ەۋروپا تورىندەگى ونەر سايىسىنا بارعان «نۇرشاشۋ» بي ءانسامبلىنىڭ ونەرلى قىزدارى ۇلتتىق بي مانەرىندەگى شىعارمالارىمەن كورەرمەندەردىڭ كوزايىمىنا اينالىپ, جۇلدەلى ەكىنشى ورىندى جەڭىپ الدى. بۇل فەستيۆالدا ناعىز جۇزدەن جۇيرىك, مىڭنان تۇلپارلار عانا باق سىنادى.
«وچەروۆانيە بوگەمي» اتتى بالالار مەن جاسوسپىرىمدەر شىعارماشىلىعىنىڭ بەدەلدى حالىقارالىق فەستيۆالى 2005 جىلدان بەرى ۇيىمداستىرىلىپ كەلەدى. وسى جولى ونەر سايىسىنا الەمنىڭ جەتى مەملەكەتىنەن 250-گە تارتا ءجاسوسپىرىم قاتىسقان. ولاردىڭ ىشىندە رەسەي, وزبەك- ستان, ليتۆا, چەحيا سىندى ەلدەر بار. قازاقستاننىڭ نامىسىن قورعاعان «نۇرشاشۋ» قىزدار بي ءانسامبلى 12 جىلدان بەرى ۇمىتتەرىن ۇكىلەپ كەلەدى ەكەن. بۇل جولعى جەڭىس سونىڭ ناتيجەسى.
توپتىڭ كوركەمدىك جەتەكشىسى مانشۇك مۇساەۆانىڭ ايتۋىنشا, اتالمىش فەستيۆال بالالاردىڭ وي-ءورىسىنىڭ وسۋىنە دە, ەل كورىپ, جەر كورىپ, تالانتىنىڭ ۇشتالۋىنا دا سەپتىگىن تيگىزدى. «جەتى مەملەكەتتىڭ ىشىندە ەكىنشى ورىن الۋ – ءبىز ءۇشىن ۇلكەن جەتىستىك. الداعى ۋاقىتتا بۇدان دا بيىك بەلەستەردى باعىندىراتىنىمىز ءسوزسىز. مەن وسى ارادا ءبىلىم ۇياسىنىڭ باسشىسىنا, ۇجىم مۇشەلەرىنە ەرەكشە ريزالىعىمدى بىلدىرگىم كەلەدى. ايرانداي ۇيىعان ورتانىڭ بەرەكە-بىرلىگى بولماسا, مۇنداي جەڭىس تۇعىرىنان كورىنۋىمىز ەكىتالاي ەدى», دەيدى ول.
ميراس اسان,
«ەگەمەن قازاقستان»
