«اعىمداعى جىلى ۇبت 15-ءشى رەت وتەيىن دەپ وتىر. وسى ۋاقىت ارالىعىندا شامامەن 1,5 ملن تۇلەك ۇلتتىق بىرىڭعاي تەستىلەۋگە قاتىستى. قازىرگى ۋاقىتتا 2018 جىلدىڭ ۇبت-سىنا دايىندىق شتاتتىق رەجىمدە جۇرگىزىلىپ جاتىر. بارلىق اۋديتوريا دايىن. بيىل ۇبت فورماتى وزگەرمەيدى. ءۇش مىندەتتى ءپان بولادى: قازاقستان تاريحىنان 20, ساۋاتتى وقۋدان 20, ماتەماتيكالىق ساۋاتتىلىقتان 20 جانە تاڭداپ الىنعان 2 پاننەن 30 سۇراقتان» - دەدى رامازان الىمقۇلوۆ.
بۇگىندە رەسپۋبليكالىق اپەللياتسيالىق كوميسسيانىڭ مۇشەلەرى قۇرامىندا 54 ادام بار. «اپەللياتسيا تەتىگى دە ساقتالادى, ەشقانداي وزگەرىس جوق. ياعني, ۇبت تاپسىرعان تۇلەك كەلەسى كۇنى ساعات 13:00-گە دەيىن داۋ تۋدىرعان ساۋالعا بايلانىستى جەرگىلىكتى اپەللياتسيالىق كوميسسياعا ءوتىنىم بەرە الادى. ودان كەيىن ەگەر جەرگىلىكتى كوميسسيا داۋلاسۋعا سەبەپ بار دەپ شەشەتىن بولسا, وندا ماتەريالداردى رەسپۋبليكالىق كوميسسياعا بەرەدى», - دەدى ول.
بىلتىر 198 اپەللياتسيالىق شاعىم تۇسسە, ونىڭ 50 پايىزى تەحنيكالىق ماسەلەلەرگە قاتىستى بولعان. مازمۇنىنا قاتىستى 98 ماسەلە كوتەرىلىپ, قاناعاتتاندىرىلعان.
«وتكەن جىلى ۇبت-نىڭ تەست تاپسىرمالارى 40 مىڭ بولسا, سونىڭ 98 سۇراعى, ياعني 0,02 پايىزى عانا داۋ تۋدىردى. الەمدىك تاجىريبەدە 1 پايىزعا دەيىن قالىپتى بولىپ ەسەپتەلەدى. ءبىز بۇل دۇرىس كورسەتكىش دەپ سانايمىز. بيىل تەست سۇراقتارىنىڭ بازاسى 50 پايىزعا جاڭاردى جانە بيىلعى ۇبت-دا 80 مىڭ سۇراق بولادى», - دەدى رامازان الىمقۇلوۆ.
