2011 جىلى وبلىستا سول كەزدەگى اكىم بەردىبەك ساپارباەۆتىڭ باستاماسىمەن «مەيىرىم» اتتى اكتسيا باستالىپ, اكتسيا اياسىندا ايماقتاعى ۇيىمدار مەن كاسىپورىندار بىرنەشە جەتىم بالانى ءوز قامقورلىقتارىنا الىپ, ولار باسپاناعا قول جەتكىزۋ ءۇشىن «تۇرعىن ءۇي قۇرىلىس جيناق بانكىنەن» ارنايى ەسەپشوتتار اشىلعان ەدى. سول ۋاقىتتا ساۋابى مول شاراعا شىعىس قازاقستان وبلىسى بويىنشا قازىناشىلىق دەپارتامەنتىنىڭ ۇجىمى دا اتسالىسۋعا بەل بايلايدى. «وڭىردە اتا-اناسىنىڭ قامقورلىعىنسىز جانە جەتىم بالالارعا دەمەۋ كورسەتەتىن «مەيىرىم» اكتسياسى قارقىندى ءجۇرىپ جاتقان كەزى. وسى ءبىر ىزگىلىكتى ىسكە ءبىز دە ءوز ۇلەسىمىزدى قوسايىق, ءبىر بالانىڭ باقىتتى بولۋىنا قول ۇشىن بەرەيىك دەپ جۇرگەن ەدىك. بىردە كابينەتىمە ارىپتەسىمىز, گلۋبوكوە اۋداندىق قازىناشىلىق باسقارماسىنىڭ باسشىسى دارحان قاليەۆ كەلدى. ونىڭ وتباسىندا وتە قايعىلى وقيعا بولعان ەدى. سودان ءبىر جىل بۇرىن عانا ارىپتەسىمىز سابيىنەن ايىرىلىپ قالعان-دى. قۇلدىراڭداپ شاۋىپ جۇرگەن ءبۇلدىرشىننىڭ اياق استىنان ايىقپاس دەرتكە شالدىققانىن ەستىگەندە, ونىڭ ەمىنە ۇجىم بولىپ قارجى جيناپ بەرگەن ەدىك. دارحان باۋىر ەتى بالاسىن سوناۋ مينسكىنىڭ دارىگەرلەرىنە دەيىن قاراتىپ, سول جاققا وتا جاساۋعا اپارعان-دى. وكىنىشكە قاراي, وپەراتسيا جاسالعانىمەن, ءسابيدىڭ ءومىرىن ساقتاپ قالا المادى. كىشكەنتاي دارىننىڭ شەتىنەپ كەتكەنىن ەستىپ, اتا-اناسىمەن بىرگە قامىقتىق. دارحان قاليەۆ وسى كەلىسىندە سابيىنە دەپ جينالىپ, ۇستالماعان قاراجاتتى وزىمەن بىرگە الىپ كەلىپتى. «ايەلىمىز ەكەۋىمىز اقىلداسا كەلىپ, كىشكەنتاي دارىنىمىزعا دەپ جينالعان قارجىنى باسقا دا مۇقتاج بالالاردىڭ قاجەتىنە جۇمساساق دەپ شەشتىك. نە اقىل قوساسىز؟» دەدى. «بۇل سەندەردىڭ وتباسىلارىڭا دەپ جيناعان كومەگىمىز, ءبىر كەرەكتەرىڭە جاراتىڭدار» دەپ قانشا ايتقانىممەن, دارحان يلىكپەدى. سودان نە كەرەك, اقىرى ۇجىمدى جيناپ, اقىلداسا كەلە, ءبىر جەتىم قىز بالانى قامقورلىققا الايىق دەپ ۇيعاردىق. قالعان قاراجاتتى سول بالانىڭ ەسەپشوتىنا سالىپ, بولاشاقتا باسپانا الىپ بەرەمىز دەپ شەشتىك», - دەپ ەسكە الادى دەپارتامەنت باسشىسى مۇحتار تولەگەن ۇلى.
سودان بىردە ء«ۇلبى» مادەنيەت ۇيىندە وتكەن ءبىر كونتسەرتتە ء«ۇمىت» بالالار ءۇيىنىڭ ديرەكتورى مايرا بايمۇحانوۆا بي ءانسامبلىنىڭ قۇرامىندا ونەر كورسەتكەن ديانامەن تانىستىرادى. قوعامدىق جۇمىستارعا بەلسەندى, ساباق ۇلگەرىمى جاقسى, ونەرلى جەتكىنشەكتى ۇجىم مۇشەلەرى بىردەن جاقسى كورىپ كەتەدى. وسىلايشا, يگىلىكتى ىسكە جينالعان قاراجات ديانانىڭ «تۇرعىنۇي جيناق بانكىندەگى» ەسەپشوتىنا سالىنادى. سودان دەپارتامەنت قىزمەتكەرلەرى, بارلىعى 103 ادام, جىل سايىن ءبىر كۇندىك جالاقىلارىن وسى ەسەپشوتقا اۋدارىپ وتىرادى. «بۇل قاراجات 7 جىل بويى جينالدى. بانكتەگى جيناعان قاراجاتىمىز ءبىر بولمەلى پاتەرگە جانە ونىڭ ءىشىن قاجەتتى جيھازدارمەن جابدىقتاۋعا تولىق جەتتى. قىزمەتكەرلەرىمىز ديانامەن بىرگە بارىپ, قۇجاتتارىن راسىمدەۋگە كومەكتەستى, كەشەلى بەرى ءۇيىنىڭ ءىشىن جيناستىرىپ ءجۇر. الداعى ۋاقىتتا قارجىگەرلىك ءبىلىم الىپ, ءبىزدىڭ ۇجىمعا قوسىلسا دەگەن دە تىلەگىمىز بار», - دەيدى جەتىم قىزدى ءوز قامقورلىقتارىنا العان ۇجىم باسشىسى.
ال باسپانالى بولعان ديانا بيعاليەۆا قازىر وسكەمەندەگى قىزمەت كورسەتۋ سالاسى كوللەدجىندە شاشتاراز ماماندىعىن ۇيرەنىپ ءجۇر ەكەن. ء«ۇمىت» بالالار ۇيىندە جەتى جاسىنان تاربيەلەنگەن بويجەتكەن وسى ۋاقىتقا دەيىن دينارا ەسىمدى اپكەسىمەن جانە دانيار دەگەن اعاسىمەن پاتەر جالداپ تۇرىپتى. «انالىق, اكەلىك قامقورلىعىن كورسەتكەن دەپارتامەنت ۇجىمىنا ەرەكشە العىسىمدى بىلدىرەمىن. اعامىز ەكەۋىمىز كەلەشەكتە جوعارى ءبىلىم العىمىز كەلەدى. ال اپكەم ءوزىنىڭ شاعىن كافەسىن اشۋدى ارماندايدى», - دەيدى ديانا.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن تىلەۋبەك شاياحمەت
