ساپاعا ساي تولەم: 14 اقىلى ۋچاسكەدە تولەماقى قايتا ەسەپتەلەدى

«قازاۆتوجول» ۇلتتىق كومپانياسىنىڭ حابارلاۋىنشا, ەندى جولدىڭ اقاۋى انىقتالعان, شۇڭقىرى بار نەمەسە تالاپقا ساي ەمەس بولىكتەرى اقىلى قاشىقتىقتان ۋاقىتشا شىعارىلىپ تاستالادى. دەمەك, جۇرگىزۋشىلەر تەك قاۋىپسىز ءارى تەگىس جول ءۇشىن عانا تولەيدى. جولدىڭ اقاۋلى تۇستارى تولىق جوندەۋدەن وتكەنشە تاريفكە قوسىلمايدى.

بۇل شەشىم جول ساپاسىنا باقىلاۋدى كۇشەيتۋ جانە اۆتوكولىك يەلەرىنىڭ قۇقىعىن قورعاۋ ماقساتىندا قابىلدانعان.

بيىل اقىلى جولداردان 79 ملرد تەڭگە ءتۇستى

تولەماقى قالاي ەسەپتەلەدى؟

ەڭ باستى ارتىقشىلىق – جۇرگىزۋشىلەرگە مەكەمە تابالدىرىعىن توزدىرىپ ءوتىنىش جازۋدىڭ نەمەسە قۇجات تولتىرۋدىڭ قاجەتى جوق.

• اۆتوماتتى ەسەپتەۋ: تولەم جۇيەسى جولدىڭ اقاۋلى بولىكتەرىن اۆتوماتتى تۇردە انىقتاپ, ونى جالپى سومادان شەگەرىپ تاستايدى.

• تومەندەتىلگەن تاريف: ناتيجەسىندە جول ءجۇرۋ قۇنى بۇرىنعىدان ەداۋىر ارزاندايدى.

ماسەلەن, بۇرىن استانا – تەمىرتاۋ باعىتىندا جەڭىل كولىك ءۇشىن تولەم 410 تەڭگە بولسا, اقاۋلى بولىكتەر ەسەپتەن شىعارىلعاننان كەيىن بۇل سوما 360 تەڭگەگە دەيىن تومەندەدى.

قازاقستاندا 13 مىڭ شاقىرىم اۆتوجول جوندەلدى

جوندەۋ جۇمىستارى قاشان باستالادى؟

ءتاريفتى وسىلايشا ۋاقىتشا تومەندەتۋ اقاۋلار تولىق جويىلعانعا دەيىن ساقتالادى. جولداردى قالپىنا كەلتىرۋ جۇمىستارى بيىلعى جول-قۇرىلىس ماۋسىمى باستالىسىمەن قولعا الىنادى.

تولەم مولشەرى قايتا ەسەپتەلەتىن 14 ۋچاسكە:

1. كوكشەتاۋ – پەتروپاۆل;

2. پاۆلودار – سەمەي – قالباتاۋ;

3. پاۆلودار – ومبى;

4. استانا – تەمىرتاۋ;

5. الماتى – قوناەۆ;

6. قوناەۆ – تالدىقورعان;

7. شىمكەنت – قىزىلوردا;

8. ورال – سامارا;

9. ورال – ساراتوۆ;

10. استانا – پاۆلودار;

11. قىزىلوردا – ارال;

12. اقتوبە – ورىنبور;

13. قوستاناي – ترويتسك;

14. تاراز – قاينار.