ناقتى شەشىم رەتىندە 1997 جىلعى 20 قازاندا قازاقستان رەسپۋبليكاسىنىڭ پرەزيدەنتىنىڭ «اقمولا قالاسىن قازاقستان رەسپۋبليكاسىنىڭ استاناسى دەپ جاريالاۋ تۋرالى» اسا ماڭىزدى جارلىعى شىقتى.
وسى ءبىر تاريحقا تولى 1997 جىلدىڭ 7 قاراشاسىندا پرەزيدەنت اكىمشىلىگى مەن ۇكىمەتى الماتىدان ارقاعا قونىس اۋدارسا, 10 جەلتوقسان كۇنى پرەزيدەنت جارلىعىمەن «اقمولا قالاسى قازاقستان رەسپۋبليكاسىنىڭ جاڭا استاناسى» دەپ تانىلدى.
وسىلاي باستالعان جاڭا ءداۋىر جىلناماسىنا بيىل 20 جىل تولىپ وتىر. ءبىر عانا دەرەك: 1998 جىلى بار-جوعى 300 مىڭعا جۋىق تۇرعىنى بار شاعىن قالادا قازىر ءبىر ميلليوننان استام ادام ءومىر سۇرۋدە. ياعني 20 جىل – 20 ءداۋىر. وسىنداعى ءاربىر جىلدىڭ قويناۋىندا جاڭا داۋىرگە بەت العان قازاق ەلىنىڭ تاريحى جاتىر. اتاپ ايتقاندا:
1998 جىل
6 مامىر – «قازاقستان رەسپۋبليكاسىنىڭ استاناسى اقمولا قالاسىن قازاقستان رەسپۋبليكاسىنىڭ استاناسى استانا قالاسى دەپ قايتا اتاۋ تۋرالى» قازاقستان رەسپۋبليكاسى پرەزيدەنتىنىڭ جارلىعى شىعىپ, ءدال وسى كۇنى «قازاقستان رەسپۋبليكاسىنىڭ استاناسى استانا قالاسىندا سارىارقا جانە الماتى اۋداندارىن قۇرۋ تۋرالى» جارلىعى جاريالاندى.
6 مامىر – قازاقستان رەسپۋبليكاسى پرەزيدەنتىنىڭ جارلىعىمەن ۇلى وتان سوعىسىنداعى نەمىس-فاشيست باسقىنشىلارىنا قارسى كۇرەستە كورسەتكەن ەرلىگى مەن قاھارماندىعى ءۇشىن كىشى سەرجانت باقتىوراز بەيسەكباەۆقا «حالىق قاھارمانى» اتاعى بەرىلىپ, كەشىكپەي قالاداعى جۋكوۆسكي كوشەسى باقتىوراز بەيسەكباەۆ بولىپ وزگەردى.
7 مامىر – پرەزيدەنت ن.نازارباەۆتىڭ جارلىعىمەن ادىلبەك رىسكەلدى ۇلى جاقسىبەكوۆ استانا قالاسىنىڭ تۇڭعىش اكىمى بولىپ تاعايىندالدى.
9 مامىر – استانادا تۇركى تىلدەس مەملەكەتتەر باسشىلارىنىڭ العاشقى ءسامميتى ءوتتى. وعان ازەربايجان رەسپۋبليكاسىنىڭ پرەزيدەنتى گەيدار اليەۆ, وزبەكستان پرەزيدەنتى يسلام كاريموۆ, قىرعىزستان پرەزيدەنتى اسقار اقاەۆ, تۇركيا پرەزيدەنتى سۇلەيمەن دەميرەل, تۇرىكمەنستاننىڭ ءماجىلىس توراعاسى ساحات مۇرادوۆ جانە قازاقستان پرەزيدەنتى نۇرسۇلتان نازارباەۆ قاتىستى.
20 مامىر – پرەزيدەنت ن.نازارباەۆ «قازاقستان رەسپۋبليكاسى استاناسىنىڭ مارتەبەسى تۋرالى» زاڭعا قول قويدى. زاڭ ەل استاناسىنىڭ قۇقىقتىق مارتەبەسىن, ساياسي جانە ەكونوميكالىق نەگىزدەرىن ايقىنداپ بەردى.
9 ماۋسىم – قازاقستان رەسپۋبليكاسىنىڭ استاناسى – استانا قالاسىندا وتان قورعاۋشىلار ەسكەرتكىشى ىرگەتاسىنىڭ قالانۋ ءراسىمى بولدى. وعان تۇركيانىڭ پرەزيدەنتى سۇلەيمەن دەميرەل, قىرعىزستاننىڭ پرەزيدەنتى اسقار اقاەۆ جانە باسقا دا جوعارى مارتەبەلى مەيماندار قاتىستى.
10 ماۋسىم – استانانىڭ حالىقارالىق تۇساۋكەسەر تويى بولىپ ءوتتى. تۇساۋكەسەرگە جوسپارلى تۇردە ازىرلەنۋ ءۇشىن ارنايى قىسقا مەرزىمدى باعدارلاما قابىلداندى. مۇنى ىسكە اسىرۋعا 217 قازاقستاندىق جانە شەتەلدىك كومپانيا قاتىستى. قۇرىلىس-مونتاج بەن جوندەۋ جۇمىستارىنا بارلىعى 13,8 مىڭ ادام قاتىسىپ, قالانىڭ 248 مىڭ شارشى مەتر اۋماعى تۇبەگەيلى جاڭعىرتىلدى.
12 ماۋسىم – قازاق قوعامىنداعى بيلەر ينستيتۋتىنىڭ ۇلگىسى رەتىندە بەلگىلى حالقىمىزدىڭ قادىرلى تۇلعالارى: تولە, قازىبەك, ايتەكە بيلەرگە ارنالعان ەسكەرتكىش جوعارعى سوت عيماراتىنىڭ جانىندا اشىلدى. بۇل شاراعا مەملەكەت باسشىسى نۇرسۇلتان نازارباەۆ قاتىستى.
18 ماۋسىم – استانا قالاسىنىڭ تۇساۋكەسەر ءراسىمىن الەم قازاقتارىنا تانىتۋ ماقساتىندا وسى كۇنى ەلوردا تورىندە دۇنيە ءجۇزى قازاقتارىنىڭ كىشى قۇرىلتايى ءوتتى. وعان الەمنىڭ 20 ەلىنەن 100-گە تارتا قوناق كەلىپ قاتىستى.
7 قازان – پرەزيدەنت ن.نازارباەۆ استانانىڭ جاڭا ورتالىعىن دامىتۋدىڭ باس جوسپارىنىڭ جوبا-يدەياسىنا جاريالانعان حالىقارالىق كونكۋرستىڭ قورىتىندىسىن شىعارىپ, جاپون ساۋلەتشىسى كيسە كۋروكاۆانىڭ جۇمىسىن جەڭىمپاز دەپ جاريالادى.
15 جەلتوقسان – قازاقستان رەسپۋبليكاسىنىڭ پرەزيدەنتى ن.ءا.نازارباەۆقا استانا قالاسىن ەلورداسى رەتىندە قايتا سالۋعا, قالىپتاسۋىنا جانە پەرسپەكتيۆالىق دامۋىنا قوسقان زور ۇلەسى ءۇشىن «استانا قالاسىنىڭ قۇرمەتتى ازاماتى» اتاعى بەرىلدى.
دايىنداعان
بەكەن قايرات ۇلى,
«ەگەمەن قازاقستان»
