جيىنعا ۇلت رۋحانياتىندا ورنى بار زيالى قاۋىم وكىلدەرى مەن بەلگىلى ءتىلتانۋشى عالىمدار جانە اتالمىش سالا بويىنشا وڭىردە قىزمەت اتقارىپ جۇرگەن جەتەكشى ماماندار قاتىستى.
باسقوسۋعا جينالعان كوپشىلىكتى شارانىڭ ماقساتىمەن تانىستىرعان مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ توراعاسى قۋات بوراش ەلباسى تاراپىنان وتكەن جىلى قوعامعا جولدانعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاعا ءبىر جىل تولۋىنا بايلانىستى ايماقتاعى ارىپتەستەردى جيناپ, بۇعان دەيىن اتقارىلعان ىستەر مەن الدا ورىندالاتىن جوسپارلى شارۋالار جايلى اقىلداسىپ, كەلەلى كەڭەس وتكىزۋدى قۇپ كورىپ وتىرعانىن جەتكىزدى.
– بۇگىنگى سەمينار قازىرگى تاڭدا اسا ءبىر وزەكتى ماسەلەگە اينالىپ وتىرعان جاڭا قازاق الىپبيىنە بايلانىستى ۇيىمداستىرىلعانى قۇپتارلىق دۇنيە, - دەپ شارانىڭ مانىنە قاتىستى بەتاشار لەبىزىن بىلدىرگەن مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ بۇل رەتكى تالقىلاۋعا ۇسىنىلعان ماسەلە ۋاقىتتىق تۇرعىدان جاسامپازدىق ماڭىزعا يە بولۋىمەن قاتار جاڭا داۋىرگە ءتان ەلىمىزدىڭ بولاشاق رۋحاني باعدارىن ايقىنداۋعا ارنالعان جيىن دەگەندى اتاپ ايتتى.
ماڭىزدى شارانى ۇيىمداستىرۋشى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى ەربول تىلەشوۆ, ەلباسى ن.ءا. نازارباەۆ ۇستىمىزدەگى جىلدىڭ 20 اقپاندا «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» 2017 جىلعى 26 قازانداعى №569 جارلىعىنا وزگەرىس ەنگىزگەن ساتتەن باستاپ, قازاق ءتىلى ءالىپبيىن لاتىن گرافيكاسىنا كوشىرۋ جونىندە ۇلتتىق كوميسسيا قۇرىلىپ, ورفوگرافيالىق, تەرمينولوگيالىق, ادىستەمەلىك-تەحنيكالىق جانە اقپاراتتىق سۇيەمەلدەۋ جونىندە جۇمىس توپتارى جاساقتالىپ, ولاردىڭ جۇمىس ەرەجەسى بەكىتىلىپ, ىسكە كىرىسىپ كەتكەنىن جەتكىزدى.
سەمينار-كەڭەس بارىسىندا قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلامانىڭ ءۇشىنشى كەزەڭىندەگى نىسانالى ينديكاتورلارى بويىنشا: مەملەكەتتىك ءتىلدى مەڭگەرگەن ەرەسەك تۇرعىنداردىڭ; مەملەكەتتىك ءتىلدى ۆ1 دەڭگەيىندە مەڭگەرگەن مەكتەپ تۇلەكتەرىنىڭ; مەملەكەتتىك بۇقارالىق اقپارات قۇرالدارىنداعى قازاق تىلىندەگى كونتەنتتىڭ; قازاق ءتىلىنىڭ رەتتەلگەن تەرمينولوگيالىق قورىنىڭ; رەسپۋبليكاداعى ورىس ءتىلىن مەڭگەرگەن ەرەسەك تۇرعىنداردىڭ; ۇلتتىق مادەني بىرلەستىكتەر جانىنداعى انا تىلدەرىن وقىتاتىن كۋرستارمەن قامتىلعان ەتنوستاردىڭ; رەسپۋبليكادا اعىلشىن ءتىلىن مەڭگەرگەن تۇرعىنداردىڭ; ۇشتىلدىلىك ساياساتىن يگەرگەن تۇرعىنداردىڭ ۇلەسى مەن ونوماستيكا ماسەلەلەرى جايلى كەڭىنەن ساراپتالدى.
كەزەكتى تىڭدالعان باياندامالار بارىسىندا جاڭا ۇلتتىق الىپبيگە كوشۋ كەزەڭدەرىنىڭ دايارلىعى تۋرالى, وسى وقيعاعا بايلانىستى قوعامدىق كوزقاراس پەن عىلىمي تۇجىرىمدار جايلى, مەملەكەتتىك ءتىلدى وقىتۋدىڭ ادىستەمەلىك بازاسىن جەتىلدىرۋ جانە ستاندارتتاۋ ءىسى, سونداي-اق ءتىل ۇيرەنۋشىلەرگە قاتىستى لەكسيكالىق قوردى عىلىميلاندىرۋ شاراسى, شەت تىلدەرىن ۇيرەتۋدىڭ ماڭىزىنا قاتىستى ماسەلەلەر تالقىلاندى.
سونىمەن قاتار باسقوسۋ بارىسىندا ايماقتاردان كەلگەن مامانداردىڭ دا پىكىرلەرى تىڭدالىپ, وڭىرلەردە لاتىن گرافيكاسىنا كوشۋ بارىسىندا تۋىندايتىن سۇراقتار دا ورتاعا تاستالىپ, ولاردى شەشۋ جولدارى ۇسىنىلدى. جيىن سوڭىندا الدا اتقارىلار جۇمىستىڭ جوسپارى تانىستىرىلىپ, ودان كۇتىلەتىن ناتيجەلەر بەلگىلەندى.
بەكەن قايرات ۇلى,
«ەگەمەن قازاقستان»
