سۋرەتتە: رەداكتوردىڭ ورىنباسارى ەرعالي اعا احمەتوۆ باستاعان شىعارماشىلىق توپ «باقاناس» كۇرىششىلەرىمەن كەزدەسۋدەن ورالىپ كەلەدى. 1988 جىل.
ول زاماندا اتاعى دارداي «جەتىسۋدىڭ» ەسىگىن جۇرەگى الىپ-ۇشىپ اشقان كەز كەلگەن جاستىڭ باسىلىمنىڭ «باس شتابىنان» اينالىپ ءوتۋى مۇمكىن ەمەس ءداستۇر بار-دى, مەن دە ءدال سونداي جولمەن ءبىر كۇنى گازەتتىڭ سەكرەتارياتىنا توپ ەتە ءتۇستىم. 1983 جىلدىڭ قوڭىر كۇزى. ەندىگى جەردە جاس عۇمىرىمنىڭ الداعى جەتى جىلى «جەتىسۋدىڭ» ەسىگىندە وتەتىنىن بىلگەن جوقپىن, ارينە. باستىعىمىز جۇماش اعا ارعىمباەۆ, ءۇش ورىنباسارى سىرىم قۇلاجانوۆ پەن كولباي ادىربەكوۆ جانە مەن, ءفوتوتىلشى نۇرمانبەت اعا قيزاتوۆ, سۋرەتشىمىز تاۋجان ەسبەرگەنوۆا, تەحنيكالىق رەداكتورىمىز ءاليا سەيىلحانوۆا, كەشكىسىن تاسس پەن قازتاگ-تان كەلىپ تۇسەتىن اقپاراتتار تاسپاسىن مۇقيات وقىپ, كەرەكتى دەگەنىن نومىرگە سارالاپ دايىندايتىن ءماستۋرا ۇسەنوۆا اپاي, ءبارىمىز – «شتاب» قۇرامىنداعى ءبىر قاۋىم ەلمىز. اپتاسىنا بەس رەت شىعاتىن گازەتتىڭ وندىرىستىك-شىعارماشىلىق تاۋسىلماس تاۋقىمەتىن جۋرناليست قاۋىم جاقسى بىلەدى. ءۇش جىگىت كەزەكتەسىپ كۇندەلىكتى ءنومىردىڭ ماكەتىن سىزامىز, بەت وقيتىن كەزەكشىلەردىڭ ءتىزىمىن دايارلايمىز, جازىلعان ماقالالاردىڭ رەداكتسيادان باسپاحاناعا ۋاقتىلى جەتكىزىلۋىن قاداعالايمىز. ماتەريالدار تسەحقا كۋرەر قىزدار ارقىلى, عيماراتتىڭ قابىرعاسىنا قاعىلعان پنەۆماتيكالىق پوشتا ارقىلى دا تاسىمالدانادى. «كۇيىپ بارا جاتقان ماتەريالدى» تسەحقا ءوزىمىز-اق اتتاي جەلىپ جەدەل اپارىپ سالامىز دا قورعاسىن مەن قارا مايدىڭ ورتاسىنان كۇيەلەش-كۇيەلەش كۇيدە رەداكتسياعا ورالامىز. سوعان قاراماستان, ازدى-كوپتى بەدەلىمىز دە جوق ەمەس. كەز كەلگەن ءتىلشى, ءبولىم مەڭگەرۋشىسى نەمەسە اتاعى دارداي جۋرناليست اعالارىمىزدىڭ ءوزى كۇندەلىكتى سەكرەتارياتقا ءبىر باس سۇقپاي كەتپەيدى, ويتكەنى جازىلعان ماقالا تۇگەلدەي ءبىزدىڭ قولدان وتەدى, ماكەتكە ىلىنەدى. ماقالانىڭ گازەت بەتىندە ارىپتەستەر ايتاتىنداي جۇتىنىپ شىعۋى دا تەك قانا ءبىزدىڭ شەبەرلىگىمىزگە, باس شتاب جاۋىنگەرلەرىنىڭ شىعارماشىلىق تاپقىرلىعىنا بايلانىستى.
