جيىن بارىسىندا قورشاعان ورتانى قورعاۋ, اۋماقتىڭ ەكولوگيالىق جاعدايىن جاقسارتۋ, ونىڭ ىشىندە حيميكو گيدرومەتاللۋرگيالىق زاۆودتىڭ ماسەلەلەرى جانە ونى شەشۋ جولدارى تۋرالى ەكولوگيا دەپارتامەنتىنىڭ باسشىسىنىڭ مىندەتىن اتقارۋشى رۋسلان تۋكەنوۆ مالىمدەدى.
اعىمداعى جىلدىڭ قورىتىندىسى بويىنشا دەپارتامەنت تاراپىنان وبلىستاعى تابيعات پايدالانۋشىلار ءىس-شارۋاشىلىعىنا 8 تەكسەرۋ جۇرگىزىلىپ, 58 ەكولوگيالىق زاڭ تالاپتارىنىڭ بۇزىلۋ فاكتىسى انىقتالعان.
-ناتيجەسىندە, كىنالى تۇلعالارعا جالپى سوماسى 44 122 584 تەڭگەنى قۇرايتىن 55 اكىمشىلىك ىستەر قوزعالدى. بۇگىنگى تاڭدا, سالىنعان ايىپپۇلداردىڭ 4 140 490 تەڭگەسى مەملەكەت پايداسىنا ءوندىرىلدى, قالعان 39 982 094 تەڭگەسى ورىندالۋدا (تولەۋ مەرزىمى شىقپاعان). سونىمەن قاتار, ەكولوگيالىق زاڭناما تالاپتارىن بۇزۋ سالدارىنان قورشاعان ورتاعا كەلتىرىلگەن زالالدى وتەۋ ماقساتىندا دەپارتامەنت تاراپىنان اعىمداعى جىلى جالپى سوماسى 44 224 670 تەڭگەنى قۇرايتىن 4 نۇسقاما بەرىلدى, دەدى ماڭعىستاۋ وبلىستىق ەكولوگيا دەپارتامەنتىنىڭ باسشىسىنىڭ مىندەتىن اتقارۋشى رۋسلان تۋكەنوۆ.
تابيعي قورلار جانە تابيعات پايدالانۋدى رەتتەۋ باسقارماسىنىڭ باسشىسى دۇيسەن كۇسبەكوۆتىڭ بايانداماسىنا سايكەس, باسقۇدىق اۋىلىنىڭ سانيتارلىق-گيگيەنالىق, ەكولوگيالىق جاعدايىن جانە ميكروكليماتتىن تۇراقتاندىرۋ ءۇشىن «قوشقار-اتا» قالدىق قويماسىنىڭ وڭتۇستىك-باتىس بولىگىندە جالپى اۋماعى 8,2 گا تاجىريبەلىك جاسىل قورعانىش ايماعى, سونداي-اق, وسىعان ۇقساس اۋدانى 30 گەكتار جاسىل قورعانىش ايماعىن قۇرۋ جۇمىستارى قولعا الىندى. وبلىس اكىمىنىڭ تاپسىرماسىمەن قوسىمشا بيىل اۋدانى 30 گەكتار قۇرايتىن كەلەسى جاسىل قورعانىش ايماعىن قۇرۋ جۇمىستارىنا مەملەكەتتىك ساتىپ الۋ جۇرگىزىلۋدە. جاساندى كولدىڭ سۇيىق فازاسىن تۇراقتاندىرۋ ماقساتىندا اقتاۋ قالاسىنداعى كارىزدىك تازارتۋ عيماراتىنان (كوس-1) جىل سايىن تازالانعان 7,8-8,4 ملن. م³سۋ قۇيىلادى.
سونىمەن قاتار ايتىلعان ماسەلەلەر بويىنشا جەر قاتىناستار باسقارماسىنىڭ باسشىسى ەسەمۇرات دۇزماعامبەتوۆ باياندادى.
وبلىس بويىنشا 2018 جىلدىڭ 1 ناۋرىزىنداعى جاعدايى بويىنشا بارلاۋعا جانە وندىرۋگە ارنالعان 243 جەر قويناۋىن پايدالانۋ كەلىسىمشارتتارى تىركەلگەن. «قازاقستان عارىش ساپارى» ۇلتتىق كومپانياسى» اكتسيونەرلىك قوعامىنىڭ دەرەكتەرىنە سايكەس, مونيتورينگ قورىتىندىسىمەن 62 ەلدى مەكەندە جەر-كاداستر بازاسىنا ەنبەگەن 5000-عا جۋىق قۇرىلىس نىساندارى جونىندە مالىمەتتەر كورسەتىلگەن.
«وبلىستا تىركەلگەن 96 پايىز جەر قويناۋىن پايدالانۋشىنىڭ ۋچاسكەسىندە كەلىسىم-شارتتان تىس پايدالانىلعان ايماقتار انىقتالعان. سونىمەن بىرگە, عارىشتىق تۇسىرىلىمدەر نەگىزىندە جاڭاوزەن قالاسىنىڭ سولتۇستىگىندەگى «وزەنمۇنايگاز» اق مەن «المەكس پليۋس» جشس-ءنىڭ اۋماعىندا جالپى كولەمى 165,7 گەكتار جەردە مۇناي قالدىقتارىمەن لاستانعان 471 جەر ۋچاسكەلەرى انىقتالعان», - دەدى جەر قاتىناستار باسقارماسىنىڭ باسشىسى ەسەمۇرات دۇزماعامبەتوۆ.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
