بۇل تۋرالى الماتىداعى «اتاكەنت-ەكسپو» كورمە ورتالىعىندا ەگيپەتتىڭ قىزىل تەڭىز (حۋرگادا) پروۆينتسياسىنىڭ گۋبەرناتورى – احمەد ابدۋللا مەن وڭتۇستىك سيناي گۋبەرناتورى (شارم-ءال-شەيح) – حاليد فودانىڭ قاتىسۋىمەن وتكەن ءباسپاسوز ءماسليحاتىندا كەڭىنەن ايتىلدى.
سوڭعى جىلدارى ەلىمىزدەن ەگيپەتكە ساياحاتتاۋشىلاردىڭ سانى ەسەلەپ ارتقان. الەم تاريحىنان ويىپ تۇرىپ ورىن الاتىن ەجەلگى مىسىرداعى مادەني ورىندار مەن كونە جادىگەرلەر جاھاندىق مادەنيەتتىڭ جاۋھارى سانالاتىنى بەلگىلى. وسى رەتتە قىزىل تەڭىزگە بارىپ, مارجان جاعالاۋدى كورۋگە نيەتتەنگەن ەل ازاماتتارى ءۇشىن تۋريستىك ۇسىنىستار اۋقىمى ارتىپ وتىر. بۇل تۇرعىدا ەكى مەملەكەت اراسىنداعى تۋريستىك بايلانىستى جانداندىرۋ ماقساتىندا قولعا الىنعان بىرقاتار كەلىسىمدەر بار. ەلىمىزگە ارنايى كەلگەن قوس ايماقتىڭ باسشىلارى ىنتىماقتاستىق جانە ينۆەستيتسيالىق سەرىكتەستىكتى نىعايتۋ بارىسىندا قىزىل تەڭىز پروۆينتسياسى مەن وڭتۇستىك قازاقستان وبلىسى, سونداي-اق الماتى مەن استانا قالالارى اراسىندا تۋريستىك قارىم-قاتىناس ورناتۋ تۋرالى بىرقاتار مەموراندۋمعا قول قويۋدىڭ ماڭىزدىلىعىنا توقتالدى.
– بيىل ءبىزدىڭ كومپانيامىزدىڭ كولەمى بىلتىرعى جىلمەن سالىستىرعاندا 3 ەسە ءوستى جانە قازىر ءبىز قازاقستاننىڭ 4 قالاسىنان مىسىرعا ۇشامىز. وتكەن جىلدىڭ كورسەتكىشىمەن الىپ قارار بولساق, ءبىر رەيستىڭ چارتەرلىك نارىعى قازاقستاننان جالپى العاندا 12 رەيسكە دەيىن ءوستى. بۇگىنگى كۇنگە دەيىن ەگيپەت – بۇل قوناقۇيلەردىڭ «بارلىعى قوسىلعان» باعىتى بويىنشا جۇمىس ىستەيتىن ۇقساس ۇسىنىستارى بار ەلدەرمەن سالىستىرعاندا باعاسى 2-3 ەسە تومەن مەملەكەت. تۇتىنۋشىلار ءۇشىن بۇل بارىنشا ءتيىمدى ۇسىنىس. 2018 جىلدىڭ ءساۋىر ايىنان باستاپ الماتىدان حۋرگاداعا جانە مامىرىنان باستاپ استاناعا ۇشۋ باعىتى ىسكە قوسىلاتىن بولادى, – دەيدى KAZUNION قازاقستاندىق تۋروپەراتوردىڭ نەگىزىن قالاۋشى لاۋرا عاليەۆا.
جاۋاپتى مامانداردىڭ ايتۋىنشا, جاڭا رەيستەردىڭ ءتيىمدى تۇستارى كوپ. ماسەلەن, قازاقستاننان بارعان وتباسىلارعا ارنالعان قوناقۇيلەردىڭ 90%-دان استامى بالالارعا تەگىن تۇرۋدى قامتاماسىز ەتەدى. وعان قوسا, شارم-ءال-شەيح جانە حۋرگادا اۋەجايلارى تۋريستىك رەيستەردى ۇستاۋعا ارنايى تومەن تاريفتەردى ەنگىزگەندىكتەن, تاسىمالداۋ قۇنى بۇرىنعىدان ەداۋىر تومەندەگەن. حۋرگاداداعى ۇشۋ باعدارلاماسى قۇمدى جاعاجايلارعا جانە بارلىعىن قوسا العاندا, كىشكەنتاي تۋريستەرگە ارنالعان ۇسىنىستاردى كەڭەيتكەن. تۋريستەر شارم-ءال-شەيح كۋرورتىنا ۇشىپ كەتسە, ۆيزاسىز كىرۋ مۇمكىندىگى دە قاراستىرىلعان كورىنەدى. ايتالىق, قىزىل تەڭىزگە 10 كۇنگە ساپارلار بولساڭىز, اۋە تاسىمالى, بەس جۇلدىزدى قوناقۇي, بارلىق ۋاقىتتارداعى تاماقتانۋ, وسىنىڭ بارىنە قالتاڭىزدان جان باسىنا شاققاندا 250 مىڭ تەڭگە جۇمسالسا كەرەك.
2017 جىلدىڭ جاز ايلارىندا اتالعان ايماققا ساياحاتتاۋشى ەرەسەك تۋريستەردىڭ سانى 73 پايىزدى, 2 جاستان 12 جاسقا دەيىنگى جەتكىنشەكتەر – 24 پايىز, ال 2 جاسقا دەيىنگى بالالار 4 پايىزدى قۇراعان.
ارمان وكتيابر,
«ەگەمەن قازاقستان»
