قىتاي مەن ەاەو كەلىسىمگە كەلدى
قىتاي مەن ەۋرازيالىق ەكونوميكالىق وداق ساۋدا-ەكونوميكالىق ارىپتەستىك ورناتۋ جونىندە ورتاق مامىلە جاسادى. Xinhua اگەنتتىگىنىڭ حابارلاۋىنشا, بۇل – ەكى تاراپ اراسىندا جاسالعان كەڭ كولەمدەگى تۇڭعىش كەلىسىم.
قۇجاتقا قىتايدىڭ كوممەرتسيا ءمينيسترىنىڭ ورىنباسارى فۋ تسزىين, ەۋرازيالىق ەكونوميكالىق كوميسسيانىڭ باسقارما توراعاسى تيگران سارگسيان جانە ەاەو مۇشەلەرى قول قويدى. وعان استانا ەكونوميكالىق فورۋمى اياسىندا قول جەتكىزىلدى.
كەلىسىم كەدەندىك ارىپتەستىك, ساۋدا بايلانىسى, زياتكەرلىك مەنشىك قۇقىعى, سالالىق سەرىكتەستىك سەكىلدى 13 باعىتقا ارنالعان. سونداي-اق قۇجاتتا ەلەكتروندى كوممەرتسيا ءتارىزدى جاڭا سالالار قامتىلعان.
بۇدان بولەك, قىتاي مەن ەاەو كەدەندىك باقىلاۋ ۇدەرىستەرىن جەڭىلدەتۋدى, تاۋارعا سالىناتىن سالىقتى ازايتۋعا قول جەتكىزىپ, ارىپتەستىك ورناتا وتىرىپ, اقپارات الماسۋ جونىندە ۋاعدالاستى. بۇل كەلىسىم 2019 جىلدىڭ باسىنان ىسكە قوسىلماق.
Xinhua اگەنتتىگىنىڭ پايىمداۋىنشا, قۇجات ء«بىر بەلدەۋ – ءبىر جول» باستاماسى اياسىندا جۇزەگە اسىرىلاتىن ماڭىزدى قادام. كەلىسىمگە سايكەس, ەكى تاراپ اراسىنداعى ارىپتەستىك نىعايىپ, ساۋدا-ەكونوميكالىق بايلانىس كۇشەيىپ, تاۋار اينالىمى ارتادى.
اگەنتتىكتىڭ مالىمەتتەرىنە سۇيەنسەك, تاۋارعا سالىناتىن قوسىمشا سالىقتاردىڭ جويىلۋى يندۋستريالىق دامۋ مەن ساۋدا-ەكونوميكالىق قاتىناستى كۇشەيتەتىن قولايلى ورتا قالىپتاستىرادى.
جاھاندىق ماسەلەلەردى تالقىلايتىن جيىن
قازاقستاندا استانا ەكونوميكالىق فورۋمى ءوتتى. ءۇش كۇنگە سوزىلعان سامميتتە ساياساتكەرلەر, عالىمدار مەن ساراپشىلار الەمدىك ترەندتەرگە ىلەسۋ, ونىڭ الەم مەن قازاقستانعا اسەرى تۋرالى كوكەيكەستى ماسەلەلەردى تالقىلادى. «قازاقستان پرەزيدەنتى نۇرسۇلتان نازارباەۆ استانا ەكونوميكالىق فورۋمىنىڭ اشىلۋ سالتاناتىندا «الەم تەڭدەسسىز جىلدامدىقپەن وزگەرىپ, تاعى دا جولايرىققا تاپ كەلدى. ادامزات قاي باعىتقا بۇرىلۋدى كۇتىپ وتىر: دامۋدىڭ ءداۋىرى مە, الدە قۇردىمعا كەتۋ مە», دەدى. جيىنعا كەلگەن بەس جۇزگە جۋىق عالىم مەن ساياساتكەر, ەكونوميست پەن باسقا سالا وكىلدەرى جۇزگە جۋىق پانەلدى سەسسيا مەن دوڭگەلەك ۇستەلگە قاتىستى», دەپ حابارلادى EFE اگەنتتىگى.
