اتقارۋشى بيلىك وكىلدەرىنە جۇرتشىلىق تاراپىنان 100-دەن استام ساۋالدار قويىلسا, ولاردىڭ 45-ءى وبلىس اكىمى قۇمار اقساقالوۆقا جولداندى. قابىلداۋعا كەلىپ, ريزاشىلىقپەن كەتكەندەردىڭ ءبىرى – ەلەنا گۋيۆان. ول ەگەمەن قازاقستان كوشەسىندە تۇرادى. 1983 جىلى سالىنعان عيماراتتىڭ شاتىرى ابدەن توزعان. جاۋىن-شاشىندى كۇندەرى باسپانا ءىشى سۋعا تولىپ كەتەدى ەكەن. قالالىق اكىمدىككە قايرىلعان ەكەن, قاراجات جوق دەگەن جاۋاپ الىپتى. ايماق باسشىسى قۇمار اقساقالوۆ كەيۋانانىڭ شاعىمىن مۇقيات تىڭداپ العاننان كەيىن باسپانانىڭ شاتىرى قالىپقا كەلتىرىلەتىنىن قاداپ ايتتى.
«وبلىس ورتالىعىندا كوپتەگەن ۇيلەر كۇردەلى جوندەۋدى قاجەت ەتەدى. وسىعا وراي رەسپۋبليكالىق قازىنادان قارجى بولىنەتىن بولدى. جەرگىلىكتى بيۋدجەتتەن دە مۇمكىندىكتەر قاراستىرىلادى», دەدى قۇمار ىرگەباي ۇلى.
جۇرتشىلىقتى اۋىلعا ساپالى اۋىزسۋ تارتۋ, جولداردى جوندەۋ ماسەلەلەرى دە تولعاندىراتىن بولىپ شىقتى. ال ناتاليا ەمەليانوۆا باسپانا سۇراي كەلىپتى. كوكتەمدە ول تۇراتىن ءۇيدىڭ ءبىر جاق قابىرعاسى وپىرىلىپ تۇسكەن بولاتىن. كوميسسيا شەشىمىمەن اپاتتىق جاعدايدا دەپ تانىلىپتى.ماسەلە بىردەن وڭ شەشىمىن تاپتى.
ق. اقساقالوۆ باق وكىلدەرىنە بەرگەن سۇحباتىندا ەلباسىنىڭ جۋىردا جۇكتەگەن تاپسىرماسى بويىنشا ءوڭىردىڭ جاڭا دامۋ باعدارلاماسى تۇزىلەتىنىن, وندا الەۋمەتتىك نىساندار سالۋ, اۋىزسۋ, جولداردى جوندەۋ,جالاقىنى كوبەيتۋ, حالىق سانىن ارتتىرۋ, تۇرعىن ءۇي قورىن جاڭالاۋ سەكىلدى وزەكتى ماسەلەلەر قامتىلاتىنىن, بيىلدان باستاپ جۇزەگە اسىرۋ مىندەتى قويىلىپ وتىرعانىن جەتكىزدى. ءۇش جىلدىڭ ىشىندە ينفراقۇرىلىمداردى جاڭعىرتۋعا 5,5 ميلليارد تەڭگە باعىتتالماق.
وبلىس اكىمىنىڭ ورىنباسارلارىنا, قالا اكىمىنە, باسقارما باسشىلارى مەن قالالىق بولىمدەردىڭ جەتەكشىلەرىنە دە ءوتىنىش ايتقاندار كوپ بولدى. ماسەلەن ەسىل اۋدانىنا قاراستى تاۋاعاش اۋىلىنان كەلگەن ازاماتتار ءالى كۇنگە دەيىن وزدەرىنە تيەسىلى پايلارىن داۋلاپ ءجۇر ەكەن. باستاپقىدا 493 ادامنىڭ جەرى "ياۆلەنسكي متس" سەرىكتەستىگىندە بولىپتى. اتالعان كومپانيا اۋىلدىقتاردىڭ كەلىسىمىنسىز القاپتاردى ع.مۇسىرەپوۆ اۋدانىنداعى بەلگىسىز فيرماعا بەرىپ جىبەرىپتى. قازىرگى كۇنى جەرلەستەرىمىز ول كاسىپورىن ديرەكتورىنىڭ اتى-ءجونىن دا بىلمەيدى. توقجىگىت ءسابيتوۆ نوۆويشيم فيرماسىنان شىققىلارى كەلەتىنىن العا تارتتى. بىراق اۋدان اكىمى ءتيىستى قۇجاتتارعا قول قويماي وتىرعان كورىنەدى. بۇل ماسەلەنى وبلىس اكىمىنىڭ ءبىرىنشى ورىنباسارى ايداربەك ساپاروۆ جاۋاپتى باسقارما باسشىلارىنا ءجىتى تەكسەرىپ, شەشىپ بەرۋدى تاپسىردى.
ءبىلىم باسقارماسىنىڭ باسشىسى گۇلميرا كارىموۆاعا اتا-انالار بالالارىن بالاباقشاعا ورنالاستىرۋعا قاتىستى سۇراقتار قويدى. ولارعا كۇز ايلارىندا 10 بوبەكجاي اشىلاتىنى باياندالدى.
كەلەسى اشىق قوعامدىق قابىلداۋدى قازان ايىندا ۇيىمداستىرۋ جوسپارلانعان.
ءومىر ەسقالي,
«ەگەمەن قازاقستان»