مەرەكەلىك ءنومىر شىعاردىڭ قارساڭىندا جۇماش اعامىز باس شتابتىڭ وتىرىسىن جاساپ, «ال بار ونەرلەرىڭدى ورتاعا سالىڭدار, كورەيىن...» دەپ قىسقا قايىراتىنى بار. مىنەزى بىرتوعا, ارتىق ءسوزى جوق, ءوز جۇمىسىنا سونداي تياناقتى اعامىزدىڭ سول ءبىر-اق اۋىز ءسوزى ءبىزدى ءدۇر سىلكىنتىپ, شابىتتاندىرىپ تاستايدى. دەرەۋ شۇيىركەلەسىپ, «قىزىل» ءنومىردى قالاي تاڭعالارلىقتاي ەتىپ شىعارامىز دەپ جانتالاسامىز. وسىندايدا عوي, سەكرەتارياتتىڭ ىستىق-سۋىعىن باسىنان وتكىزگەن, جاي-جاپسارىن بەس ساۋساقتاي جاقسى بىلەتىن ناسيحات ءبولىمىنىڭ مەڭگەرۋشىسى رىسبەك سارسەنباەۆ اعامىزدىڭ دالىزدە تەز-تەز باسىپ, اسىعىس ءوتىپ بارا جاتقان جەرىنەن سەكرەتارياتقا كىلت بۇرىلىپ, باس سۇعاتىنى. تاجىريبەنىڭ اتى تاجىريبە, بولاشاق گازەت بەتتەرىنىڭ سوندايلىق ادەمى جۇتىنىپ تۇراتىنى ءوز الدىنا, رىس-اعام ماكەت پاراقتارىن ويناتا سىزىپ وتىرىپ, «كولباي, سەن مىنا بۇرىشقا بۇگىنگى تاقىرىپقا كەلتىرىپ شاعىن نوۆەللا دايىندا, ...سەن مىنا قيىققا بۇگىنگى تابيعاتتىڭ سىرىن اشاتىن مينياتيۋرا جازىپ جىبەرە عوي» دەپ سەكرەتارياتتىڭ قىم-قۋىت جۇمىسىمەن ءجۇرىپ, قولىنا قالام ۇستاي الماي «سۋىپ» قالعان بىزدەردىڭ توڭىمىزدى ءجىبىتىپ, ماقالا جازۋعا قامشىلاپ قويۋدى ۇمىتپايتىن. شىركىن, سەكرەتاريات!
ءتۇس الەتىندە جۇرتتىڭ ءبىرازى اۋىل شارۋاشىلىعى بولىمىنە وپىر-توپىر جينالادى. توردە – ءبولىم مەڭگەرۋشىسى مۇعالىمباي جىلقايداروۆ اعامىز ارقاسىن تىك ۇستاپ, قاققان قازىقتاي قالپىندا قولىنداعى قالامى تىنىمسىز جورعالاپ, ماقالا جازىپ وتىرادى. ۇلكەن سارى ۇستەلدە ول كىسىگە قاراما-قارسى ورنى بار سارىاعا ء(حابدىشاھار امىرەنوۆ) ءبولىم باستىعىنان ءسال تومەنىرەك سىرعي جايلاسىپ, دويبى تاقتاسىنداعى «جان بەرىپ, جان العان» سايىستى قىزدىرىپ جاتادى. سارىاعاڭمەن سايىسقا تۇسەتىندەر كەزەككە تۇرىپ ساپ تۇزەيمىز, بىراق ەشكىمدى شاق كەلتىرمەيتىن چەمپيون اعامىز كەز كەلگەن شايقاستى ۇزاققا سوزبايتىن... اندا-ساندا سەيدوللا سادىقوۆ پەن اسكەر يساقوۆ اعالارىمىز «داۋ» شىعارسا, سابىرلى سارىاعا ء«اي, قوي دەيمىن-ءاي...»