شاراعا قازاقستان رەسپۋبليكاسى ۇلتتىق مۋزەيى ديرەكتورىنىڭ مىندەتىن اتقارۋشى لەونيد كوچەتوۆ, قازاقستان رەسپۋبليكاسى ۇلتتىق مۋزەيىنىڭ زاماناۋي ونەر ورتالىعىنىڭ جەتەكشىسى روزا ابەنوۆا, حالىقارالىق كۋراتور دەۆيد ەلليوت, «Momentum Time-Based» زاماناۋي ونەردىڭ كوممەرتسيالىق ەمەس پلاتفورماسىنىڭ ديرەكتورى رەيچەل ريتتس-ۆولوح, سۋرەتشى الماگۇل مەڭلىباەۆا, سونداي-اق مادەنيەت جانە سپورت مينيسترلىگىنىڭ وكىلدەرى قاتىستى.
«اتالعان جوبانىڭ باستى مىندەتى – ۇلتتىق سۋرەت ونەرىن الەمدىك قاۋىمداستىقتار اراسىندا ناسيحاتتاي وتىرىپ, قازاق بەينەلەۋ ونەرىنىڭ قالىپتاسۋ جانە دامۋ جولىنىڭ فيلوسوفياسىن, سەمانتيكاسىن كەڭىنەن تانىستىرۋ. جوبا اياسىندا اشىلاتىن ءتورت بىردەي كورمەگە سەكسەنگە جۋىق سۋرەتشى قاتىسادى. العاشقى سۋرەت كورمەسى 1 ماۋسىم كۇنى گەرمانيانىڭ بەرلين قالاسىندا اشىلماق», جوبا جەتەكشىسى دەدى لەونيد كوچەتوۆ. ونىڭ سوزىنشە, كورمەلەر نيۋ-يورك (اقش), لوندون ( ۇلىبريتانيا), بەرلين (گەرمانيا), سۋۆون (وڭتۇستىك كورەيا) سىندى قالالاردا وتەتىن بولادى.
كورمە بارىسىندا ونەر ساراپشىلارىنىڭ قاتىسۋىمەن زاماناۋي ونەردىڭ دامۋ تەندەنتسيالارى, بۇگىنگى بەينەلەۋ ونەرىنىڭ كوركەم باعىتتارى مەن دارالىق ستيلدەرى تۋراسىندا ارنايى تاقىرىپتىق ءىس-شارالار وتكىزۋ جوسپارلانعان. تاقىرىپتىق مازمۇنى ءار الۋان اۋقىمدى جوبانى ماۋسىم-قازان ايى ارالىعىندا وتكىزۋ جوسپارلانىپ وتىر. بۇل رەتتە ءسوز العان مۋزەيدىڭ زاماناۋي ونەر ورتالىعىنىڭ جەتەكشىسى روزا ابەنوۆا جاھاندانۋ الەمىندەگى ۇلتتىق مادەنيەتتىڭ ورنى مەن ءرولىنىڭ ماڭىزدى ەكەنىنە, ەرەكشەلىگىنە توقتالدى.
«وتەتىن كورمەلەر تاقىرىپتىق جاعىنان ۇندەس. ءار قالاداعى ءىس-شارا كەزىندە شاقىرىلاتىن سۋرەتشىلەر مەن حالىقارالىق قوناقتار اۋىسىپ وتىرادى. ءار كۋراتور باي تاجىريبەسىمەن بولىسە وتىرىپ, جابدىقتالعان شەبەرحانالاردا شەبەرلىك ساباقتارىن وتكىزەدى. ارت-رەزيدەنتسيادا وتەتىن سۋرەتشىلەرمەن كەزدەسۋگە نەگىزىنەن تابىستى جاس سۋرەتشىلەر قاتىسادى. وسى رەتتە شەبەرلىك ساباقتارى, لەكتسيالار, ۆوركشوپتار سياقتى تاقىرىپتىق ارنايى شارالار وتكىزىلەدى», دەدى روزا ابەنوۆا.
ايا ءومىرتاي,
«ەگەمەن قازاقستان»
