وتانداسىمىز داۆيد لەمە مەن كاريم اشۋر اندەركاردىندا ارگەنتينالىق بوكسشى دجوناتان حوسە ەنيزبەن جۇدىرىقتاسىپ, قارسىلاسىن جەتىنشى راۋندتا تەحنيكالىق نوكاۋتپەن ۇتتى. ەكى بوكسشى اراسىنداعى چەمپيوندىق اتاق ساراپقا سالىنعان جەكپە-جەك ون راۋندقا جوسپارلانعان بولاتىن. دەگەنمەن ارگەنتينالىق بوكسشىنىڭ قاۋقارى جەتى راۋندقا دەيىن جەتتى. دەسە دە بۇل جەكپە-جەك جەرلەسىمىزگە وڭايعا سوققان جوق. ءتورت راۋند بويى قارسىلاسىنان باسىم بولعان جۇكەمباەۆ بەسىنشى راۋندا ەنيزدىڭ اۋىر سوققىسىن وتكىزىپ الىپ, نوكداۋنعا ءتۇسىپ قالدى.
نوكداۋننان تەز ەس ءجيىپ العان باتىر جۇكەمباەۆ جەكپە-جەكتى قايتادان ءوز قولىنا الدى. جەتىنشى راۋندتا وتانداسىمىز قارسىلاسىن ەكى رەت نوكداۋنعا جىبەرىپ, حوسە ەنيزدى جەكپە-جەكتى جالعاستىرا المايتىن حالگە ءتۇسىردى. ناتيجەسىندە تورەشى كەزدەسۋدى توقتاتىپ, چەمپيون رەتىندە وتانداسىمىزدىڭ قولىن كوتەردى. 27 جاستاعى جۇكەمباەۆ سپورتتىق مانسابىنداعى ەكىنشى چەمپيوندىق اتاعىنا قول جەتكىزدى. بۇعان دەيىن ول IBO International بەلدىگىن يەلەنگەن-ءدى. وسىلايشا, باتىر جۇكەمباەۆ كاسىپقوي بوكستاعى 13-ءشى جەكپە-جەگىن وتكىزىپ, 13-ءشى جەڭىسىنە قول جەتكىزدى. ونىڭ 11-دە قارسىلاسىن مەرزىمىنەن بۇرىن جەڭگەن.
سونىمەن قاتار بۇل بوكس كەشىندە ەكى قازاقستاندىق بوكسشى نۇرزات سابىروۆ (6-0, 5 كو) پەن سادريددين احمەدوۆ تە (2-0, 2 كو) جۇدىرىقتاستى. سابىروۆ ارگەنتينالىق قارسىلاسىن تورەشىلەر شەشىمى بويىنشا جەڭسە, احمەدوۆ 34 جاستاعى تاعى ءبىر ارگەنتينالىق بوكس-
شى اريەل الەحاندرو زامپەدريدى ءبىرىنشى راۋندتىڭ ورتا تۇسىندا نوكاۋتپەن ۇتتى.
