ء«بىزدىڭ جۇمىستىڭ باستى باعىتتارىنىڭ ءبىرى حالىقپەن جانە ازاماتتىق قوعاممەن تىعىز بايلانىس ورناتۋ. وسى ورايدا قوعامدىق كەڭەستىڭ اتقاراتىن ءرولى ۇلكەن ماڭىزعا يە بولىپ وتىر. ويتكەنى مەملەكەتتىك ورگانداردىڭ اشىقتىعىنا قول جەتكىزىلدى. كەڭەس جۇمىسى بيلىك پەن قوعام اراسىنداعى بايلانىسقا ارقاۋ بولدى. وتكەن جىلى قوعامدىق كەڭەستىڭ ءۇش جينالىسىن وتكىزدىك. ول جيىنداردا «تسيفرلى قازاقستان» مەملەكەتتىك باعدارلاماسىن دايىنداۋ بارىسى پىسىقتالدى. «رۋحاني جاڭعىرۋ» باعدارلاماسىن جۇزەگە اسىرۋ جانە بۇقارالىق اقپارات قۇرالدارى, اشىق ۇكىمەت پەن مەملەكەتتىك قىزمەت كورسەتۋ سالالارىنداعى بىرقاتار ماڭىزدى ماسەلەلەر دە قارالعان بولاتىن. كەڭەستىڭ ءاربىر ۇسىنىسى مينيسترلىكتىڭ باقىلاۋىندا. مينيسترلىكتىڭ نورماتيۆتىك-قۇقىقتىق اكتىلەرى دە مىندەتتى تۇردە قوعامدىق كەڭەستىڭ كەلىسىمى بويىنشا جۇزەگە اسىرىلادى. «اقپاراتتى قازاقستان-2020» مەملەكەتتىك باعدارلاماسى 5 جىل جۇرگىزىلدى. قازىرگى ۋاقىتتا ءوز كۇشىن جويدى. مەملەكەتتىك باعدارلامانىڭ ءساتتى جۇزەگە اسىرىلعانى ەلىمىزدەگى اقپاراتتىق-كوممۋنيكاتسيالىق تەحنولوگيالار, مەملەكەتتىك قىزمەت كورسەتۋ مەن بۇقارالىق اقپارات قۇرالدارى سالاسىنا قاتىستى كورسەتكىشتەردىڭ جاقسارعانىنان بايقالادى. وسى باعدارلامانى جۇزەگە اسىرۋ ارقىلى ەلىمىزدەگى ەكونوميكا سالاسىن تسيفرلاندىرۋدىڭ كەلەسى كەزەڭىن دامىتۋعا باعىتتالعان بازالىق مۇمكىندىكتەر قۇرىلدى. جوسپار بويىنشا 14 ماقساتتى ينديكاتور قاراستىرىلعان. ولاردىڭ تەڭ جارتىسى ياعني جەتەۋى تولىق جۇزەگە اسىرىلدى. حالىقتى تسيفرلى حابار تاراتۋمەن قامتاماسىز ەتۋ جوسپارعا ساي 87 پايىزدى قۇراۋى قاجەت بولاتىن. قازىرگى كورسەتكىش بويىنشا 81,1 پايىز. بۇل «قازتەلەراديو» راديوتەحنيكالىق ستانساسى قۇرىلىسىنىڭ كەستەدەن كەشىگىپ جاتقانىنا بايلانىستى. الايدا جۇمىس ءبىر ساتكە دە توقتاعان جوق. كورسەتكىش تۇراقتى تۇردە ءوسىپ كەلە جاتىر», دەدى اقپارات جانە كوممۋنيكاتسيالار ءمينيسترى.
بايانداما بارىسىندا مينيستر مەملەكەتتىك بۇقارالىق اقپارات قۇرالدارىنىڭ جۇمىسى دا جان-جاقتى جاڭعىرتىلعانىن تىلگە تيەك ەتتى.
«ەل ارنا» كينوكانالى اشىلدى. «حابار 24» ارناسىندا روبوتتالعان ستۋديا ىسكە قوسىلدى. «GalamTV» ينتەرنەت-تەلەارناسى جاڭالاندى. 2017 جىلى مەملەكەتتىك اقپاراتتىق تاپسىرىس اياسىندا 40 تەلەسەريال ءتۇسىرىلدى. بۇل 2016 جىلمەن سالىستىرعاندا ەكى ەسەگە ارتىق كورسەتكىش. كەيبىر وتاندىق تەلەحيكايالاردى ءوز ەلدەرىندە كورسەتۋ قۇقىعىن قىرعىزستان, رەسەي مەن قىتاي, تاعى باسقا ەلدەر ساتىپ الىپ جاتىر. سونىمەن قاتار «قۋاتتى قازاقستان» بىرىڭعاي مەديا-جوسپارى بەكىتىلدى. بۇل جوسپارعا ساي مەملەكەتتىك ورگانداردىڭ ءبىر جىلدىق ءىس-شارالارى بىرىكتىرىلىپ, ولاردى جاريالاۋدىڭ ۇسىنىستارى بەلگىلەندى. وتكەن جىلدىڭ جەلتوقسان ايىندا اقپارات جانە كوممۋنيكاتسيالار باعىتىنداعى 16 زاڭ مەن 6 كودەكسكە وزگەرتۋلەر مەن تولىقتىرۋلار ەنگىزىلدى. بۇل زاڭ جوباسىن وزدەرىڭىزبەن بىرنەشە رەت تالقىلاعان بولاتىنبىز. قازىر زاڭ اقپارات كەڭىستىگىندە ءبىزدىڭ ازاماتتاردىڭ جانە بالالاردىڭ قۇقىعىن قورعاۋدا وڭ ناتەجيە بەرىپ وتىرعانىن اتاپ ءوتۋ قاجەت. بۇعان قوسا تسيفرلى حابار تاراتۋعا كوشۋ بويىنشا دايىندىق جۇمىستارى جۇرگىزىلدى. 2018 جىلدىڭ سوڭىنا دەيىن ماڭعىستاۋ, جامبىل مەن وڭتۇستىك قازاقستان وبلىستارى تولىق تسيفرلى تەلەراديوحابار تاراتۋعا كوشەدى. قازىرگى ۋاقىتتا سپۋتنيكتى تەلەۆيزيا ابونەنتتەرىنىڭ كولەمى 1,3 ميلليون ادامدى قۇراپ وتىر», دەدى ۆەدومستۆو باسشىسى.