-دەن ءارى اسپاي, «سەن اينالايىن, كەلەسىڭ كىم ەدىڭ, كەلە عوي, اينالايىن...» دەپ ويىندى كەلەسى قارسىلاسپەن جالعاي بەرەتىن. شىن سوعىستى كورگەن مايدانگەر-وفيتسەر سارىاعانىڭ كەز كەلگەن اداممەن العاشقى ءتىل قاتقانداعى ءسوزى «سەن, اينالايىن ءوزى...»-دەن باستالۋشى ەدى. پەردەسى جوق ۇلكەن دە قالىڭ شىنى تەرەزەدەن شاقىرايىپ تۇسكەن كۇن ساۋلەسى ونسىز دا شارت تا شۇرت شايقاس ءجۇرىپ جاتقان شاعىن بولمەنى دالىزگە قاراعان ەسىگى اشىق تۇرسا دا, مي قايناتقانداي ەتىپ ىسىتىپ جىبەرەدى. سۇيىقتاۋ بىتكەن توبە شاشى شەگىنىپ تۇراتىن ءىس ۇستىندەگى مۇعالىمباي اعام قاق ماڭدايىن قىزدىرعان الگى كۇننىڭ قىزۋىنا شىداي الماي كوزى جۇمىلىپ, بالبىراپ ءبىر ءسات ءۇن-ءتۇنسىز قالادى. «جەڭىلۋگە» كەزەككە تۇرعان ءبىز سەكىلدى مومىنداردىڭ ءبىر كوزىمىز ويىن تاقتاسىندا بولعانىمەن, ءبىر كوزىمىز سوندا... قىزىق, اعامىزدىڭ قولىنداعى قالامى قيسايماعان سول كۇيى, اق قاعازدىڭ بەتىندە, جازۋ بىتكەن تۇستا, كەنەت... توقتاپ قالادى. مەڭگەرۋشى كوزىن راحاتتانا جۇمىپ ءبىر ساتتىك پاۋزا جاساپ وتىرعان شىعار دەيىن دەسەك, مۇرنى پىسىلداپ, تاپ وسىلاي ۇيىقتاپ كەتكەن سەكىلدى. ءبولىمنىڭ «قان مايداننىڭ» ورتاسىنداعى قىزمەتكەرى سارىاعام مۇنداي ساق بولار ما, مەڭگەرۋشىسى جاعىنا كوز قىرىن دا سالماستان ء«اي, مۇعالىمباي...» دەپ ءبىر داۋىستاپ قوياتىنى سول ەكەن, وبلىستاعى اۋىل شارۋاشىلىعىنىڭ ەڭ بىلگىر-اكادەميگى جىلقايداروۆ اعامىز, سەلك ەتىپ, ويانادى. ويانعان مەزەتتە... ساۋساقتارى اراسىندا قيسايماعان كۇيى قىزمەتىن كۇتىپ تۇرعان الگى قالامساپقا قايتا جان ءبىتىپ, تۇرعان ورنىنان ارمەن قاراي قوزعالىپ, اق قاعازدىڭ بەتىندە جورعالاپ بارا جاتادى... جاستار جاعى مۇعالىمباي اعانىڭ مۇنداي قابىلەت-قىلىعىنا تاڭ-تاماشا قالىپ, اۋزىمىز اشىلاتىنى سوندا عوي!..
شىركىن, اعالار!
