«قالانىڭ وڭ جاعالاۋىن ساياباق پەن گۇلزارلارعا بولەۋ ءبىز ءۇشىن وتە ماڭىزدى. ەسكى سۇرىلگەن ۇيلەردىڭ ايماعىن ءبىز كوممەرتسيالىق نىساندارعا بەرمەستەن (تۇرعىن ءۇي, مەيرامحانا, قوناق ءۇي), تۇرعىنداردىڭ ءوتىنىشى بويىنشا ول جەرلەرگە بالالار مەن ۇلكەندەرگە ارنالعان سپورت الاڭى بار گۇلزارلار مەن بۋلۆارلار سالامىز. وسى جىلى وڭ جاعالاۋدا 13 گۇلزار, كەلەسى جىلى 5 گۇلزار جايقالىپ تۇرماق.
بوتانيكالىق باق پەن لينەينىي ساياباعى, «اراي» ساياباعىن قايتا جوندەۋ جۇمىستارى اياقتالۋعا تاياپ قالدى. جالپى العاندا 18 وبەكتىگە 85 بالالار ويىن اتتراكتسيونى مەن 115 سپورت ترەناجەرى, 18 فۋتبول, باسكەتبول, تەننيس الاڭى, 17 كم ۆەلوجول, 30 فونتان كەشەنى, 12 كم جۇگىرۋ جولى, 2 سكەيت-الاڭ سالىنادى. وسىنىڭ ءبارى قالالىق ورتانىڭ ساپاسىن جاقسارتاتىنىنا سەنىمدىمىن», – دەدى اسەت يسەكەشەۆ جۇمىس بابىمەن قالا اۋماعىن ارالاۋ بارىسىندا.
استانا اكىمى جاۋاپتى تۇلعالارعا 1 شىلدە 2018 جىلعا دەيىن 7 ساياباق پەن گۇلزاردىڭ قۇرىلىسىن اياقتاۋدى, ال جىل سوڭىنا دەيىن التاۋىن, 2019 جىلى 5 گۇلزار مەن بۋلۆاردىڭ قۇرىلىسىنا كىرىسۋ كەرەكتىگىن تاپسىردى. وسى ايتىلعان ساياباقتار مەن گۇلزاردىڭ بارىنە 120 گەكتار جەر ءبولىندى.
وسى جانە كەلەسى جىلى استانادا سالىناتىن ءاربىر ساياباق پەن بۋلۆارلار بەلگىلى ءبىر ستيلمەن ورنەكتەلىپ, ارنايى تاقىرىپقا ساي جاسالىنادى. ەلوردانىڭ مەرەيتويى قارساڭىندا ءبىرجان سال كوشەسىندەگى № 5 ءۇيدىڭ ماڭايىنا سالىنىپ جاتقان گۇلزاردىڭ قۇرىلىسى اياقتالادى.
قۇرىلىس بارىسىندا گۇلزار «چەمودان ساياباعى» دەگەن اتاۋ الدى, سەبەبى ونىڭ اۋماعى تەمىر جول ۆوكزالىنان الىس ەمەس جانە شاعىن ارحيتەكتۋرالىق فورماسى چەمودان ۇلگىسىندە سالىنۋدا. اۆتوردىڭ ويىنشا مۇندا بالالار تەمىر جولى پايدا بولماق. سول سەبەپتى قۇرىلىسشىلار رەلستى توسەي باستادى.
تاعى ءبىر گۇلزار پۋشكين كوشەسىندە № 15 ب ءۇيىنىڭ ماڭايىندا سالىنىپ جاتىر, ونى «قىتاي قورعانى» دەپ اتايدى. مۇندا بالالار الاڭى مەن سپورت ترەناجەرلەرى ورناتىلادى. جەرگىلىكتى تۇرعىندار اتالمىش گۇلزاردا ۇلتتىق اسىق اتۋ ويىنىن دا ۇيىمداستىرا الادى.
تاعى ءبىر دەمالىس ورنى رەسپۋبليكا مەن دۇكەن ۇلى داڭعىلىنىڭ قيىلىسىندا سالىنىپ, «استرونومدار مەن عارىشكەرلەر گۇلزارى» دەگەن اتاۋعا يە بولادى. مۇندا سكەيتدروم, قوعامدىق تاماقتانۋ ورنى, ەيمس – ۇشجاقتى وپتيكالىق يلليۋزيادان جاسالعان قيسىق اينالار بولمەسى ورنالاسادى. گۇلزاردا توبەشىك سىرعاناقتار مەن بالالار الاڭشاسى دا ۇمىت قالمايدى.
