جاز قىزىعىنا ەنگەن جۇرت اۋەلگىدە ساياباقتار مەن سۋبۇرقاقتار ماڭىنا قويىلعان كىتاپ سورەلەرىن تاماشالاۋعا كەلسە, قازىر تۇراقتى وقىرمانعا اينالىپ, ىزدەگەن تۋىندىلارىن تاڭداپ وقيدى. وقىرمان قاجەتىن وتەۋگە بەل شەشە كىرىسكەن باسقارمانىڭ قىزمەتكەرلەرى ارنايى ساۋالناما جۇرگىزىپ, تۇرعىنداردى قىزىقتىراتىن ادەبيەتتەر ءتىزىمىن جاساپتى. ناتيجەسىندە, تالدىقورعان قالاسى مەن وبلىستىڭ الاكول, بالقاش, ەسكەلدى, ەڭبەكشىقازاق, جامبىل, ىلە, قاراتال, كەربۇلاق, كوكسۋ, پانفيلوۆ, تالعار, ۇيعىر اۋداندارىنىڭ تۇرعىندارى ءۇشىن اشىق كىتاپ سورەلەرى ۇيىمداستىرىلىپ, ولارعا قازاق جانە شەتەل كلاسسيكتەرىنىڭ شىعارمالارىمەن قاتار تانىمدىق-پسيحولوگيالىق كىتاپتار قويىلدى.
– قازىر الەم بويىنشا كىتاپ وقيتىندار سانى ازايدى دەگەن دەرەك بار. بۇل تەحنولوگيالىق پروگرەستىڭ ىقپالى شىعار. بىراق ادامدار مۇلدەم كىتاپتان باس تارتتى دەۋگە بولماس. وقىرمانعا جاعداي جاساۋ كەرەك. وسى ماقساتتا بۋككروسسينگ فورماتى كەڭ قولدانىسقا ەنىپ جاتىر. بۇل «كىتاپ اينالىمى, وقىرمانداردىڭ ءوزارا كىتاپ الماسۋى» دەگەن ۇرانمەن جۇمىس ىستەيتىن جوبا. ءبىز دە ەكى جىل بويىنا «جەتىسۋ – كىتاپقۇمارلار ولكەسى» اتتى شارا ۇيىمداستىرىپ كەلەمىز. ناتيجە جامان ەمەس. وتكەن جىلعى ەسەپ بويىنشا 792 ادام وقىعان كىتاپتارىن ءوزارا الماسقان. ال ساياباقتاردا وتىرىپ كىتاپ وقيتىن ادامنىڭ سانى ءتورت ءجۇز جيىرما ادامعا جەتتى, – دەيدى الماتى وبلىستىق تىلدەردى دامىتۋ باسقارماسىنىڭ باسشىسى ايدار باشباەۆ.
بيىل دا جالعاسىن تاپقان جوبانى كۇتىپ جۇرگەندەردىڭ دەنى بالالار ەكەن. تالدىقورعان قالاسىنداعى قاراتال وزەنىنىڭ جاعالاۋىنداعى دەمالىس ورنىنا بارا قالساڭىز, اشىق كىتاپ سورەسىنەن تاڭداعان كىتابىن الىپ, قۇنىعا وقىپ وتىرعان جاسوسپىرىمدەردى كەزدەستىرەسىز.
– ءبىزدىڭ ماماندار وقىرماندار اراسىندا ساۋالناما جۇرگىزىپ, قانداي تاقىرىپتاعى تۋىندىلارعا سۇرانىس بارىن زەرتتەپ كوردى. باسقارما كوپشىلىكتى قىزىقتىرعان كىتاپتارعا قارجى ءبولدى. قازىر الىنعان كىتاپتار قولجەتىمدى سورەلەردە تۇر. شاراعا وقىرماندار عانا ەمەس, كىتاپ سىيلاۋشىلار دا بەلسەنە اتسالىسۋدا. تالدىقورعان قالاسىنىڭ تۇرعىندارى تاراپىنان 56 كىتاپ سىيعا الدىق. بيىل جوبا اياسى كەڭەيدى. اۋدان ورتالىقتارىنداعى كورنەكى جەرلەرگە اشىق كىتاپ سورەلەرىن قويدىق. قاپشاعاي, تەكەلى قالالارىنىڭ كوشەلەرىندە دە وقىرماندارعا ارنالعان كىتاپ سورەلەرى اشىلدى, – دەدى بىزگە باسقارما باسشىسى ايدار باشباەۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى
