پاريج تورىندە تۇڭعىش رەت ۇيىمداستىرىلعان بۇل فورۋمنىڭ ماڭىزى زور. اسىرەسە, جيىندا يۋنەسكو–نىڭ شتاب–پاتەرىندە تۇركولوگيا سالاسىنىڭ وزەكتى ماسەلەلەرىنىڭ وسىلايشا العاش رەت تالقىلانۋى كوڭىلگە جىلىلىق ۇيالاتتى. مۇنداي شارالار بولاشاقتا دا جالعاسىن تاۋىپ, ءتۇبى ءبىر تۇركى حالىقتارىنىڭ وكىلدەرى وسىنداي القالى جيىنداردا ءالى تالاي كەزدەسەدى دەپ ويلايمىز.
سونداي-اق فورۋم بارىسىندا ىرگەلى ۇيىمنىڭ رەسمي تىلدەرىمەن قاتار تۇركى تىلدەرىنە دە اۋدارما جاسالۋىن جاعىمدى جاڭالىق رەتىندە قابىلداندى. بۇل دا ءوز كەزەگىندە العاش رەت بولىپ وتىرعان تاريحي وقيعا. سانى از تۇركى حالىقتارىنىڭ ءۇنى يۋنەسكو-دا ەستىلۋى جويىلۋ قاۋپى بار تۇركى تىلدەرىنىڭ قايتا جاندانۋىنا سەبەپ بولىپ, ءۇمىت وتىن جاعاتىنى انىق.
فورۋم جۇمىسى اياسىندا تۇركى الەمىنە ەڭبەگى سىڭگەن تۇلعالار ۇمىت قالعان جوق. جيىننان ءبىر كۇن بۇرىن قاتىسۋشىلار مۇستافا شوقايدىڭ ەسكەرتكىشىنە گۇل شوقتارىن قويعان بولاتىن.
ءىس-شاراعا قازاقستاننىڭ فرانتسياداعى توتەنشە جانە وكىلەتتى ەلشىسى ج.عاليەۆ, حالىقارالىق تۇركى اكادەمياسىنىڭ توراعاسى د. قىدىرالى, نوجان-سيۋر-مارن (فر. Nogent-sur-Marne) قالاسىنىڭ مەرى جان جاك پول مارتان قاتىستى.
جيىندا ەلشى ج.عاليەۆ پاريج شاھارىنىڭ مەرىنە ەكى ەل اراسىنداعى قارىم-قاتىناستى نىعايتۋعا قوسقان ۇلەسى ءۇشىن «قازاقستان ديپلوماتياسىنا 25 جىل» مەدالىن تاقتى. سونداي-اق حالىقارالىق تۇركى اكادەمياسى اتىنان ارنايى سىيلىق تابىستالدى. پول مارتاننىڭ ايتۋىنشا, بۇل – وعان كورسەتىلگەن زور قۇرمەت.
«بۇگىن مۇستافا شوقايدىڭ پاريجدەگى بيۋستىنە گۇل شوقتارىن قويۋ ءۇشىن جينالدىق. وسىنداي ىرگەلى شاراعا قاتىسۋ مەن ءۇشىن ۇلكەن قۇرمەت. م.شوقاي فرانتسيادا ۋاقىتىنىڭ ءبىراز بولىگىن وتكىزدى. سوندىقتان وعان ءمۇسىن قويۋ بىزگە ابىروي بولاتىن. بۇل – ءبىز ءۇشىن قازاقستاننىڭ پاريجدەگى كىشىگىرىم بولىگى. وسىنداي ەسكەرتكىش ورناتۋعا اتسالىسقانى ءۇشىن قازاقستان ەلشىلىگىنە العىس ايتامىن. فرانتسيا مەن قازاقستان اراسىنداعى قارىم-قاتىناستىڭ بۇدان ءارى نىعايا تۇسەتىنىنە سەنىمىم مول», دەدى قالا مەرى.
بۇدان كەيىن جيىنعا قاتىسۋشىلار ازەربايجان دەموكراتيالىق حالىق رەسپۋبليكاسىنىڭ نەگىزىن قالاۋشىلاردىڭ ءبىرى, تۋعانىنا 155 جىل تولعان اليماردان توپچىباشىنىڭ پاريجدەگى بەيىتىنە ارنايى بارىپ, گۇل شوقتارىن قويدى. جيىندا مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ ءسوز سويلەپ, شارانىڭ ماڭىزدىلىعىنا توقتالىپ ءوتتى. سونداي-اق ءىس-شارادا حالىقارالىق تۇركى اكادەمياسىنىڭ «ۆيلگەلم تومسون» مەدالى كورنەكتى تۇركولوگ-عالىمدار, پروفەسسورلار لارس يوحانسون, يگور كورمۋشين, وسمان فيكري سەرتكايا, كادىرالى كونكوباەۆ, يگور كىزلاسوۆقا تابىستالدى.
قورىتا ايتقاندا, ءپاريجدىڭ قاق تورىندە وتكەن شارا تۇركى الەمىنىڭ تاتۋلىعى مەن بىرلىگىنە ءوز ۇلەسىن قوساتىنى انىق. اتا-بابالارىمىز ماڭگىلىك تاسقا قاشاپ جازىپ كەتكەندەي «مىڭ جىلدىق, تۇمەن كۇندىك بىلىگىمىز بەن بەلگىمىز» بولسىن دەگەن ىزگى دە ىقىلاستى نيەتى وسىلايشا مەرەيلى جيىنمەن جالعاسىن تاپتى.
اباي اسانكەلدى ۇلى,
«ەگەمەن قازاقستان» – پاريج
سۋرەتتى تۇسىرگەن فيزۋلي مەدجيدلي
