپورتى 26 پايىزعا ۇلعايدى. اۋىل شارۋاشىلىعىنا سالىنعان ينۆەستيتسيالار كولەمى 1,4 پايىزعا ءوسىپ, 88 ملرد تەڭگەنى قۇرادى. 2018 جىلى ەگىستىك جەرلەر كولەمىن 50,2 پايىزعا (11,4 ملن گا) قىسقارتۋ جوسپارلانىپ وتىر. قازىرگى ۋاقىتتا ازىق-ت ۇلىكتىڭ نەگىزگى 30 ءتۇرىنىڭ 25-ءى بويىنشا قامتاماسىز ەتىلۋى 80 پايىز, ال كەيبىر تۇرلەرى بويىنشا 100 پايىزدى قۇرايدى. ىشكى نارىق وسى ءونىم تۇرلەرىمەن قامتاماسىز ەتىلۋدە. يمپورتقا تاۋەلدى قۇس ەتى, الما, ىرىمشىك جانە سۇزبە, شۇجىق, قانت, بالىق بۇل تىزىمگە كىرمەيدى. ەلباسى حالىققا جولداۋىندا اگروونەركاسىپتىك كەشەن الدىندا ەڭبەك ونىمدىلىگىن تۇبەگەيلى ۇلعايتۋ جانە قايتا وڭدەلگەن اۋىل شارۋاشىلىعى ءونىمى ەكسپورتىنىڭ ءوسىمىن 5 جىل ىشىندە كەمىندە 2,5 ەسەگە ارتتىرۋ مىندەتىن قويدى. بۇل مىندەتتى شەشۋ سالانى دامىتۋدا مۇلدە جاڭا كوزقاراستى تالاپ ەتەدى», دەدى ول.
جيىن بارىسىندا ول جوعارىدا اتالعان مىندەتتەردى ەسكەرە وتىرىپ, اۋىل شارۋاشىلىعى مينيسترلىگى اگروبيزنەس جانە ۇكىمەتتىك ەمەس ۇيىمداردىڭ وكىلدەرىن تارتا وتىرىپ, 2017-2021 جىلدارعا ارنالعان قازاقستان رەسپۋبليكاسى اگروونەركاسىپتىك كەشەنىن دامىتۋدىڭ مەملەكەتتىك باعدارلاماسىنا تۇزەتۋلەر ەنگىزۋ بويىنشا جۇمىس جۇرگىزىپ جاتقانىن جەتكىزدى.
راۋان قايدار,
«ەگەمەن قازاقستان»
