حالىقارالىق كورمەگە يتالياندىق شىنى ارلەۋشى دجوردجيو سپەتستسامونتي, سۋرەتشى سۆەتلانا كوستا, يتالياندىق سۋرەتشىلەردىڭ قازاقستانداعى رەسمي وكىلى قۇرالاي سقاقوۆا جانە «اسىل-ديزاين» ءسان ءۇيىنىڭ باس ديزاينەرى ايدارحان قاليەۆ قاتىستى.
اتالعان كورمەنى جامبىل وبلىسى اكىمى اپپاراتىنىڭ باسشىسى نۇرجان كالەندەروۆ ءسوز سويلەپ اشىپ, قازاقستان مەن يتاليا شەبەرلەرىن مادەنيەت پەن ونەر ارقىلى بىرىكتىرىپ, تىعىز ىنتىماقتاستىقتىڭ جەمىسى رەتىندە ۇيىمداستىرىلىپ وتىرعان شارانىڭ ماڭىزىنا توقتالدى. بۇدان سوڭ شەتەلدىك قوناقتارعا قازاقى ءداستۇر بويىنشا سىي-سياپاتتار تابىستالدى. ءوز كەزەگىندە يتاليالىق اتاقتى شىنى ارلەۋشى دجوردجيو سپەتستسامونتي مەن سۋرەتشى سۆەتلانا كوستا ءسوز سويلەپ, كونە تاراز جەرىندە ۇيىمداستىرىلىپ وتىرعان كورمەگە ريزاشىلىعىن ءبىلدىردى. سونىمەن قاتار دجوردجيو سپەتستسامونتي ۆەنەتسيا شىنىسىنان جاسالعان «قىزعالداق» تۋىندىسىن جانە سۆەتلانا كوستا استانا قالاسىن بەينەلەگەن كارتيناسىن جامبىل وبلىستىق تاريحي-ولكەتانۋ مۋزەيىنە تارتۋ ەتتى. كورمە بارىسىندا جەرلەسىمىز, «اسىل-ديزاين» ءسان ءۇيىنىڭ باس ديزاينەرى جانە «نەو-فولكلور» ءستيلىنىڭ نەگىزىن سالۋشى ايدارحان قاليەۆ كيىم توپتامالارىنان دەفيلە كورسەتىلىمىن كوپشىلىككە ۇسىندى.
كورمەگە كەلۋشىلەر يتالياندىق ايگىلى شىنى جاساۋ شەبەرى پينو سينورەتتونىڭ, امەريكا مەكتەبىنىڭ وكىلى, شىنى شەبەرى ءارى ديزاينەر شەنگ كارينا سەسيليانىڭ شىنى بۇيىمدارىنان جاسالعان جادىگەرلەرىمەن قوسا, دجوردجيو سپەتستسامونتيدىڭ ۆەنەتسيالىق شىنىدان جاسالعان, قازاقتىڭ ۇلتتىق ويۋ-ورنەكتەرىمەن ورنەكتەلىپ, التىنمەن اپتالعان ۆازاسى مەن قىزىل كامزول بەينەسىمەن كومكەرىلگەن ءارى كۇمىسپەن كۇپتەلگەن ىدىستارىن, سونداي-اق الەمگە ايگىلى استانا قالاسىن بەينەلەگەن سۆەتلانا كوستانىڭ «جاڭا قالانىڭ كۇن شۋاعى», «تۇنگى استانا وتتارى», «الەم قۇسى» تۋىندىلارىن تاماشالادى. كورمە بارىسىندا يتالياندىق قوناقتارعا كونە تاراز ولكەسىنىڭ تاريحي ورىندارى تانىستىرىلىپ, ايشا ءبيبى, بابادجا حاتۋن كەسەنەلەرىنە, «كونە تاراز» ورتالىعىنا جانە جامبىل وبلىستىق تاريحي-ولكەتانۋ مۋزەيىنە ەكسكۋرسيالار ۇيىمداستىرىلدى.
جالپى, «كونە تاراز جاڭعىرىعى. ەۋرازيانىڭ مادەني كوپىرلەرى» اتتى حالىقارالىق كورمەنىڭ تاراز جەرىندە ۇيىمداستىرىلۋى كەزدەيسوق ەمەس. تاراز شاھارىنىڭ ورلەۋ كەزەڭى بولىپ سانالاتىن ءىح-ح عاسىرلاردا مۇندا شىنى ءوندىرىسى ەرەكشە قولعا الىنىپ, كوركەمدىگى جوعارى بۇيىمدار ۇلى جىبەك جولى ارقىلى شىعىس ەلدەرگە جانە ەۋروپاعا كەڭىنەن تاراعان. سول سەبەپتى وتكەن تاريحتى قايتا جاڭعىرتىپ, قازاقستان-يتاليا اراسىنداعى شەبەرلىك ىنتىماقتاستىقتى ارتتىرۋ ماقساتىندا وتكەن كورمە يتاليالىق سۋرەتشىلەرگە تاراز تاريحىن ايگىلەدى. سونىمەن قاتار, اتالعان كورمە الداعى ءبىر اي بويى تاراز تۇرعىندارى مەن قوناقتارى ءۇشىن قىزمەت كورسەتەتىن بولادى.
حاميت ەسامان,
«ەگەمەن قازاقستان»
