24 جاستاعى برازيليالىق فۋتبولشى مەديتسينالىق تەكسەرىستەن ءوتىپ, 1 ماۋسىم كۇنى رەسمي تۇردە «ليۆەرپۋل» ويىنشىسى اتانادى. The Guardian باسىلىمى تاراتقان مالىمەتكە قاراعاندا, «ليۆەرپۋل» فابينونىڭ ترانسفەرى ءۇشىن 45 ملن ەۋرو تولەگەن. سونىمەن قاتار «موناكو» فۋتبولشىنىڭ الداعى ويىنىنا قاراپ تاعى دا 5 ملن ەۋرو الۋى مۇمكىن.
مالىمەت رەتىندە ايتا كەتسەك, فابينو 2013 جىلدان بەرى «موناكو» ساپىندا دوپ تەۋىپ كەلەدى. وتكەن ماۋسىمدا فۋتبولشى فرانتسيا چەمپيوناتىندا 34 ويىندا الاڭعا شىعىپ, 7 گول سوعىپ, 3 ناتيجەلى پاس بەرگەن.
«كانەلونىڭ» قارسىلاستارى كەزەكتە تۇر
Golden Boy Promotions كومپانياسىنىڭ پرەزيدەنتى ەريك گومەس ءوزىنىڭ قاراماعىنداعى ساۋل «كانەلو» الۆارەستىڭ (49-1-2, 34 كو) قىركۇيەك ايىندا جۇدىرىقتاساتىن قارسىلاستارىنىڭ ەسىمىن اتادى.
«بىزدە ساۋل ءۇشىن بىرنەشە نۇسقا بار. مىسالى, دەنيەل دجەيكوبس, بيللي دجو سوندەرس, جەرمالل چارلو جانە داۆيد لەمە سەكىلدى بوكسشىلاردى قاراستىرىپ وتىرمىز. سونىمەن قاتار بۇل تىزىمدە سپايك و’سالليۆان دا بار. ال گولوۆكين سوڭعى تىزىمدە تۇر. دەگەنمەن ول ەشكىمگە بەلگىسىز سەرگەي دەرەۆيانچەنكومەن جۇدىرىقتاساتىن شىعار», دەيدى گومەس.
ايتا كەتەيىك, مەكسيكالىق بوكسشى وسىدان ءۇش اي بۇرىن كلەنبۋتەرولمەن ۇستالىپ, ونى نەۆادا اتلەتيكالىق كوميسسياسى تىيىم سالىنعان ءدəرى قولداندى دەپ, جارتى جىلعا بوكستان شەتتەتكەن ەدى. الۆارەستىڭ جازا مەرزىمى 15 تامىز كۇنى اياقتالادى.
جيرۋ زيدانمەن تەڭەستى
«چەلسي» مەن فرانتسيا قۇراماسىنىڭ شابۋىلشىسى وليۆە جيرۋ فرانتسيا مەن يرلانديا اراسىندا وتكەن جولداستىق كەزدەسۋدە (2:0) گول سوعىپ, زيداننىڭ كورسەتكىشىنە جەتىپ الدى.
31 جاستاعى فورۆارد وتكەن ماتچتا فرانتسيا قۇراماسى ءۇشىن 31-ءشى گولىن سوعىپ, قازىرگى ۋاقىتتا «رەال» كومانداسىن جاتتىقتىرىپ جۇرگەن زينەدين زيدانعا گول سانى بويىنشا تەڭەستى. ەندى جيرۋ قۇرامانىڭ ەڭ ۇزدىك شابۋىلشىلار قاتارىندا زيدانمەن بىرگە ءتورتىنشى ورىندى ءبولىسىپ تۇر.
فرانتسيا قۇراماسى ساپىندا ەڭ كوپ گولدى داۆيد ترەزەگە (34), ميشەل پلاتيني (41) جانە تەرري انري (51) سوققان.
دايىنداعان ءالي بيتورە,
«ەگەمەن قازاقستان»
