جيىندا يۋنەسكو حاتشىلىعىنىڭ حالىقارالىق بايلانىستار دەپارتامەنتىنىڭ ديرەكتورى گەنتس سەيتي ءسوز الىپ, ءىس-شاراعا قاتىسۋشىلاردى قۇتتىقتاي كەلە قازاق تىلىندە «قوش كەلدىڭىز!» دەدى.
«قازىرگى تاڭدا تۇركى تىلدەرى الەمنىڭ باسقا تىلدەرى سەكىلدى بىرقاتار سىناق الدىندا تۇر. تەحنولوگيالىق ءتىلدىڭ جەدەل دامۋى قوعام اراسىنداعى بايلانىستى كەڭەيتىپ, ءبىلىمىمىزدى ۇلعايتا ءتۇستى. ناتيجەسىندە تسيفرلى تەحنولوگيانىڭ ءتىلى عىلىمي, مادەني ورتادا كەڭىنەن پايدالانىلىپ كەلەدى. وسى تۇرعىدان العاندا يۋنەسكو عالىمداردى, زەرتتەۋشىلەردى جانە تاريحشىلاردى قولداۋدا ۇلكەن ءرول اتقارىپ كەلەدى», دەدى گ.سەيتي.
يۋنەسكو وكىلىنىڭ پايىمداۋىنشا, جاھاندانۋدىڭ ارقاسىندا شارتاراپتىڭ كەز كەلگەن بۇرىشىنداعى داۋىس ەستىلەدى ءھام قۇرمەتتەلەدى. ويتكەنى ءتىل ءبىر ۇلتتىڭ الەۋمەتتىك قۇندىلىقتارى مەن بىرەگەيلىگىن كورسەتەتىن بىردەن-ءبىر قازىنا.
«حالىقتاردىڭ وزىنە ءتان مادەني ەرەكشەلىكتەرى بولماعان جاعدايدا بەيبىتشىلىك ورناۋى قيىن. ال ءار ۇلتقا ءتان باستى بىرەگەيلىك – ونىڭ ءتىلى. وزدەرىڭىز بىلەتىندەي, يۋنەسكو مادەني ءار الۋاندىقتى ساقتاپ قالۋعا ارنالعان «مادەنيەت سالاسىنداعى ساياساتتى رەفورمالاۋ» دەپ اتالاتىن جوبانى باستادى. بۇل شارا الەمدە مادەني قۇندىلىقتاردى قايتا قاراۋعا ارنالعان. ماسەلەن, وسى جوبا اياسىندا ادامزاتقا ورتاق تۇلعالاردىڭ مەرەيتويلارىن تويلايمىز», دەدى گ.سەيتي.
سونداي-اق ماعجان جۇماباەۆتىڭ 125 جىلدىعى مەن شىڭعىس ايتماتوۆتىڭ 90 جىلدىعىنا ارنالعان ءىس-شارالار ارقىلى جەرگىلىكتى حالىقتىڭ جازۋ جانە اۋىز ادەبيەتىن جان-جاقتى ۇعىنۋعا مۇمكىندىك تۋعانىن مالىمدەدى.
اباي اسانكەلدى ۇلى,
«ەگەمەن قازاقستان» – پاريج
سۋرەتتى تۇسىرگەن فيزۋلي مەدجيدلي
