جيىندا ءدىن ىستەرى جانە ازاماتتىق قوعام ۆيتسە-ءمينيسترى ب.ارىن, قازاقستان مۇسىلماندارى ءدىني باسقارماسىنىڭ توراعاسى س.وراز, پراۆوسلاۆتىق شىركەۋدىڭ ميتروپوليتتىك وكرۋگىنىڭ ءىسىن باسقارۋشى, قاسكەلەڭدىك ەپيسكوپ گەننادي, ل.گۋميلەۆ اتىنداعى ەۇۋ الەۋمەتتىك-مادەني دامۋ جونىندەگى پرورەكتورى ديحان قامزابەك ۇلى قاتىستى.
ب.ارىن ءوز سوزىندە «بەس الەۋمەتتىك باستاما» تىكەلەي جاستارعا باعىتتالعاندىعىنا توقتالدى. «بۇل قۇجات پرەزيدەنتىمىزدىڭ سەرپىندى ۇسىنىسى, جاس وتباسىلارعا تۇرعىن ءۇي الۋعا, جاستاردىڭ جالاقىسىن كوتەرۋگە, ساپالى جانە قولجەتىمدى ءبىلىم بەرۋگە, كاسىپكەرلىكتى دامىتۋعا مۇمكىندىك بەرەدى. ەلباسىنىڭ بەس الەۋمەتتىك باستامالارى ەلىمىزدىڭ وركەندەۋى مەن حالقىمىزدىڭ ءال-اۋقاتىن جاقسارتۋعا باعىتتالعان. ال بۇنىڭ بارلىعى تۇراقتىلىق ورناعان مەملەكەتتە عانا جۇزەگە اسپاق. ەل دامۋىنىڭ نەگىزى – مەملەكەت تۇراقتىلىعى. كەز-كەلگەن ەلدىڭ ىلكىمدى دامۋىنىڭ باستى كەپىلدىگى ونىڭ بەيبىت جاعدايدا تىرشىلىك ەتۋى ەكەنى بەلگىلى. ياعني, قاۋىپسىزدىگىن قامتاماسىز ەتە الاتىن مەملەكەتتەر عانا قارقىندى وركەندەۋ جولىنا ىلىگە الادى» دەپ اتاپ ءوتتى.
وسى رەتتە, قازاقستان مۇسىلماندارى ءدىني باسقارماسىنىڭ توراعاسى س.وراز مەملەكەت باسشىسىنا الەۋمەتتىك رەفورمالاردى جۇزەگە اسىرۋعا, ولاردى جاس ۇرپاق ءۇشىن جاساعانىنا قۇرمەت ءبىلدىردى. باس ءمۇفتي: «بىردە پايعامبارىمىز مۇحاممەدتەن ءبىر كىسى: «ۋا, اللانىڭ ەلشىسى, ەڭ جاقسى ادام كىم؟» دەپ سۇرايدى. سوندا ول: «ەڭ جاقسى ادام – قوعامعا, ەلگە پايداسى تيگەن پەندە» دەپ جاۋاپ بەرگەن. دەمەك, قازىر ءبىزدىڭ قوعامعا ءوز ءىسىنىڭ مايتالمان مامانى بولا بىلگەن يماندى, جاناشىر, ءداستۇرلى قۇندىلىقتاردى قۇرمەتتەيتىن پاراساتتى مۇسىلماندار قاجەت. ءبىلىم مەن كوركەم مىنەزدى, ار مەن ۇياتتى ءوز بويىنا ۇيالاتقان ۇرپاق ەلدىڭ كوسەگەسىن كوگەرتەدى» دەدى.
پراۆوسلاۆتىق شىركەۋدىڭ ميتروپوليتتىك وكرۋگىنىڭ ءىسىن باسقارۋشى قاسكەلەڭدىك ەپيسكوپ گەننادي پرەزيدەنتتىڭ جاريالاعان ۇندەۋى ەڭ الدىمەن حالىقتىڭ الەۋمەتتىك ءال-اۋقاتىن نىعايتۋعا جانە ءبىزدىڭ مەملەكەتىمىزدە ءومىر ءسۇرۋ ءۇشىن قولايلى جاعداي جاساۋعا, الەۋمەتتىك بلوكتىڭ مىندەتتەرىن شەشۋگە باعىتتالعانىن اتاپ ءوتتى. «مەملەكەت باسشىسى قوعامنىڭ تالاپتارى مەن كوڭىل-كۇيىنە اسا كوڭىل بولەتىندىگىن تاعى ءبىر رەت كورسەتتى. جاستار سالاسى وتە سەزىمتال جانە بارلىق جاڭا نارسەلەردى قابىلدايدى. سوندىقتان, بۇل قۇجات ازاماتتاردىڭ وسى ساناتىنا تولىعىمەن باعىتتالعان جانە ولاردىڭ ءوسۋى مەن تۇراقتىلىعى ءۇشىن قولايلى جاعدايلار جاسالعان» دەدى ول.
الەۋمەتتىك باستامالاردى تالقىلاۋ بارىسىندا ستۋدەنتتەر تاراپىنان كوپتەگەن سۇراقتار قويىلىپ, ولاردىڭ بارلىعىنا قىزىقتى دا شىنايى جاۋاپتار بەرىلدى. قويىلعان سۇراقتار قاتارىندا ءدىن وكىلدەرنىڭ نەسيە الۋعا دەگەن كوزقاراسى, قازاقستانداعى تەولوگيالىق ءبىلىم الۋ جانە باسقالار قامتىلدى.
