بيىل العاشقىلاردىڭ ءبىرى بولىپ «رايىنبەك» شارۋا قوجالىعى اسىل تۇقىمدى «انگۋس» سيىرلارىن ساتىپ اكەلىپ, ءوسىرۋدى قولعا الىپ وتىر. «مىڭ رەت ەستىگەنشە, ءبىر رەت كور» دەپ دانا حالقىمىز ايتقانداي, بۇل اسىل تۇقىمدى مال وسىرگەن شارۋاشىلىق ورنالاسقان سۇلتانشەگەن قىستاعىنا اۋدان اكىمى ابات شىنىبەكوۆپەن بىرگە بارىپ قايتتىق.
اۋدان حالقىنا جاقسى تانىس سەرىك تەمىرحانوۆ باسشىلىق ەتەتىن بۇل شارۋاشىلىق اسىل تۇقىمدى سيىرلاردى قوستانايدان ساتىپ اكەلگەن.
– بۇل اسىل تۇقىمدى ءىرى قارا مالىن ەت ءوندىرۋ جانە اۋدانىمىزعا تاراتۋ ماقساتىندا ساتىپ الىپ وتىرمىز. «انگۋس» ءبىزدىڭ تابيعاتىمىزعا بەيىم كەلەدى, قىستىڭ سۋىعىنا ءتوزىمدى. سيىرلاردى ساتىپ اكەلگەلى شارباق ىشىندە ۇستايمىز, قوراعا قاماعان جوقپىز. اللا ءساتىن سالىپ, كۇن جىلىنىسىمەن ارنايى مامانداردى الدىرىپ, قولدان ۇرىقتاندىرۋدى ىسكە اسىرماقپىز. ونىڭ ۇستىنە تاعى دا 25 سيىر ساتىپ الۋدى كوزدەپ وتىرمىز. بۇل اسىل تۇقىمدى مالدى وسىرۋگە قىزىعۋشىلىق تۋعىزىپ وتىرعان باسقا دا شارۋاشىلىقتار بار, – دەدى س.تەمىرجانوۆ.
جالپى, «انگۋس» تۇقىمى – تەز ءوسىپ جەتىلەتىن, ءمۇيىزسىز سيىر. «ابەردين-انگۋس» ەتتى كەلەدى. انالىقتارىنىڭ ورتاشا تىرىدەي سالماعى 550- 600 كيلونى قۇراسا, بۇقالارىنىڭ سالماعى 800- 850 كيلونى قۇرايدى ەكەن.
قايرات جاقىپ
باتىس قازاقستان وبلىسى,
كازتالوۆ اۋدانى
