جيىندا ب.اسىلوۆا ستۋدەنتتەردى تۇراقتى جاتىن ورىنمەن قامتاماسىز ەتۋ بويىنشا ماڭىزدى شارالاردىڭ اتقارىلىپ جاتقاندىعىنا توقتالدى. بۇگىنگى كۇنى رەسپۋبليكا بويىنشا جالپى 83 مىڭ ورىن, ونىڭ ىشىندە وڭتۇستىك قازاقستان وبلىسىندا – 11 مىڭ, استانا قالاسىندا – 17 مىڭ جانە الماتى قالاسىندا 23 مىڭ ورىندىق جاتاقحانا سالۋ قاجەتتىگى انىقتالعان. جاتاقحانالاردى سالۋعا جەر تەلىمدەرىن ءبولۋ جۇمىستارى جەرگىلىكتى اكىمدىكتەرمەن بىرلەسكەن تۇردە شەشىمىن تاپپاق. قازىرگى تاڭدا ءبىلىم بەرۋ مەكەمەلەرىنىڭ اۋماعىندا نەمەسە ولارعا جاقىن ماڭداعى جەرلەردەن 134 جەر تەلىمى بولىنگەن.
– سونداي-اق ءبىز جاتاقحانالار قۇرىلىسىنىڭ مەحانيزمىن انىقتادىق. قۇرىلىس سالۋشى − جاتاقحانا جوباسىن ازىرلەيدى. كەيىن مەملەكەتتىك تاپسىرىستى الۋ ءۇشىن قارجى ورتالىعىمەن كەلىسىمشارت جاساسادى. بۇدان سوڭ بانكتەن قارىز الادى. ال جاتاقحانانى پايدالانۋعا بەرگەننەن سوڭ مەملەكەتتەن وتەماقى تولەنەدى, – دەپ مالىمدەدى ۆيتسە-مينيستر.
جاتاقحانالار جوبالارىن ازىرلەۋ ءراسىمىن جەڭىلدەتۋ ءۇشىن قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى ۇلگى رەتىندەگى جوبا ازىرلەپ, ول بۇگىندە بارلىق اكىمدىكتەرگە تاراتىلعان. سونىمەن قاتار ءبىلىم جانە عىلىم مينيسترلىگى مۇددەلى مەملەكەتتىك ورگاندارمەن بىرلەسە وتىرىپ, بيزنەستىڭ جول كارتاسىنا جاتاقحانا قۇرىلىسىن قوسۋ ارقىلى بانكتەردەن تومەن پايىزدىق نەسيە الۋ ماسەلەسىن پىسىقتاۋ ۇستىندە.
– ەگەر پارلامەنت زاڭعا تۇزەتۋلەردى تامىزدا قابىلداسا, وندا مينيسترلىكتىڭ نورماتيۆتىك-قۇقىقتىق اكتىلەرىن رەتتەۋگە تاعى ءبىر اي كەتەدى. 2019 جىلدىڭ قىركۇيەك ايىنا قاراي 5 000 ورىندى پايدالانۋعا بەرۋدى كوزدەپ وتىرمىز. بۇل ءبىزدىڭ وپتيميستىك بولجامىمىز, – دەدى ب. اسىلوۆا.
ۇلتتىق تەستىلەۋ ورتالىعىنىڭ ديرەكتورى رامازان الىمقۇلوۆتىڭ ايتۋىنشا, بيىلعى جىلعا ارنالعان ۇلتتىق بىرىڭعاي تەستىلەۋدىڭ سۇراقتارى 50 پايىزعا جاڭارعان. – بيىل ۇبت 15-ءشى رەت وتەيىن دەپ وتىر. وسى ۋاقىت ارالىعىندا شامامەن 1,5 ملن تۇلەك تەستىلەۋگە قاتىسقان بولاتىن. قازىرگى ۋاقىتتا 2018 جىلدىڭ ۇبت-سىنا دايىندىق شتاتتىق رەجىمدە جۇرگىزىلىپ جاتىر. بارلىق اۋديتوريالار دايىن. ءۇش مىندەتتى ءپان بولادى: قازاقستان تاريحىنان 20 سۇراق, ساۋاتتى وقۋدان 20 سۇراق, ماتەماتيكالىق ساۋاتتىلىقتان 20 سۇراق جانە تاڭداپ الىنعان 2 پاننەن 30 سۇراقتان بولادى, − دەدى ول.
ورتالىق باسشىسىنىڭ ايتۋىنشا, بۇگىندە رەسپۋبليكالىق اپەللياتسيالىق كوميسسيانىڭ مۇشەلەرى ىرىكتەپ الىنعان. وعان 54 ادام كىرىپ وتىر. – وتكەن جىلى ۇبت-نىڭ تەست تاپسىرمالارى 40 مىڭ بولسا, سونىڭ 98 سۇراعى, ياعني 0,02 پايىزى عانا داۋ تۋدىردى. الەمدىك تاجىريبەدە 1 پايىزعا دەيىن قالىپتى بولىپ ەسەپتەلەدى. ءبىز بۇل دۇرىس كورسەتكىش دەپ سانايمىز. بيىل تەست سۇراقتارىنىڭ بازاسى 50 پايىزعا جاڭاردى, ياعني ۇبت-دا 80 مىڭ سۇراق بولادى, – دەدى ول.
ونىڭ ايتۋىنشا, بىلتىر 198 اپەللياتسيالىق شاعىم تۇسسە, ونىڭ 50 پايىزى تەحنيكالىق ماسەلەلەرگە قاتىستى بولىپتى. سۇراقتار مازمۇنىنا قاتىستى 98 ماسەلە كوتەرىلىپ, ءوز شەشىمىن تاپقان.
ەركەجان ايتقازى,
«ەگەمەن قازاقستان»