2018 جىلدىڭ سوڭىنا دەيىن مايلين كوشەسى, № 9 ءۇيدىڭ جانىندا تاعى ءبىر گۇل باعى بوي كوتەرەدى. ونىڭ اۋماعىنا فۋتبول, باسكەتبول, بالالار ويىن الاڭى, ترەناجەر جانە اسىق وينايتىن ورىندار سالىنادى. سارىارقا داڭعىلى № 27 ءۇي اۋدانىندا تاستاردان جاسالعان گۇل باعى پايدا بولادى.
ساياباقتىڭ ىشىندە تاستار وتە كوپ, سىرتتاي قاراعاندا جاپوندىق تاس ساياباعىن ەسكە سالادى. بۇدان باسقا, گۇلزاردا ساۋدا پاۆيلوندارى, بالالار ويىن الاڭى, سپورت ترەناجەرلەرى دە قاراستىرىلادى. وسى اۋدانداعى № 23 ءۇيدىڭ ماڭايىنا دا ماتەماتيكالىق گۇلباق پايدا بولادى.
جوبا بويىنشا مۇندا شاحمات بۇرىشى, شەشىمىن تاپپاعان اللەيا, «سينۋسويد تاقتاسى», بالالار ويىن الاڭى, سپورت ترەناجەرى, ۆەلوسيپەدشىلەر تۇراعى قاراستىرىلدى. اباي داڭعىلىندا, سەمبينوۆ كوشەسىنەن ەگەمەن قازاقستان گازەتى كوشەسىنە دەيىن سالىناتىن بۋلۆارعا «تەاترلانعان» دەگەن اتاۋ بەرىلىپ, ول جەرگە امفيتەاتر سالىنادى.
اباي داڭعىلى بويىنشا كۇلتوبە كوشەسى ۋچاسكەسىنەن سەمبينوۆكە دەيىن, ەگەمەن قازاقستان گازەتىنەن بەيسەكباەۆ كوشەسىنە دەيىن ادەبيەت بۋلۆارى پايدا بولادى. بۇل بۋلۆاردىڭ سىرتتاي كورىنىسى كىتاپ سياقتى بولادى, ال تەرريتورياسىنا كىتاپ سورەلەرى مەن وقىرماندار ءۇشىن ورىندىقتار قويىلادى. بۋلۆاردا ويىن الاڭشالارى مەن سپورت ترەناجەرلەرى دە ورنالاستىرىلادى.
كەنەسارى كوشەسىندە ەگەمەن قازاقستان گازەتى كوشەسىنەن بەيسەكباەۆقا دەيىن قولدانبالى ونەر بۋلۆارى پايدا بولادى. مۇندا ۇستەل ويىندارى, سۋرەت سالاتىن قابىرعالار, بالالار ويىن الاڭشاسى قاراستىرىلعان. سونداي-اق ساۋدا پاۆيلوندارىنا دا رۇقسات بەرىلەدى.
2019 جىلى استانادا تاعى 4 گۇلزار مەن ءبىر بۋلۆار اشىلادى. ونىڭ ءبارى دە مولداعۇلوۆا كوشەسىندە پايدا بولادى. جوبانىڭ اۆتورى شاعىن ارحيتەكتۋرالىق فورمانى جانۋارلار مەن وسىمدىكتەر تۇرىندە ورنالاستىرىپ شىعادى. قالعان گۇلزارلار جەڭىس داڭعىلى, ەسەنبەرلين, جەلتوقسان كوشەلەرىندە جاسالادى. جاڭا بۋلۆار جەڭىس داڭعىلى قيىلىسى مەن جانگەلدين كوشەسىندە سالىنادى.
جوبالاۋ-سمەتالىق قۇجاتقا سايكەس, ساياباقتار مەن گۇلزارلاردا «1000 ورىن كوشە ساۋداسى» باعدارلاماسى بويىنشا ساۋدا ورىندارى بولىنەدى. وسى ماقساتتا كارىز, ينجەنەرلىك جانە سۋ وتكىزۋ جەلىلەرى, سۋعارۋ, جارىقتاندىرۋ, شاعىن ارحيتەكتۋرالىق فورما, گۇلدەر مەن تال-اعاشتار وتىرعىزىلادى.
2018 جىلى 386 مىڭ اعاش وتىرعىزىلادى, ونىڭ 208 مىڭى استانانىڭ جاسىل بەلدەۋىنە, تاعى 178 مىڭى – گۇلزار مەن ساياباقتاردان ورىن تابادى. وتكەن جىلى جالپى وتىرعىزىلعان اعاشتاردىڭ سانى – 312 مىڭ بولعان.
