9 قاڭتار – رەسەي پرەزيدەنتى ۆلاديمير پۋتين استاناعا رەسمي ساپارمەن كەلدى. وسى ساپاردا ەكى ەل باسشىلارى بايقوڭىر عارىش ايلاعىن پايدالانۋ مەرزىمىن 2050 جىلعا دەيىن ۇزارتۋ تۋرالى كەلىسىمگە قول قويدى.
13 قاڭتار – ەلباسىنىڭ نۇسقاۋىمەن تاۋەلسىز قازاقستاننىڭ تاريحىنداعى اسا ماڭىزدى قۇجات «مادەني مۇرا» مەملەكەتتىك باعدارلاماسى قابىلداندى. قۇجاتتا قاراستىرىلعان شارالاردى جۇزەگە اسىرۋ ءۇشىن ەل بيۋدجەتىنەن 3 ميلليون 948 مىڭ تەڭگە ءبولىندى.
1 اقپان – مەملەكەت باسشىسى استانا قالاسىنداعى عىلماني اتىنداعى ورتالىق مەشىتىندە بولىپ, مۇسىلمان جاماعاتىن ورازا ايت مەيرامىمەن قۇتتىقتادى.
5 اقپان – استانا قالاسىندا ۇلىبريتانيا ەلشىلىگى اشىلدى. اتالمىش شاراعا كەلگەن ۇلىبريتانيا جانە سولتۇستىك يرلانديا قۇراما كورولدىگىنىڭ سىرتقى ىستەر ءمينيسترى دج.سترونى ەلباسى نۇرسۇلتان نازارباەۆ قابىلدادى.
2 ناۋرىز – مەملەكەت باسشىسى كوپ بالالى انالاردى «التىن القا» جانە «كۇمىس القا» بەلگىلەرىمەن ناگرادتاۋ تۋرالى جارلىققا قول قويدى.
22 ناۋرىز – ەلباسى ەلوردادا وتكەن ۇلىستىڭ ۇلى كۇنى – ناۋرىز مەيرامىنا قاتىسىپ, قالا تۇرعىندارىمەن ەمەن-جارقىن اڭگىمەلەسىپ, كوپشىلىكتى مەرەكەمەن قۇتتىقتادى.
6 ءساۋىر – جاپوندىقتار جالپى قۇنى 3,5 ملن دوللار تۇراتىن 23 جەدەل جاردەم كولىگىن استانا قالالىق «جەدەل جاردەم» ستانساسىنا تارتۋ ەتتى.
21 ءساۋىر – استانا تەمىر جول ۆوكزالىنان «استانا – الماتى» باعىتىندا قاتىنايتىن «تۇلپار» جولاۋشىلار جۇردەك پويىزى العاشقى ساپارعا اتتاندى. يسپانيادا جاسالعان بۇل پويىز ەكى قالا اراسىن 13 ساعاتتا ءجۇرىپ وتەدى.
19 مامىر – ءبىرىنشى «كوكتال» تۇرعىن الابىندا جاڭادان قازاق ورتا مەكتەبى اشىلىپ, وعان ايگىلى عالىم الكەي مارعۇلان ەسىمى بەرىلدى.
28 مامىر – شىعىس قازاقستان وبلىسىندا ەلىمىزدىڭ 15 ميلليونىنشى تۇرعىنى دۇنيەگە كەلدى. ونىڭ ەسىمى – پەريزات ۋسكەمباەۆا.
8 ماۋسىم – استانا قالاسىندا اقش ەلشىلىگى عيماراتىنىڭ ىرگەتاسىن قالاۋ ءراسىمى ءوتتى.
10 ماۋسىم – استاناداعى ءىرى رۋحاني ورتالىق قازاقستان رەسپۋبليكاسىنىڭ ۇلتتىق اكادەميالىق كىتاپحاناسى سالتاناتتى تۇردە اشىلدى. بۇل شاراعا ەلباسى ن.نازارباەۆ پەن ماسكەۋ مەرى يۋ.م.لۋجكوۆ قاتىستى.
18 ماۋسىم – ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «ەۋرازيالىق ىقپالداستىق: وسى زامانعى دامۋ ۇردىستەرى جانە جاھاندانۋ سىناقتارى» دەگەن تاقىرىپتا حالىقارالىق فورۋم ءوتتى.
8 شىلدە – ەلباسى جۇمىس ساپارىمەن اقمولا وبلىسىندا بولىپ, «بۋراباي» كۋرورتتى ايماعىنداعى 37 مەترلىك ابىلاي حان ستەللاسىنىڭ اشىلۋ سالتاناتىنا قاتىستى.
7 قىركۇيەك – استانادا قازاقستان ايەلدەرىنىڭ IV فورۋمى ءوتتى. فورۋمدا ءسوز سويلەگەن ەلباسى ن.نازارباەۆ ەلدەگى گەندەرلىك احۋالدى جاقسارتۋ ماقساتىندا جەدەل تۇردە مەملەكەتتىك باعدارلاما قابىلداپ, ونى كەلەسى 2005 جىلدان باستاپ جۇزەگە اسىرۋدى تاپسىردى.
8 قازان – استانا قالاسىندا العاش رەت «ەكسپونەدۆيجيموست-2004» وتاندىق كورمەسى ءوتتى.
16 جەلتوقسان – مەملەكەت باسشىسى ەسىل وزەنىنىڭ سول جاق جاعالاۋىندا قۇرىلىسى ءجۇرىپ جاتقان جوعارعى سوت, پارلامەنت سەناتى مەن ءماجىلىسىنىڭ عيماراتتارىن ارالاپ كوردى. ەلباسى جۇمىس قارقىنىنا وڭ باعا بەرىپ, بۇل نىساندار قازاقستان جاڭارۋىنىڭ سيمۆولى بولاشاقتا بۇل ارادا بىرىككەن باسقارۋ ءھام اتقارۋ ورتالىعى پايدا بولاتىنى جايلى اتاپ ءوتتى.
24 جەلتوقسان – جۇمىسى ءۇش جىل بۇرىن باستالعان قازاقستان رەسپۋبليكاسى پرەزيدەنتىنىڭ رەزيدەنتسياسى «اقوردا» سالتاناتتى تۇردە اشىلدى. نىساندى جوبالاۋشى ساۋلەتشى-ديزاينەرلەر م.گۋالاتسي مەن ا.مولتەني. عيماراتتىڭ جالپى اۋدانى 36 720 شارشى مەتر. توبەسىمەن قوسا العانداعى بيىكتىگى – 80 مەتر.
26 جەلتوقسان – استانا قالاسىندا «سۋاستى الەمى» مۇز قالاشىعى اشىلدى.
دايىنداعان بەكەن قايرات ۇلى,
«ەگەمەن قازاقستان»
