«بۇگىنگى كۇن سىزدەردىڭ ومىرلەرىڭىزدەگى تاريحي كۇن. اسكەري انت قابىلداي وتىرىپ, سىزدەر ءبىزدىڭ تاۋەلسىز قازاقستانىمىزدىڭ وتان قورعاۋشىلارى بولدىڭىزدار. ەل سەنىمىن اقتاۋ - ءاربىر اسكەري قىزمەتشىنىڭ قۇرمەتتى دە قاسيەتتى بورىشى. ەلىمىزدىڭ ءجۇز مىڭداعان ۇل-قىزدارى ۇلى وتان سوعىسى جىلدارىندا بىزدەرگە ۇلگى بولارلىق قايتالانباس, ماڭگى وشپەس ەرلىك كورسەتتى. بۇگىنگى تاڭدا بىزدەر باتىرلارىمىز - ساعادات نۇرماعامبەتوۆ, تالعات بيگەلدينوۆ, باۋىرجان مومىش ۇلى, ءاليا مولداعۇلوۆا, مانشۇك مامەتوۆا جانە تاعى دا باسقالاردىڭ ەسىمدەرىن ماقتانىشپەن ايتامىز. ولار دا وسىلاي وتانعا ادال بولۋعا انت قابىلداپ, ءوز اسكەري جاۋىنگەرلىك مىندەتتەرىن تاباندىلىقپەن ورىندادى. وسىناۋ باتىرلاردىڭ وتانعا دەگەن شەكسىز سۇيىسپەنشىلىكتەرى سىزدەر مەن بىزدەر ءۇشىن ناعىز ۇلگى, قۇرمەتتى جاۋىنگەرلەر», - دەدى 27943 اسكەري ءبولىمىنىڭ كومانديرى, پودپولكوۆنيك مۇرات اراپباەۆ ءوزىنىڭ قۇتتىقتاۋ سوزىندە.
سالتاناتتى شارا بارىسىندا شىعىس قازاقستان وبلىسى بويىنشا قارۋلى كۇشتەر ارداگەرلەرى كەڭەسىنىڭ توراعاسى, زاپاستاعى پودپولكوۆنيك توكەن ءبىلالوۆ, «شىعىس» وڭىرلىك قولباسشىلىعى اسكەرلەر قولباسشىسىنىڭ اتىنان پولكوۆنيك ۆيتالي بوريسوۆيچ پەن جاس ساربازدار اتا-انالارىنىڭ اتىنان ەرلان زاۋىربەكوۆتىڭ اناسى جانسايا اسقارقىزى مەن ءبىرجان نۇرجان ۇلىنىڭ اكەسى نۇرجان ابەن ۇلى قۇتتىقتاۋ ءسوز سويلەدى. قىزىلوردا وبلىسىنان شاقىرىلعان قاتارداعى ءبىرجان نۇرجان ۇلى جاس ساربازدار اتىنان لەبىزىن جەتكىزىپ, وفيتسەرلەر مەن سەرجانتتارعا العىسىن ايتتى.
ءماريا شايحيسلاموۆا سوناۋ قىزىلوردا وبلىسى شيەلى اۋدانى ءتاجىباي اۋىلىنان اسكەري انت قابىلداۋ ءراسىمىن كورۋگە ارنايى كەلىپتى. «بۇل – اسكەري بورىشىن وتەۋگە كەلگەن العاشقى نەمەرەم. تاياق ۇستاپ جۇرسەم دە كەلىپ وتىرمىن. كومانديرلەرىنىڭ ساربازدارعا دەگەن قامقورلىعىن كورىپ, كوڭىلىم ورنىنا ءتۇسىپ, قۋانىپ وتىرعان جايىم بار. نەمەرەمە ەلىن, جەرىن ابىرويمەن قورعاسىن دەگەن تىلەك ايتامىن. باسقا دا ساربازدارعا ساتتىلىك تىلەيمىن», - دەيدى 73 جاستاعى اپامىز.
مالىك سوزاقباەۆ نەمەرەسى تامەرلان شانشاروۆتىڭ انت قابىلداۋ راسىمىنە قاتىسۋ ءۇشىن الماتى وبلىسى قاپشاعاي قالاسىنان جەتىپتى. «اسكەري انت قابىلداۋ ءار ساربازعا زور جاۋاپكەرشىلىك جۇكتەيدى. ساربازدار قابىلداعان انتىنا بەرىك بولسىن دەيمىن. بابالارىمىز اق بىلەكتىڭ كۇشىمەن, اق نايزانىڭ ۇشىمەن قورعاعان جەرىمىزدى ابىرويمەن قورعاسىن دەيمىز. بۇل اسكەري ءبولىمنىڭ موتواتقىشتار باتالونىندا 1975-1977 جىلدارى ءوزىم دە اسكەري بورىشىمدى وتەگەنمىن. ارينە, ول كەزدە زامان باسقا ەدى. ودان بەرى قانشا جىل ءوتتى. قازىر ءبارى وزگەرگەن. ساربازدارعا بارلىق جاعداي جاسالعان», - دەيدى ول.
27943 اسكەري ءبولىمىنىڭ يدەولوگيالىق جۇمىستار, ارنايى ناسيحات جانە مەملەكەتتىك – قۇقىقتىق دايىندىق بويىنشا اعا وفيتسەرى, كاپيتان نۇرجان مالعاجداروۆ جاس ساربازداردى اسكەري ومىرگە بەيىمدەپ, ءار باعىتتاعى جاۋىنگەرلىك, ساپتىق دايىندىقتاردان وتكىزۋ اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى, پودپولكوۆنيك اسىل ەرعاليەۆكە جۇكتەلگەنىن ايتادى. «جيىن اكىمشىلىگىنىڭ وفيتسەرلەر مەن سەرجانتتار قۇرامى جاس ساربازداردى تاربيەلەپ, اسكەري قىزمەتتىڭ قىر-سىرلارىن ۇيرەتۋدە ءوز قىزمەتتىك مىندەتتەرىن دۇرىس اتقارا ءبىلدى. اتاپ ايتقاندا, مەملەكەتتىك ءتىل ساياساتىنىڭ جارقىن ۇلگىسى رەتىندە جيىن باسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, كاپيتان مۇرات ءسابيتوۆ ساربازدارعا اسكەري انت ءماتىنىن مەملەكەتتىك تىلدە جاتتاپ وقۋلارىن تالاپ ەتسە, سەرجانت دۋلات قادىربەكوۆ, 2 سىنىپتى سەرجانت نۇرلان قوراباەۆ اسكەري كوماندالاردى قازاقشا بەرىپ, ورىنداۋدى قولعا الدى», - دەيدى ول.
ءىس-شارا سوڭىندا جاس ساربازدار جەكە قۇرامى قىسقا مەرزىمدە وزدەرى مەڭگەرگەن قويان-قولتىق ۇرىس جاتتىعۋلارىنان قارۋمەن جانە ءبولىمنىڭ شتاب باتالونى بارلاۋ روتاسى جەكە قۇرامى جاۋىنگەرلىك ۇرىس, وقۋ-تاكتيكالىق جاتتىعۋلارىنان كورسەتىلىمدەردى جانە اسكەري وركەستر جەكە قۇرامى دەفەلەسىن قوناقتار نازارىنا تارتۋ ەتتى.
ازامات قاسىم,
«ەگەمەن قازاقستان»
وسكەمەن
سۋرەتتى تۇسىرگەن نۇرجان مالعاجداروۆ
