جەرگىلىكتى ونەرپازداردان قۇرالعان ترۋپپا ەلىمىزدىڭ بىرقاتار وبلىسىنا، رەسەيدىڭ شەكارالاس ايماقتارىنا گاسترولدىك ساپارلارعا شىعىپ، تالعامپاز كورەرمەندەردى قازاقى قالجىڭعا قارىق قىلىپ ءجۇردى. ومىردە دە، ونەردە دە ويىپ تۇرىپ ورىن العانمەن ءتۇرلى سەبەپتەرمەن جۇمىسىن توقتاتقان ءازىل الەمىنىڭ ورنىن ەندى  «تەرىسكەي» ساتيرا تەاترى باستى.

ونى ۇيىمداستىرۋشىلاردىڭ ءبىرى، س. مۇقانوۆ اتىنداعى قازاق سازدى-دراما تەاترىنىڭ بەلدى اكتەرى ءارى رەجيسسەرى بوولاتبەك شامبەتوۆتىڭ ايتۋىنشا جۇرتشىلىق ارزان، ىرجاقاي شوۋلاردان مەزى بولعان سىقىلدى. كەز كەلگەن تەلارنانى اشىپ قالساڭ وي سالارلىق ەشتەڭەسى جوق، تابيعاتىمىزعا جات كورىنىستەر اندىزداپ قويا بەرەدى. اسىرەسە، شەتەلدەرگە ەلىكتەۋدەن، سولىقتاۋدان تۋعان تاتىمسىز قويىلىمدار جاستاردىڭ ساناسىن ۋلاپ، ۇلتتىق ناقىشتان اجىراتىپ بارادى.

«ونىڭ باستى سەبەبى بۇگىنگى كۇننىڭ وتكىر ماسەلەلەرىن، تولعاقتى پروبلەمالارىن استارلاپ تا، تىكەلەي دە جەتكىزەتىن سالماقتى، مازمۇندى رەپەرتۋارلىق شىعارمالار تاپشى.  ەكىنشىدەن، ەزۋىڭە مىسقىل ۇيىرەتىن، جاعىمسىز قۇبىلىستارعا جيىركەنىش تۋدىراتىن ويلى ساتيرانى ادامدار تەلەديداردان عانا ەمەس، جەرگىلىكتى جەرلەردە تىكەلەي تاماشالاسا دەگەن وي بولدى»، دەيدى ول.

بولاتبەك وسىدان ونبەس شاقتى جىل بۇرىن وبلىستىق تەلەارنا جانىنان  «ويپىرماي» اتتى ءازىل-سىقاق باعدارلاماسىنىڭ اشىلۋىنا ۇيىتقى بولىپ، ءبىراز تاجىريبە جيناقتاپتى.  جاڭا تەاترعا بىرقاتار تالانتتى، تالاپتى ارىپتەستەرىن تارتىپتى. قالالىق مادەنيەت ۇيىنەن ورىن بەرىلىپ، بارلىق جاعداي تۋعىزىلىپتى. كەلەشەكتە 500 ورىندى قازاق تەاترى بوي كوتەرسە، ورىستەرى كەڭەيەدى دەگەن ۇمىتتەرى باسىم.

«قازىرگى كورەرمەندەردىڭ تالعامى دا، كوزقاراسى دا مۇلدەم بولەك. ساتيرا دا– تاربيەنىڭ ماڭىزدى قۇرالى. ول تەك  كۇلكىدەن تۇرمايدى. استارىندا سالماقتى وي، الەۋمەتتىك استار جاتۋى كەرەك. كەي جاعدايلاردا ساتيرانىڭ رۋحاني كۇش بەرەتىن، جاقسى كوڭىل-كۇي سىيلايتىن قۇدىرەتىن ەلەپ-ەسكەرە بەرمەيمىز. ءوڭىر تۇرعىندارى  العاشقى قويىلىمدى جۋىق ارادا تاماشالايتىن بولادى»، دەيدى ب. شامبەتوۆ.

ءومىر ەسقالي،
«ەگەمەن قازاقستان»