اگەنتتىك فورۋم جۇمىسىنا الەمگە ايگىلى بىرقاتار تۇلعالاردىڭ كەلگەنىنە دە توقتالعان. اتاپ وتەر بولساق, اۋقىمدى جاھاندىق شاراعا Apple كومپانياسىنىڭ نەگىزىن سالۋشىلاردىڭ ءبىرى ستيۆ ۆوزنياك, فرانتسيانىڭ بۇرىنعى پرەزيدەنتى فرانسۋا وللاند, بۇۇ-نىڭ بۇرىنعى باس حاتشىسى پان گي مۋن, اتاقتى فيزيك ميتيو كاكۋ قاتىستى, دەلىنگەن اگەنتتىكتىڭ جاريالانىمىندا.
يرانمەن مامىلە جاساستى
ەۋرازيالىق ەكونوميكالىق وداق پەن يران استانادا ەكونوميكالىق فورۋم اياسىندا ەكىجاقتى يمپورت جانە ەكسپورت تاريفىن جويۋعا مۇمكىندىك بەرەتىن ەركىن ساۋدا ايماعىن قۇرۋ تۋرالى كەلىسىم جاساستى. Latin American Herald Tribune گازەتىنىڭ اقپاراتىنا سۇيەنسەك, قۇجاتتىڭ قىزمەت ەتۋ مەرزىمى – ءۇش جىل. «يران تاراپى الىپ ەكونوميكالىق ۇيىمنىڭ ارىپتەسى بولدى. كەلىسىم بۇكىل ايماققا جەمىستى بولماق», دەدى يراننىڭ ونەركاسىپ جانە ساۋدا ءمينيسترى موحامماد شارياتماداري.
رەسەي, قازاقستان, بەلارۋس, ارمەنيا جانە قىرعىزستاننان قۇرىلعان ەۋرازيالىق ەكونوميكالىق وداق بۇعان دەيىن ۆەتنام جانە قىتاي سەكىلدى مەملەكەتتەرمەن ەركىن ساۋدا جونىندە كەلىسىم جاساسقان بولاتىن», دەپ حابارلادى Latin American Herald Tribune.
باسىلىمنىڭ حابارلاۋىنشا, شارياتماداري جىلىنا 20 ميلليارد دوللارعا جۋىق ەكسپورت شىعاراتىن يران مەملەكەتى ەاەو ءۇشىن ءتيىمدى ارىپتەس ەكەنىن مالىمدەگەن. مينيستر قۇجاتتىڭ تاراپتار اراسىنداعى ساۋدا بايلانىسىن نىعايتىپ, ەكونوميكانى تۇراقتاندىرۋعا كومەكتەسەتىنىنە سەنىم بىلدىرگەن.
ەۋرازيالىق ەكونوميكالىق كوميسسيانىڭ باسقارما توراعاسى تيگران سارگسيان دا يران مەن ەاەو اراسىنداعى كەلىسىمنىڭ ماڭىزى زور ەكەنىن ايتىپ وتىر. ونىڭ پىكىرىنشە, بۇل – ەكونوميكالىق قارىم-قاتىناس ورناتۋعا باعىتتالعان العاشقى قادام. «يران نارىعى وتە ۇلكەن جانە تەز دامىپ كەلەدى. سوندىقتان بىزدەگى بيزنەس كوشباسشىلارى اتالعان ەلگە قىزىعۋشىلىق تانىتىپ وتىر», دەدى ت.سارگسيان.
Latin American Herald Tribune باسىلىمى ساۋدا كەلىسىمى يران ءۇشىن تاعدىرشەشتى ساتكە تۋرا كەلگەنىن حابارلادى. ەستەرىڭىزدە بولسا, وسىدان ءبىر اپتا بۇرىن اقش تاراپى يران مەن يادرولىق دەرجاۆالار اراسىنداعى كەلىسىمنەن شىعاتىنىن مالىمدەگەن بولاتىن. سونداي-اق يرانعا سالىناتىن سانكتسيانى كۇشەيتەتىنىن جەتكىزدى.
شولۋدى دايىنداعان اباي اسانكەلدى ۇلى,
«ەگەمەن قازاقستان»
