مەملەكەت باسشىسىنىڭ بيىلعى حالىققا جولداۋىندا كاسىپكەرلىك جاڭا ەكونوميكانىڭ قوزعاۋشى كۇشى ەكەندىگى اتاپ ايتىلىپ, سالا قىزمەتكەرلەرىنەن جاڭاشىلدىقتى يگەرۋ مەن ەندىرۋگە قابىلەتتى توپ قالىپتاستىرۋ مىندەتتەلگەن ەدى. وسىعان وراي وڭىرلەردە اتالعان سالانى دامىتۋ جونىندە بىرىڭعاي بيۋدجەتتىك باعدارلاما ەنگىزۋ تاپسىرىلعان. جەتىسۋ جەرىندە جىل وتكەن سايىن شاعىن جانە ورتا كاسىپكەرلىكتى دامىتۋ ماقساتىنداعى جۇمىس جالعاسىن تاپسا, 2009 جىلى 235,3 مىڭ ادام جۇمىسپەن قامتىلىپ, وندىرىلگەن ءونىم مەن قىزمەت كورسەتۋدىڭ ادىستەرى جاقسارا ءتۇستى. شاعىن جانە ورتا كاسىپكەرلىك جوبالاردى نەسيەلەندىرۋ ماقساتىندا “دامۋ” قورىنان 1,5 ملرد., وبلىستىق بيۋدجەتتەن 550,0 ملن. تەڭگە ءبولىنىپ, قارجىلار قۇندى جوبالاردى جۇزەگە اسىرۋعا باعىتتالدى. وتكەن جىلى وبلىستىق بيۋدجەتكە تۇسكەن تولەمدەر 12,4 ملرد. تەڭگەنى قۇراپ, جوسپار اسىرا ورىندالدى.
كۇمىسجان بايجان, الماتى وبلىسى.
3 203 000 000 ەۋرازيالىق تابيعي رەسۋرستار كورپوراتسياسى — ENRC-ءتىڭ قۇرامىنا ەنەتىن “ەۋرازيالىق ەنەرگەتيكالىق كورپوراتسياسى” اق وتكەن جىلى وسىنشاما كيلوۆاتت-ساعات ەلەكتر قۋاتىن ءوندىردى. مۇنداي وندىرىستىك ناتيجەلەر كورپوراتسيانىڭ كومىر ءوندىرۋ باعىتىندا دا كورىنىپ, ول 4 ميلليون 636 مىڭ توننانى قۇرادى. جالپى, وبلىستاعى اقسۋ قالاسىندا ورنالاسقان “ەۋرازيالىق ەنەرگەتيكالىق كورپوراتسياسى” اق ءوزىنىڭ قۇرامىنا اقسۋ ەلەكتر ستانساسى, “شىعىس” كومىر كەنىشى جانە ءوندىرىستىڭ جوندەۋ بولىمشەسى سياقتى 3 قۇرىلىمدىق جۇيەنى بىرىكتىرەدى. وندىرىستە بۇل كۇندەرى 6702 ادام جۇمىس جاسايدى. قازىر كورپوراتسيا ينۆەستيتسيالىق باعدارلاما نەگىزىندە 1996 جىلى پايدالانۋدان شىققان №2 ەنەرگوبلوكتى قالپىنا كەلتىرۋ بويىنشا جوندەۋ جۇمىستارىن جۇرگىزۋدە. ەنەرگوبلوك ىسكە قوسىلعان سوڭ, ەلەكتر ستانساسىنىڭ قۋاتى 325 مۆت-عا دەيىن كوبەيەدى.
فاريدا بىقاي, پاۆلودار.
140 000 000 “بولاشاق” شاعىن اۋدانىندا جاقىندا اشىلعان ءبىر اۋىسىمدا 150 سىرقات قابىلدايتىن 3-ءشى قالالىق ەمحانانىڭ فيليالى وبلىستىق بيۋدجەتكە وسىنشاما قارجىعا ءتۇستى. ونىڭ قۇرىلىسىن “اقتوبە-ساۋلەت” جشس جۇرگىزدى. وسى ەمدەۋ-پروفيلاكتيكالىق مەكەمەسى “بولاشاق”, سونداي-اق 11 جانە 12 شاعىن اۋداندار تۇرعىندارىنا مەديتسينالىق قىزمەت كورسەتەدى. ەمحانادا حيرۋرگيالىق, ينفەكتسيالىق اۋرۋلار, فيزيوتەراپيا, دارىگەرگە دەيىنگى تەكسەرۋ, ەگۋ جانە ەمدەۋ بولمەلەرى, زەرتحانا, جىلجىمالى فليۋروگرافيا بار. ەمحانانىڭ بالالار بولىمشەسى بالالار دەنساۋلىعىن قورعاۋ ورتالىعىنىڭ ءرولىن اتقارادى. حالىققا مەديتسينالىق قىزمەت كورسەتۋ مەكەمەسى ەرەسەكتەر مەن بالالار ءۇشىن قاجەتتى وسى زامانعى دياگنوستيكالىق قوندىرعىلارمەن, بيوحيميالىق جانە گەماتولوگيالىق زەرتحانالارمەن جاراقتاندىرىلعان. شەتەلدىك وزىق تەحنولوگيالارمەن جۇمىس ىستەيتىن ماماندار ارنايى كۋرستاردان ءوتىپ, كاسىبي بىلىكتىلىگىن جەتىلدىرىپ كەلدى.
ساتىبالدى ءساۋىرباي, اقتوبە.
