مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ جارىق كورگەنىنە 1جىل تولۋىنا وراي وتكىزىلگەن ادەبي شارا اياسىندا «ماڭگىلىك ەلدىڭ مۇراتى» اتتى وبلىستىق بايقاۋدىڭ جەڭىمپازدارى ماراپاتتالىپ, ۇزدىك شىعارما اۆتورلارىنا «اق قاۋىرسىن» ادەبي جۇلدەسى تاپسىرىلدى. سونداي-اق, وسى كۇنى «رۋح» بايقاۋىنىڭ قورىتىندىسى بويىنشا جارىققا شىققان كىتاپتاردىڭ تۇساۋى كەسىلىپ, جازۋشىلار وداعىنا مۇشەلىككە قابىلدانعان ء بىر توپ جاس قالامگەرگە كۋالىك تابىس ەتىلدى.
ەكى كۇنگە سوزىلعان «جەتىسۋ كوكتەمى» وبلىستىق فورۋمى اياسىندا جاس قالامگەرلەر قاراساي اۋدانىنداعى ەلباسىنىڭ «اتامەكەن» تاريحي-مادەني ورتالىعىن, «باتىر بابالار» مەموريالى مەن «اناعا قۇرمەت» مۋزەيىن, كەربۇلاق اۋدانىندا شوقان ءۋاليحانوۆتىڭ مەموريالدىق مۋزەيىن ارالادى. مۇنان كەيىن قوناقتار تالدىقورعان قالاسىنداعى قاراتال وزەنىنىڭ جاعالاۋىندا پوەزيا كەشىن وتكىزىپ, ءسۇيىنباي ارون ۇلى مەن مۇقاعالي ماقاتاەۆتىڭ ەسكەرتكىشتەرىنە گۇل شوقتارىن قويدى. سونداي-اق وبلىس ورتالىعىنداعى ءتىل سارايىندا ادەبيەتتىڭ سان سالالى تاقىرىپتارىن تالقىلاعان سەكتسيالىق جۇمىستار ۇيىمداستىرىلدى.
ەلىمىزدىڭ ءار وڭىرىنەن كەلگەن وتىزعا جۋىق جاس قالامگەرلەرمەن كەزدەسۋدە ايماق باسشىسى اماندىق باتولۆتىڭ قۇتتىقتاۋ تىلەگىن وبلىس اكىمىنىڭ ورىنباسارى جاقسىلىق ومار جەتكىزدى.
- ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان ۇلتتىق سانانى جاڭعىرتۋ يدەياسىنىڭ ءتۇپ تامىرى – تىلدە, ادەبيەتتە, مادەنيەتتە جاتىر. سوندىقتان باعدارلاما اياسىندا الماتى وبلىسىندا ءبىر جىلدان بەرى 8 مىڭنان استام شارا وتكىزىلىپ, 200 جوبا جۇزەگە اسىرىلۋدا. وبلىس اكىمى اماندىق باتالوۆتىڭ قولداۋىمەن بىلتىر ءبىر مەزەتتە 39 كىتاپ جارىققا شىعىپ, وقىرمانعا جول تارتتى. الداعى ۋاقىتتا وبلىستاعى بارلىق اۋىلدىق مادەنيەت ۇيلەرىن جاڭعىرتىپ, جاڭارتاتىن بولامىز. سونىمەن قاتار ادەبي بايقاۋلاردىڭ, شىعارماشىلىق شارالاردىڭ دا ماڭىزى زور. بۇگىنگى فورۋمعا وبلىستىڭ, رەسپۋبليكانىڭ ءار وڭىرىنەن تالانتتى جاستار جينالىپ وتىر. فورۋمعا قاتىسۋشىلاردى وسىناۋ ايتۋلى شارامەن شىن جۇرەكتەن قۇتتىقتاپ, بارشاڭىزعا شىعارماشىلىق شابىت تىلەيمىن! – دەدى جاقسىلىق ومار.
