ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكەن عىلىمي سەمينارعا قوعام قايراتكەرلەرى جانە ەلىمىزدىڭ ءار ايماعىنان كەلگەن عالىمدار مەن ستۋدەنتتەر قاتىستى.
ءماجىلىس توراعاسىنىڭ ورىنباسارى ۆلاديمير بوجكو اتالعان فورۋمعا قاتىسۋشىلارعا مەملەكەت باسشىسىنىڭ قوعامدىق سانانى جاڭعىرتۋعا بايلانىستى تاپسىرمالارى ساياسي جانە ەكونوميكالىق جاڭعىرۋ مەن دامۋدىڭ نەگىزگى ىرگەتاسى بولاتىندىعىن اتاپ ءوتتى.
– پرەزيدەنتتىڭ باستامالارى بارشا قازاقستاندىقتاردىڭ مۇددەسىنە ساي كەلەدى. حالىقتىڭ تۇرعىن ءۇي جاعدايىن جاقسارتۋ, سالىق جۇكتەمەسىن ازايتۋ, ساپالى جانە زاماناۋي سۇرانىسقا ساي كەلەتىن جوعارى ءبىلىم بەرۋ, كاسىپكەرلىك باستامالاردى دامىتۋعا مۇمكىندىك جاساۋ, وڭىرلەردى گازداندىرۋ جوبالارى حالىقتىڭ مۇقتاجدىعىن وتەۋگە ارنالعان, – دەدى ۆ.بوجكو.
سەمينارعا قاتىسۋشىلار پرەزيدەنت باستامالارىنان تۋىندايتىن وزگە دە وڭ وزگەرىستەر جايىندا پىكىرلەرىن ءبىلدىردى. ماسەلەن سولتۇستىك وڭىرلەردى گازداندىرۋ ايماقتىڭ ەكولوگيالىق احۋالىنا دا وڭ اسەرىن تيگىزبەك. وسى ماسەلەگە بايلانىستى ساراپشىلار حالىقتىڭ ءال-اۋقاتىنىڭ ايتارلىقتاي جاقساراتىندىعىن بولجاپ وتىر.
پارلامەنت دەپۋتاتتارى پرەزيدەنتتىڭ باستامالارى بۇكىل الەم كۇردەلى ەكونوميكالىق كۇيزەلىستى باستان كەشىپ, الەۋمەتتىك باعدارلامالارى كەيىنگە شەگەرىلىپ جاتقان شاقتا قولعا الىنعانىن ەرەكشە اتاپ ءوتتى.
ەڭ باستىسى, ەلىمىزدەگى باسىمدىقتاردىڭ الدىڭعى لەگىندە حالىقتىڭ الەۋمەتتىك جاعدايىن جاقسارتۋ ماسەلەسى تۇراتىندىعى ايتىلدى.
سەمينارعا قاتىسۋشىلار پرەزيدەنت باسىمدىق بەرگەن سالالاردى ايتا كەلە, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندەگى قازاقستان حالقى اسسامبلەياسى كافەدراسى فيليالدارىنىڭ ماڭىزدىلىعىنا دا توقتالىپ ءوتتى. ماسەلەن, قازىرگى ۋاقىتتا كافەدرانىڭ بولىمشەلەرى استانا قالاسىنداعى ەۋرازيا گۋمانيتارلىق ينستيتۋتى مەن №22 جانە №48 مەكتەپتەردە اشىلعان.
ونلاين رەجىمدە وتكەن سەمينار بارىسىندا الماتى جانە پاۆلودار قالالارىنان بايلانىسقا شىققان قازاق مەملەكەتتىك قىزدار پەداگوگيكالىق ۋنيۆەرسيتەتى جانە س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى جانىنداعى قحا كافەدراسىنىڭ مەڭگەرۋشىلەرى گەورگي كان مەن ساۋلە مامىتوۆا ۇلتارالىق جانە كونفەسسياارالىق كەلىسىمنىڭ ماڭىزدى تۇستارىن ءسوز ەتتى.
سونداي-اق فورۋمدى قىزىلوردا, پەتروپاۆل, قوستاناي, تاراز, كوكشەتاۋ قالالارىنداعى بىرقاتار جوعارى وقۋ ورىندارىنىڭ وقىتۋشىلارى مەن ستۋدەنتتەرى كورىپ وتىردى.
جيىن بارىسىندا ءماجىلىس توراعاسىنىڭ ورىنباسارى ەل ىشىندە پرەزيدەنت باستامالارىنا عىلىمي تۇرعىدا قولداۋ كورسەتۋ ءۇشىن قازاقستان حالقى اسسامبلەياسى كافەدرالارىنىڭ عىلىمي الەۋەتتەرىن تولىقتاي قولدانۋ كەرەكتىگىن جەتكىزدى.
سەرىك ابدىبەك,
«ەگەمەن قازاقستان»