* * *
بىردە رەداكتسياداعى اسا بەدەلدى جولداسحان بوزىمبەكوۆ اعانى الدىمىزعا سالىپ, نۇرمانبەت اعانىڭ بوزجورعاسى – «التىلىق» «جيگۋليمەن» الماتى قالاسىنىڭ اينالاسىن التى اينالىپ شىقتىق. «جەتىسۋلىقتارعا» ساياجاي كەرەك! مۇعالىمباي اعام وبلىستىق اۋىل شارۋاشىلىعى باسقارماسى ارقىلى بىرقاتار ساياجايعا لايىق جەر اۋماعىنىڭ مەكەنجايلارىن الدىمىزعا جايىپ تاستادى. تالعار جاققا باردىق. جەرى شۇرايلى-اق, بىراق يادرولىق-فيزيكالىق ينستيتۋتتىڭ ءتۇبى ۇجىمعا ۇنامادى. «رادياتسيا بار... قاۋىپتى». قاپشاعاي باعىتىنداعى ەكىنشى كوپىردەن كەيىنگى سول قاناتتاعى جازىق دالاعا سۋ تارتۋ قيىن. ەسىك جاقتاعى تاس ۇگىتەتىن كومبيناتتىڭ ماڭىنداعى جازىق – شاڭ-توزاڭ... ۇجىم كوپ تولقىدى. سودان اقىرى بارشامىز باياعىدان ارمانداپ جۇرگەن الاتاۋدىڭ بوكتەرىنە دە جولىمىز ءتۇستى-اۋ.
...الماتىنىڭ يىعىندا تاۋ بوكتەرىن الا ورنالاسقان «كامەنسكي» كەڭشارىنا تاڭ بوزىنان جەتتىك. ديرەكتورى زاحارچەنكو دەگەن ازامات سارى اعامداي زور دەنەلى كىسى ەكەن, سالەمىمىزدى جۇرە الىپ, «ۋازيگىنە» وتىرعان بويدا, «ارتىمنان ەرىڭىزدەر» دەپ, يشارا جاسادى. قازىرگى «تاۋسامالى» شاعىن اۋدانى ەتەكتە قالىپ, بۇرالاڭ جولمەن تاۋ بوكتەرلەپ ورگە ۇزاق جۇردىك. جولداسحان اعام: «مىنا ديرەكتور, ءبىزدى قايدا باستاپ بارادى ءوزى؟» دەسە, نۇرمانبەت اعام: «جوكە, بىزگە بەرەتىن جەردىڭ اۋماعىن بيىكتەن كورسەتەيىن دەگەن شىعار...» دەيدى اڭگىمەنى ازىلگە بۇرىپ. اينالىپ-اينالىپ ءجۇرىپ, ءبىر بۇيىردەن الدىمىزدان شىققان بيىكتەگى الاڭقايعا ەكى ماشينا قۇيرىق تىستەسە كەلىپ كىلت توقتادىق. جازدىق جەڭىل جەيدەسىنىڭ تۇيمەلەرى اعىتىلىپ كەتكەن ديرەكتور تاۋ بوكتەرىنە جاياۋ شىققانداي-اق القىنىپ تۇر. ماڭدايى تەرشىپتى.
– مىنە, دوستار... مەن سىزدەردى ەڭ شۇرايلى جەردىڭ تورىنە الىپ كەلدىم, – دەپ الشاڭداي باسقان ديرەكتور, تومەن قاراي ءتىپ-تىك سوزىلىپ جاتقان ەتەكتى نۇسقاپ, ارلى-بەرلى ءجۇردى. – مىنا قىردىڭ ۇستىنەن باستاپ... سىزدەرگە بەرەمىن, 1,5 گەكتار.
بۇكىل الماتى كوز الدىمىزدا مۇنارتىپ تۇردى. تاۋ سامالى ەستى. شىن مانىندە تاماشا-اق جەر. ءتىلشىنىڭ قيالىن قويسايشى, شىركىن, كەتتى شارلاپ: «... مىنا جەردەن ءبىر قۇجىرا سالساق, الماتىنى توبەدەن كورىپ, ماساتتانىپ-اق وتىرادى ەكەنبىز. رادياتسيا جوق, تاس-توزاڭ جوق, اڭىراعان دالا دا ەمەس».
ويىمدى جولداسقان اعام بۇزدى.