ءوز كەزەگىندە ءسوز العان قازاقستان جازۋشىلار وداعى باسقارماسىنىڭ توراعاسى ۇلىقبەك ەسداۋلەت جەتىسۋ وڭىرىندەگى رۋحاني جاڭعىرۋ مەن ادەبي ءۇردىستى قولداۋداعى اكىمدىكتىڭ يگى باستاماسىنا ريزاشىلىعىن ءبىلدىردى. كەزدەسۋ بارىسىندا جازۋشىلار وداعىنىڭ وبلىستىق فيليالىنىڭ ديرەكتورى, اقىن ەرلان ءجۇنىس, وبلىستىق «جەتىسۋ» گازەتىنىڭ باس رەداكتورى, قانى امىرە ءارىن, بەلگىلى اقىندار قالقامان سارين مەن باقىتگۇل باباش جانە جەتىسۋلىق جاس دارىن مۇحتار كۇمىسبەك ىزگى تىلەكتەرىن جەتكىزدى.
وسى جيىن بارىسىندا قازاقستان جازۋشىلار وداعى باسقارما توراعاسى ۇلىقبەك ەسداۋلەت وداق مۇشەلىگىنىڭ قاتارىنا قابىلدانعان جاستارعا سالتاناتتى جاعدايدا كۋالىك تاپسىردى. مۇشەلىككە قابىلدانعان اراسىندا الماتى, اتىراۋ وبلىستارىنىڭ, استانا جانە الماتى قالالارىنىڭ جاستارى بار.
فورۋم بارىسىندا «رۋحاني جاڭعىرۋ» باعدارلاماسى اياسىندا وتكەن «ماڭگىلىك ەلدىڭ مۇراتى» اتتى وبلىستىق بايقاۋدىڭ قورىتىندىسى جاريا ەتىلدى. «ماڭگىلىك ەلدىڭ مۇراتى» وبلىستىق بايقاۋى بيىل العاش رەت تۇساۋىن كەسىپ, ءداستۇرلى تۇردە جالعاساتىن ادەبي جارىسقا اينالماقشى. ۇزدىك شىعارمالارعا وبلىس اكىمىنىڭ «اق قاۋىرسىن» ادەبي جۇلدەسى بەرىلەدى. ال العاشقى جاريالانعان ادەبي سىنعا 45 جاسقا دەيىنگى قالامگەرلەر بۇركەنشىك اتپەن قاتىستى. بايقاۋعا «رۋحاني جاڭعىرۋ» تاقىرىبى, جەتىسۋ ولكەسىنىڭ تاماشا تابيعاتى جانە ەركىن تاقىرىپ اياسىندا جازىلعان تۋىندىلار قابىلدانعان بولاتىن. قازىلار القاسىنىڭ تاڭداۋىنا ىلىككەن جەڭىمپازداردى وبلىس اكىمىنىڭ ورىنباسارى جاقسىلىق ومار ماراپاتتادى.
ناتيجەسىندە, پوەزيا جانرى بويىنشا ءى ورىندى «شابىت» حالىقارالىق شىعارماشىل جاستار فەستيۆالىنىڭ جۇلدەگەرى, مەملەكەتتىك گرانت يەگەرى ساعىنىش نامازشاموۆا يەلەنسە, پروزادا ءى ورىن جاس جازۋشى, «دارابوز» بايگەسىنىڭ جۇلدەگەرى قانات ابىلقايىرعا بەرىلدى. قوس جەڭىمپازعا وبلىس اكىمىنىڭ «اق قاۋىرسىن» ادەبي جۇلدەسى, اقشالاي سىيلىقتار مەن ديپلومدار تابىستالدى. پوەزيا بويىنشا ءىى ورىندى ەرلان ءجۇنىس پەن ارشىن نۇرباقىت, ءىىى ورىندى قوزىباي قۇرمان مەن مۇحتار كۇمىسبەك يەلەندى. پروزا جانرىندا ءىى ورىندى ەسبولات ايدابوسىن جانە گۇلجان امانگەلدىقىزى, ءىىى ورىن اسحات ءومىرباي مەن داناگۇل بەرەكەتكە بۇيىردى. جۇلدەگەرلەردىڭ بارلىعىنا اقشالاي سىيلىقتار مەن ديپلومدار بەرىلدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
سۋرەتتەردى تۇسىرگەن جۇماباي مۇسابەك
