جەتىسۋ جەرىندەگى ۇكىمەتتىك ەمەس ۇيىمدار, بيزنەس جانە مەملەكەت اراسىنداعى ارىپتەستىكتىڭ التىن كوپىرىنە اينالعان ءۇش جاقتى ىنتىماقتاستىق فورۋمى وسىمەن ەكىنشى جىل قاتارىنان وتكىزىلىپ وتىر. «Asar» فورۋمىندا ۇكىمەتتىك ەمەس ۇيىمدار ءوز جوبالارىن قورعاپ, ولاردىڭ ناقتى ىسكە اسۋىنا مۇمكىندىك الادى. جاقسى داسيۇرگە اينالعان شارانىڭ بيىلعى تالقىسىنا تالدىقورعان قالاسىنداعى «قامقور» مۇگەدەكتەر قوعامدىق بىرلەستىگى ۇسىنعان «شەكسىز بي», «قاراساي اۋدانىنان «بالاتاي» قوعامدىق بىرلەستىگىنىڭ «مۇرانى دامىتامىز – ءتۋريزمدى جانە ءوزىمىزدى دامىتامىز» جوباسى, كەربۇلاق اۋداندىق «قامقور» مۇگەدەكتەر قوعامىنىڭ «مۇمكىندىگى شەكتەۋلى جانە دتسپ-مەن اۋىراتىن بالالارعا ارنالعان وڭالتۋ ورتالىعى» جوباسى جانە كوكسۋ اۋداندىق ء«ۇش ۇرپاق» ۇيىمىنىڭ ء«ۇش ۇرپاق» جوباسى ءتۇسىپ, بارلىق جوبا ساتىمەن قورعالدى.
بۇل جوبالار وبلىس بويىنشا ىرىكتەۋدەن وتكەن, ماماندار تاراپىنان قولداۋعا مۇقتاج باستامالار رەتىندە تاڭدالىپ الىنعان ەكەن. ال جالپى فورۋمعا قاتىسۋعا ايماقتاعى عانا ەمەس, ەلىمىزدىڭ تۇكپىر-تۇكپىرىندەگى ۇكىمەتتىك ەمەس ۇيىمداردان ەكى جۇزدەن استام ۇسىنىس تۇسكەن. سولاردىڭ ىشىندە 141 جوبا ىرىكتەلگەن, ونىڭ وتىز شاقتىسى الماتى وبلىسىنىڭ قوعامدىق ۇيىمدارى ۇسىنعان جوبالار بولدى.
«Asar» ءۇش جاقتى ىنتىماقتاستىق فورۋمىنىڭ باستى ەرەكشەلىگى – جەڭىمپاز جوبالاردى قارجىلاندىرۋعا مەملەكەت قارجىسى عانا ەمەس, بيزنەس قاۋىمداستىق وكىلدەرىنىڭ كومەگىنە جۇگىنۋگە جول اشادى.
فورۋمعا ارنايى قاتىسقان «اتامەكەن» ۇلتتىق پالاتاسى باسقارما توراعاسىنىڭ ورىنباسارى ەلدار جۇماعازيەۆتىڭ ايتۋىنشا حالىقتىن الەۋمەتتىك ماسەلەلەرىن شەشۋگە بيزنەستىڭ قاتىسۋى مەن قايىرىمدىلىق مادەنيەتىن قالىپتاستىرۋ بويىنشا «اتامەكەننىڭ» باستامالارى كەڭ قولداۋعا يە.
- قازىرگى تاڭدا بيزنەس جوعارى الەۋمەتتىك جاۋاپكەرشلىكتى كورسەتىپ وتىر. بىلتىردىڭ وزىندە 2 مىڭ كومپانيا الەۋمەتتىك كاسىپكەرلىكتى جۇزەگە اسىرۋ ماقساتىندا 122 ملرد تەڭگە قارجى جۇمساعان, - دەيدى ەلدار جۇماعازيەۆ.
تالدىقورعان قالاسىنىڭ تورىندە وتكەن فورۋم جۇمىسىنا ەلىمىزدىڭ ءدىن ىستەرى جانە ازاماتتىق قوعام ءمينيسترى دارحان قالەتاەۆ, «اتامەكەن» ۇلتتىق پالاتاسى باسقارما توراعاسىنىڭ ورىنباسارى ەلدار جۇماعازيەۆ الماتى وبلىسى اكىمىنىڭ ورىنباسارى جاقسىلىق ومار, سونىمەن قاتار بيزنەس-قوعامداستىق, مەملەكەتتىك قۇرىلىمدار, وتاندىق جانە حالىقارالىق ۇكىمەتتىك ەمەس ۇيىمداردىڭ 300-گە تارتا وكىلى قاتىستى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
