مەرەيتوي سالتاناتى وتكەن كەنشىلەر مادەنيەت سارايى ونەرسۇيەر قاۋىمعا لىق تولدى. ءانسامبلدى قۇرىپ, العاشقى كۇنىنەن جەتەكشىلىك ەتىپ كەلە جاتقان گۇلنار وماروۆا مەن ونەرپازداردى وبلىستىڭ مادەنيەت, مۇراعات جانە قۇجاتتاما باسقارماسىنىڭ باسشىسى ەركەبۇلان اعىمباەۆ ارنايى قۇتتىقتادى. سونىمەن قاتار وبلىس اكىمى ەرلان قوشانوۆ پەن وبلىستىڭ ءبىلىم باسقارماسىنىڭ باسشىسى ەسەنعازى يمانعاليەۆتىڭ قۇتتىقتاۋلارى وقىلدى.
ءانسامبلدىڭ بۇل كۇندە قالىپتاسقان وزىندىك ءستيلى, باي رەپەرتۋارى بار. 1998 جىلدىڭ وزىندە «ۇلگىلى» دەگەن اتاققا يە بولعان ۇجىم وبلىستىڭ, ءتىپتى ەلىمىزدىڭ شەگىنەن اسىپ, بىرقاتار شەت مەملەكەتتەرگە تانىلىپ ۇلگەرگەن. انسامبل مۇشەلەرىنىڭ جاسى 5 پەن 23 جاس ارالىعىندا. بي ساباقتارى ونەرپازداردىڭ جاسىنا قاراي بىرنەشە توپقا ءبولىنىپ جۇرگىزىلەدى. وسى ۇجىمدا بي بيلەگەن ونەرپازداردىڭ سانى 400-دەن اسىپ كەتكەن. وسى شيرەك عاسىر ىشىندە قاراعاندى وبلىسىنداعى اۋقىمدى شارالاردىڭ قاي-قايسىسى دا «شولپان» ءانسامبلىنىڭ قاتىسۋىمەن وتكەن.
ونەر ۇجىمى ءتۇرلى دەڭگەيدەگى سايىستارعا ءجيى قاتىسىپ, ۇنەمى جۇلدەلى ورىنداردان كورىنەدى. الداعى جازدا انسامبل مۇشەلەرىنىڭ ءبىر توبى گرۋزيادا, ەكىنشى ءبىر توبى بۋرابايدا وتەتىن ونەر باسەكەسىنە قاتىسپاق. ءبىر «اتتەگەن-ايى» – وسىنداي بايقاۋلارعا بارىپ-قايتۋ شىعىنىن كوبىنەسە ونەرپاز بالالاردىڭ وزدەرى, ياعني ولاردىڭ اتا-انالارى كوتەرەدى. جەرگىلىكتى باسقارمالار مەن كونتسەرتتىك بىرلەستىك دايىن ۇجىمدى ءتۇرلى شارالاردى اتقارىسۋعا قۋانا شاقىرعانىمەن, قارجىلاي قولداۋعا كەلگەندە قاۋقارسىز. ءانسامبلدىڭ تەك شەتەلدەرگە ساپارلارىنا كەيدە مادەنيەت جانە سپورت مينيسترلىگى كومەكتەسەدى.
«شولپان» ۇلگىلى حورەوگرافيالىق ءانسامبلى ءالى كۇنگە №39 گيمنازيانىڭ عيماراتىندا جۇمىس ىستەپ كەلەدى. بىراق گۇلنار مەڭدىبايقىزى ءوز ۇجىمىمەن بىرگە وڭىرگە قانشا ەڭبەگى ءسىڭىپ وتىرسا دا, وسى ونەر ۇجىمىنان قاناتتانعان ءوزىنىڭ ەكى قىزى جاقىندا استانادان «شولپاننىڭ» فيليالىن اشىپتى. قانات جايدى دەگەنىڭىز وسى عوي. ءانسامبلدىڭ رەپەرتۋارى ۇنەمى تولىقتىرىلىپ, جاڭارتىلىپ وتىرادى. ۇجىمنىڭ ەۋروپا مەن ازيانىڭ ءتۇرلى فەستيۆالدارى مەن بايقاۋلارىندا جەڭىپ العان التىن مەدالدارى مەن گران-پري جۇلدەلەرى بارشىلىق. ون شاقتى بالادان قۇرالعان شاعىن عانا مەكتەپ ۇيىرمەسىنەن وسىنداي دەڭگەيدەگى ۇلگىلى انسامبلگە اينالعان باسقا ۇجىم ەلىمىزدە جوق تا شىعار.
مەرەيتوي كەشىندەگى قۇتتىقتاۋلار «شولپان» ۇلگىلى بي ءانسامبلىنىڭ كونتسەرتىنە ۇلاستى. ونەرپازداردىڭ بىرنەشە بۋىنىن تاربيەلەپ, ءداستۇرلى ونەر مەكتەبىنە اينالعان ۇجىمعا ءبىز دە ۇلكەن شىعارماشىلىق تابىستار تىلەيمىز!
قايرات ءابىلدا,
«ەگەمەن قازاقستان»
قاراعاندى