– كەشىرىڭىز, ءسىزدىڭ اتى-ءجونىڭىز كىم ەدى...– دەپ ءسوز باستاعانىمەن ديرەكتورمەن ءوزىنىڭ تانىسۋ نيەتىنە ق ۇلىقسىز ەكەنىن بايقاتقان اعامىز, اسپاي-ساسپاي بىلاي دەپ, توبەمىزدەن جاي ءتۇسىردى.
– اينالايىن, قىمباتتىم, تۇسىنبەدىم... سوندا سەن ءبىزدى ايۋ جۇرەتىن جەرگە الىپ كەلىپ جاقسىلىق جاسادىم دەپ تۇرسىڭ با؟ مۇنداي تاۋ قىراتىندا وسى جەردىڭ ومىرباقي يەسى – مەنىڭ اتا-بابام دا تۇرماعان. قوي, قايتايىق. بۇل ماسەلەنى جولداس زاحارچەنكو شەشپەيدى, وبكوم شەشەدى, – دەپ بىزگە بۇرىلدى. الگى قيال-عاجايىپ ەلەس كوزدەن بۇل-بۇل ۇشتى.
قايتار جولدا رىسبەك اعامنىڭ كاسىپوداقتاعى بەيرەسمي ورىنباسارى رەتىندە «اعا...» دەپ اڭگىمەنى باستاي بەرگەنىمدە, رۋلدە كەلە جاتقان نۇرمانبەت اعا: «اپىراي, جوكە, تەگى بۇلاردىڭ باسىنۋىن قاراشى-ءا, ءسىز قاتتى ايتتىڭىز, جاقسى ايتتىڭىز...» دەدى. ەكى اعاما ءۋاج ايتا المادىم.
جولداسحان اعامنىڭ «ايۋ جۇرەتىن جەر تۋرالى اڭگىمەسىن» رەداكتسياداعى ارىپتەستەر لەزدە اۋىزدان-اۋىزعا ءىلىپ قىزدىرىپ الىپ كەتتى. جۇرت ريزا. ارادا ءۇش كۇن ءوتتى. رەداكتورىمىز پەرنەبەك بەيسەنوۆتىڭ قابىلداۋ بولمەسىنە «كامەنسكي» كەڭشارىنىڭ قابىلداۋ بولمەسىنەن تەلەفون شالىندى. حاتشى قىز كۇليا قۇرماناليەۆا «سىزبەن سويلەسكىسى كەلەدى...» دەدى ماعان. تۇككە تۇسىنسەم بۇيىرماسىن. اتىمدى اتاپ ەجەلگى تانىسىنداي ءىشى-باۋىرىما كىرىپ ءسوز باستاپ كەتكەن زاحارچەنكونىڭ ءوزى. «مەن سىزدەرگە جاندوسوۆ كوشەسىنەن ونشا الىس ەمەس جەردەن «ايبوليت» بالالار دەمالىس ورنىنىڭ تاۋ بەتكەيى جاعىنان 1,7 گەكتار جەر تاپتىم. تاڭەرتەڭ كەلىڭىزدەر. الما باقتى بەرەمىن ...» دەيدى. ءمان-جايعا تەز قانىقتىم, «راحمەتىمدى» ايتىپ ۇلگەردىم. ءبىر ۋاقىتتا, تۋىسقانىمداي بولىپ بارا جاتقان كەڭشار ديرەكتورى زاحارچەنكو, «...ەسىڭدە مە, سىزدەردە اناۋ اق شاشتى, اشۋى قاتتى اقساقال بار عوي... سول كىسىنى الىپ كەلمەي-اق قويشى, جاراي ما...» دەدى ءوتىنىپ.