ەلىمىزدىڭ اقپاراتتىق نارىعىن دامىتۋ ماقساتىندا ءتۇرلى يميدجدىك ءىس-شارالار دا وتكىزىلىپ جاتىر. وسى ورايدا داۋرەن اباەۆ «تۇمار» بايقاۋىن, «ۇركەر» سىيلىعىن, سونىمەن قاتار «Astana Media week» مەديا-اپتاسىن ايرىقشا اتاپ ءوتتى.
«باسا نازار اۋداراتىن تاعى ءبىر جايت, «رۋحاني جاڭعىرۋ» باعدارلاماسى اياسىندا ءبىزدىڭ مينيسترلىك «قازاقستاننىڭ 100 جاڭا ەسىمى» جوباسىن جۇزەگە اسىرۋدا. وزدەرىڭىزگە دە بەلگىلى, اشىق داۋىس بەرۋ ناتيجەسىندە ءوز ەڭبەكتەرىمەن ۇلكەن تابىسقا جەتكەن ەلىمىزدىڭ جاڭا ەسىمدەرى بەلگىلى بولدى. وتكەن جىلدىڭ 1-ءشى جەلتوقسانىندا ولار مەملەكەت باسشىسىمەن كەزدەستى. 100 جاڭا ەسىمنىڭ قوعامعا پايدالى جوبالارى مەملەكەتتىڭ قولداۋىنا يە بولاتىنىن اتاپ وتكىم كەلەدى. قازىر حالىق اراسىندا ۇلكەن قولداۋعا يە بولعان وسى جوبانىڭ كەلەسى كەزەڭىنە دايىندىق جۇمىستارى باستالىپ كەتتى. سونداي-اق ءبىز «اشىق ۇكىمەت» جوباسىنا ەرەكشە نازار اۋدارامىز. بۇل «اقپاراتقا قولجەتىمدىلىك» زاڭىنىڭ اياسىندا جۇزەگە اسىپ وتىر. «اشىق دەرەكتەر» پورتالى ارقىلى ەل ازاماتتارى 2800-گە جۋىق دەرەككە قول جەتكىزۋگە مۇمكىندىك الادى. سونىمەن قاتار وسى پورتالدا 25 مىڭ نورماتيۆتىك-قۇقىقتىق اكتى مەن تۋرا سونداي كولەمدەگى بيۋدجەتتىك باعدارلامالاردىڭ جوبالارى ورنالاسادى. كەز كەلگەن ازاماتتىڭ مەملەكەتتىك ورگانداردىڭ ءبىرىنشى باسشىلارىنىڭ بلوگ-پلاتفورمالارى ارقىلى ءوزىن قىزىقتىرعان سۇراقتارعا جاۋاپ الۋىنا مۇمكىندىك پايدا بولدى. مەملەكەتتىك ورگانداردىڭ ءبىرىنشى باسشىلارىنا 220 مىڭ سۇراق كەلىپ تۇسكەن. اقپاراتتىق كەڭىستىكتەگى زاڭنىڭ قاداعالانۋىن قامتاماسىز ەتۋگە توقتالاتىن بولسام, ءبىزدىڭ باستى ماقساتىمىز – ازاماتتاردى اسىرەسە بالالار مەن جاسوسپىرىمدەردى تەرروريزم, ءدىني ەكسترەميزم, زورلىق-زومبىلىق, سۋيتسيدكە يتەرمەلەۋ جانە تاعى باسقا ناسيحاتتاردان قورعاۋ. وتكەن جىلدىڭ وزىندە وسىعان بايلانىستى 10 مىڭعا جۋىق سايت پەن ماتەريالدارعا توسقاۋىل قويىلدى. الەۋمەتتىك جەلىلەردە 230 مىڭنان اسا ماتەريال جويىلدى», دەپ اتاپ ءوتتى اقپارات جانە كوممۋنيكاتسيالار ءمينيسترى.
راۋان قايدار,
«ەگەمەن قازاقستان»
