جيىنعا ۇلتتىق وليمپيادا كوميتەتىنىڭ (ۇوك) باس ديرەكتورى نۇرلان نوگەربەك, ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ جانە سەرىك ساپيەۆ, ۆاسيلي لەۆيت, دەنيس تەن, گۋزەل مانيۋروۆا, قايرات ەراليەۆ پەن ابزال اجعاليەۆ سياقتى داڭقتى وليمپياداشىلار قاتىستى.
شارانىڭ اشىلۋ سالتاناتىندا ءسوز العان نۇرلان نوگەربەك ەكسپوزيتسيانى كورگەن وسكەلەڭ ۇرپاق ەلىمىزدىڭ سپورتتىق تاريحىمەن جانە چەمپيوندارىمىزدىڭ جىگەرلى جەڭىسىمەن قاناتتاناتىنى ءسوزسىز دەيدى. «وسىدان بىرەر كۇن بۇرىن مەملەكەت باسشىسى رەسپۋبليكاداعى سپورتتىق باستامانى قولداۋ ماقساتىمەن ۆيدەو ۇندەۋ جولدادى. ول سپورتپەن شۇعىلدانۋ تەك قانا فيزيكالىق كۇش پەن دەنساۋلىقتى جاقسارتىپ قويماي, ەرىك-جىگەردى جاقسارتىپ, تابىسقا جەتەلەپ, جوعارى مورالدىق جانە رۋحاني بايلىقتى ارتتىراتىنىنا نازار اۋداردى. مەن بۇل ەكسپوزيتسيانىڭ وسكەلەڭ ۇرپاققا وتە قىزىقتى بولارىنا كۇمان كەلتىرمەيمىن. ەلىمىزدىڭ سپورتتىق تاريحىمەن جانە چەمپيوندارىمىزدىڭ جىگەرلى جەڭىسىمەن تانىسقان سوڭ بالالاردىڭ قاناتتاناتىنى ءسوزسىز», دەدى ۇوك باس ديرەكتورى ن.نوگەربەك.
ەكسپوزيتسياعا قويىلعان سپورتتىق بۇيىمدار كەلۋشىلەرگە وليمپيادالىق قوزعالىستى دامىتۋعا ارنالعان مەملەكەت باسشىسىنىڭ باستامالارىن, قازاقستاندىقتاردىڭ سالاماتتى ءومىر ءسۇرۋ سالتىن قولدانۋ ەرەجەلەرىن تۇسىندىرەدى. سونداي-اق ماتەريالدىڭ ءبىراز بولىگى ۇلتتىق وليمپيادا كوميتەتىنىڭ قۇرىلۋ تاريحى, ونىڭ حالىقارالىق وليمپيادا كوميتەتى (حوك) تاراپىنان مويىندالۋى جانە قازاقستاندىق سپورتشىلاردىڭ وليمپيا ويىندارىنداعى جەڭىسىنە ارنالعان. ەكسپوزيتسيانى تاماشالاۋشىلار حوك پرەزيدەنتتەرىنىڭ ەلباسىنا تارتۋ ەتكەن سىيلىقتارىن, ۇوك-ءنىڭ قۇرىلعانىنا 25 جىل تولۋىنا وراي تارتۋ ەتىلگەن سىيلىقتار مەن چەمپيوندارىمىزدىڭ مۇراعاتىنداعى جەكە زاتتاردى تاماشالاي الادى.
سونىمەن قاتار شارا اياسىندا سوچي وليمپياداسىنىڭ قولا جۇلدەگەرى دەنيس تەن «Silk Road» باعدارلاماسىنا كيگەن كيىم ۇلگىسىن ەكسپوزيتسياعا تارتۋ ەتتى. «قازاقستاننىڭ وليمپيادالىق قوزعالىسى» ەكسپوزيتسياسىنىڭ اشىلۋ سالتاناتىنا قاتىسقانىما قۋانىشتىمىن. شاراعا ءوز ۇلەسىمدى قوسۋ ءۇشىن سپورتتىق كيىمىمدى تابىس ەتتىم», دەيدى دەنيس تەن.
اتالعان ەكسپوزيتسيانىڭ باستى ەرەكشەلىگى – ينتەراكتيۆتى ايماق. ەكسپوزيتسيانى تاماشالاۋعا كەلگەن ءاربىر كورەرمەن زىلتەمىر كوتەرۋ ارقىلى ءوزىن سپورتشى رەتىندە سىناي الادى. سونداي-اق وليمپياداشىلاردىڭ مۇسىندەرىمەن سۋرەتكە ءتۇسىپ, تۇعىردا تۇرۋ ارقىلى ءوزىن چەمپيون رەتىندە سەزىنۋگە دە مۇمكىندىكتەرى بار.