كۇرە جولدان ونشا الىس ەمەس, سامساپ پىسە باستاعان الماسى بار, وتى بەلۋارعا جەتكەن جەر تەلىمدەرىن رەتىمەن ءبولىپ جاتقاندا, ريزا كوڭىلدەگى كۇللى ۇجىم شۋىلداپ, تورەلىگى اركەز ءجۇرىپ تۇراتىن جولداسحان اعاما قاراپ, قيىلىپ «جوكە, ءبىرىنشى ۋچاسكەنى ءوزىڭىز الىڭىز!» دەدى. سوندا جولداسحان اعام «جوق, اعايىندار, ەڭبەك مىنا ەكى ازاماتتىكى, نۇرمانبەت پەن تالعاتقا وزدەرى قالاعان جەرىنەن بەرەيىك, مەن ءۇشىنشى بولايىن!..» دەدى.
سول كۇنى «جەتىسۋلىقتار» زاڭدى تۇردە يەمدەنگەن ساياجاي تەلىمىنىڭ اپورت الماسىن كەشكە دەيىن كۇرسىلدەتىپ جەپ, قارىق بولدى. جولداسحان اعام مەن ارقىلى زاحارچەنكوعا ءبارىبىر سالەم جولدادى: «بىزگە نە سەبەپتى الما باعىن ۇسىنىپ وتىر؟ جاۋابىن بەرسىن...». اراعا كوپ كۇن سالماي زاحارچەنكونىڭ ورىنباسارى «مەملەكەتتىك كوميسسيانىڭ شەشىمىنە سايكەس ۇزاق جىل بويى اپورت وتىرعىزىلعان الما باعى جەر تەلىمىنىڭ ەسكىرۋىنە بايلانىستى باسقا قاجەتتىلىكتەرگە جۇمسالسىن» دەگەن قۇجاتتى ءمورىن باسىپ الىپ كەلگەنىن دە ۇمىتقان جوقپىن.
قايران, جولداسحان اعا!
* * *
قولىنا تۇسكەن ماتەريالدىڭ بولمەسىنە كىرگەنىنەن شىققانى تەز, جىلدام وقىلىپ دايىن بولاتىن رەداكتوردىڭ ورىنباسارى ءجانابىل تەمىربەكوۆ, ۇنەمى جىميىپ قانا جۇرەتىن اقىن اعا شەكەربەك سادىحان ۇلى مەن ونىڭ شايىر ىنىلەرى يسلام بەيسەباەۆ, ايتاقىن ابدىقالوۆ, ورمان جاناشىرى قوجان ەسجانوۆ پەن حالىقتىق باقىلاۋ بەتىنىڭ يەسى مارات ابدىحالىقوۆ, سپورتتىڭ مايىن ىشكەن مولداحان مۇقاتاەۆ پەن مەيرامبەك تولەپبەرگەنوۆ, «جەتىسۋدىڭ» حانىمدارى – بولىمگە اۋىسقانداعى ءوز باستىعىم گۇلسان ساعىمبەكوۆا مەن گۇلشات اپاي بايانباەۆا, ەكەۋمىز ءبىر كۇندە دۇنيەگە كەلگەن جانكۇمىس جامانكينا, گۇلجامال ابۋعاليەۆا اپاي, وتە مۇقيات اسەم تاسىبەكوۆا, فەلەتونيست-ساتيريكتەر باسقار بيتانوۆ, نۇرتان تولەپبەرگەن ۇلى, جاس جازۋشى قۋاندىق تۇمەنباەۆ, سەكرەتارياتتىڭ حاس شەبەرى ەرعازى اسەمبەكوۆ سەكىلدى كىل جاقسى ارىپتەستەرمەن قىزمەت ىستەۋ قانداي باقىت. كەيىنگى بۋىن ارمان سقابىلوۆ پەن ابدەز راحمانوۆ, بەكەن نۇراحمەتوۆ پەن تورەحان دانياروۆ «جەتىسۋدىڭ» سان جىلدىق اسقاق تا ابىرويلى بەدەلىن تۇسىرمەي گۇلدەندىرگەن ناعىز رەداكتسيا ساربازدارى دەر ەدىم.
