وسى ورايدا جاسوسپىرىمدەر اراسىندا قۇقىق بۇزۋشىلىقتىڭ الدىن الۋ, ولاردىڭ قۇقىقتىق ساۋاتتىلىعىن ارتتىرۋ, سالاۋاتتى ءومىر سالتىن ناسيحاتتاۋ مەن قوعامدىق ورىندارداعى قاۋىپسىزدىك ماسەلەلەرىنە وراي الماتى پوليتسەيلەرى №73 مەكتەپ-گيمنازياسى بازاسىندا ء«جاسوسپىرىم جانە زاڭ» العاشقى ۆەبينارىن وتكىزدى. الماتى قالاسىنىڭ ءبىلىم باسقارماسى مەن جپق جاسوسپىرىمدەر ءىسى بويىنشا پوليتسيا قىزمەتىنىڭ ۇيىمداستىرۋىمەن وتكەن ونلاين-شاراعا «نۇر وتان» پارتياسىنىڭ, دەنساۋلىق سالاسى مەن ۇكىمەتتىك ەمەس ۇيىمداردىڭ وكىلدەرى شاقىرىلعان.
«ساندىق قازاقستان» باعدارلاماسى اياسىندا العاشقى رەت وتكىزىلىپ وتىرعان بۇل شارا جاسوسپىرىمدەردىڭ قۇقىقتارى مەن مىندەتتەرىنە دەگەن جاۋاپكەرشىلىگىن ارتتىرۋعا باعىتتالىپ وتىر. جاڭا سيپاتتا وتكەن شاراعا جاسوسپىرىمدەر عانا ەمەس, ۇستازدار مەن پوليتسيا قىزمەتكەرلەرى دە قىزىعۋشىلىق بىلدىرۋدە. بۇگىندە مەكتەپ وقۋشىلارى مەن ستۋدەنتتەردىڭ اقپارات پەن كوممۋنيكاتسيالىق جۇيەلەرگە دەگەن ىنتاسى جوعارى. وسى ورايدا ولاردى دۇرىس باعىتقا قاراي بۇرۋ قاجەتتىلىگى تۋىندايدى. جاسوسپىرىمدەردىڭ ينتەرنەت كەڭىستىگىندە اداسىپ كەتۋىنىڭ الدىن الۋدا اقپاراتتىق ءتارتىپتى ساقتاۋ قاجەتتىلىگىن ءتۇسىندىرۋ قاجەت. الماتى قالاسىنىڭ جاسوسپىرىمدەر ءىسى بويىنشا پوليتسيا قىزمەتى مەن ءبىلىم باسقارماسىنىڭ شاراسى اياسىندا ۇكىمەتتىك ەمەس ۇيىمدارمەن, قوعامدىق بىرلەستىكتەر جانە جاستار قوزعالىسىمەن بىرلەسىپ, ينتەرنەت جانە الەۋمەتتىك جەلىلەردىڭ كەرى ىقپالىن ازايتۋعا بايلانىستى ساراپتامالار جۇرگىزۋمەن قاتار, وسى باعىتتاعى بىرلەسكەن ءىس-شارالار ءجيى ۇيىمداستىرىلۋدا.
ەلۆيرا سەرىكقىزى,
«ەگەمەن قازاقستان»
الماتى