«جەتىسۋدىڭ» تۇراقتى تۇردە وتەتىن اپتالىق لەزدەمەسىن ايتسايشى. ارنايى ءسوز بەرمەسە نەمەسە يەك قاقپاسا العا سۋىرىلىپ شىعۋ ادەتىمىزدە جوق بولاتىن. ارينە, جاسىقتىقتان ەمەس. اسقار تاۋداي الدىڭعى بۋىن اعالار ءبىزدىڭ اتىمىزعا, جازعان ماقالامىزعا ءبىر اۋىز عانا جىلى لەبىزىن بىلدىرە وتىرىپ تاربيەلەدى. سونىڭ ءوزى عۇلامالاردان ءدارىس العانمەن تەڭ ەدى-اۋ. اسىل مىنەزدى ارداقتى اياۋلى اعالارىمىزدىڭ ارقامىزدا تۇرعانىن قاتتى سەزىنۋشى ەك. ءبىز ول جىلدارى ەش قامسىز قىزمەت ەتتىك. شىعارماشىلىق ەركىندىكتى, جازۋداعى مۇقياتتىلىقتى, تازالىقتى سول كىسىلەردەن ۇيرەندىك. شىركىن, ءبىزدىڭ «جەتىسۋ!» دەي ءجۇرىپ, ءوسىپ-وركەندەدىك. ...جولداسحان اعام سول زاماننىڭ وزىندە ۋاقىتتىڭ كوشىندە جيىلەي سوققان قان تامىرىنىڭ بۇلكىلىن ءدال سەزىپ, يدەيا ايتا قويۋدىڭ شەبەرى-ءتىن. كۇيىپ تۇرعان قۇقىقتىق سالادا مەيرامبەك ۇشەۋمىز اعانىڭ اسپان كوك تۇستەس «پوبەداسىمەن» قالا مەن دالانى شارلاپ ءجۇرىپ ايعا جۋىق ءنومىر ارالاتىپ «تۇمان ءتۇرىلىپ بارادى...» اتتى ماقالالار سەرياسىن جازعانىمىز ەسىمدە. سيىردىڭ تىلىنەن كەمپىراۋىزبەن قىسىپ سۇيرەسە جەڭىل كولىكتىڭ ىشىنە ەركىن كىرىپ, سىيىپ كەتەتىنى تۋرالى قىزىقتى دەرەك سوندا جازىلعان...
«جەتىسۋدىڭ» ءبىر كەزدەگى رەداكتورى, رەداكتسيا ارداگەرى اياۋلى اعا ءابدۋالى قاراعۇلوۆتىڭ (اقىن ولجاس سۇلەيمەنوۆتىڭ اكەسى) ء«ساتتى ويلار ساعاتىنان» ءدارىس الۋدىڭ ءوزى نەگە تۇرادى. كىل جايساڭدارمەن, جاقسىلارمەن وتكىزگەن, پاي-پاي... جەتى جىل! ايتار دا كوپ, جازار دا جەتىپ-ارتىلادى, اتتەڭ. ايتپاقشى, ءارىپ, ءۇتىر, نۇكتەگە عانا ەمەس جازىلعان ماقالانىڭ يدەياسىنا دەيىن اسا ساق ءارى قىراعى جۇرەتىن بايان نۇرعاليەۆا باستاعان كوررەكتور قىزدارىمىزدىڭ تياناقتىلىعى مەن ۇقىپتىلىعىنا بارشامىز وسى كۇنگە دەيىن قارىزدارمىز دەگەن ويدا جۇرەمىن ۇنەمى. بيىلعى جاز ورتاسىندا ءجۇز جاساعالى تۇرعان قازاقتىڭ اقساقال گازەتى – الماتى وبلىستىق «جەتىسۋ» گازەتىنىڭ ومىرىنەن ءوزىم عانا سارى مايداي ساقتاپ جۇرگەن تاريحي جازبالاردىڭ بىرەر ۇزىگى وسى عانا...
شىركىن, ءبىزدىڭ «جەتىسۋ!»
تالعات ءسۇيىنباي,
«ەگەمەن قازاقستان»
الماتى
