انكارا قالاسىندا جارىق كورەتىن باسىلىم وسىعان دەيىن ءسۇيىنباي, جامبىل, بەردىبەك سوقپاقباەۆ, شەرحان مۇرتازا, ولجاس سۇلەيمەنوۆ, راحىمجان وتارباەۆ, نۇرلان ورازالين, ەسەنقۇل جاقىپبەكتىڭ شىعارماشىلىعىن ناسيحاتتاۋ ماقساتىندا ارنايى ءنومىر شىعارسا, كەزەكتى سانىن الاش قوزعالىسىنىڭ قايراتكەرى, كورنەكتى اقىن, پۋبليتسيست ماعجان جۇماباەۆتىڭ 125 جىلدىعىنا ارناپ وتىر.
رەداكتسيا القاسى حالىقارالىق تۇركى اكادەمياسى مەن تۇركسوي ۇيىمى جاريالاعان «ماعجان جۇماباەۆ جىلىنا» ءوز ۇلەستەرىن وسىلايشا قوسۋدى ءجون ساناپتى. سونداي-اق «تۇركىستان – ەكى دۇنيە ەسىگى عوي, تۇركىستان – ەر تۇرىكتىڭ بەسىگى عوي» دەپ ءوز ولەڭدەرىندە تۇركى تاقىرىبىن تۋ ەتكەن اقىننىڭ اتۋ جازاسىنا كەسىلگەنىنە 80 جىل تولعانىن دا ەسكە الا كەتىپتى.
العاشقى بەتتەرگە «كاردەش كالەملەر» جۋرنالىنىڭ باس رەداكتورى, تۇرىك جۇرتىنىڭ تانىمال اقىنى ءالي اكباش اۋدارعان ماعجان جۇماباەۆتىڭ ولەڭدەر توپتاماسى بەرىلگەن. ءارى قاراي اقىننىڭ عىلىمي مۇرالارى مەن ماقالالارى, سونداي-اق ءار جىلدارى تابىلعان قولجازبالارى مەن تۇتىنعان جادىگەرلەرى ورىن العان. ۇلىستىڭ ۇلى كۇنىنە ورايلاستىرىلعان ماعجان جۇماباەۆتىڭ ء«ار حالىقتىڭ وزىنشە جاڭا جىلى, جىل باسى بولادى. قاي ۋاقىتتا, قاي حالىقتا بولسا دا جاڭا جىل سول حالىقتىڭ, سول ۋاقىتتىڭ شارۋا جاعدايىنا قاراي بەلگىلەنگەن. ەۋروپا جۇرتتارىنىڭ ءبىر جەرىندە جاڭا جىل 1 قاڭتار, ءبىر جەرىندە – 1 قىركۇيەك, تاعى وسىندايلار. ازيادا جاڭا جىل – جازعىتۇرىم, قازاق ەلىندە – ناۋرىزدىڭ 22-ءسى.
قاي ەلدىڭ جاڭا جىلىن الساق تا, نەگىزىندە شارۋاشىلىق جاعداي بولادى. قازاق جاڭا جىلى ءدىن اسەرىنەن تازا. بۇل كۇنى ەشبىر قۇلشىلىق, ءدىن ادەتتەرى جاسالمايدى. بار بولعانى ەل ءبىر-بىرىمەن كورىسىپ: «جاسىڭ قۇتتى بولسىن!» دەيدى. جاڭا جىل كۇنى قازاق كۇن رايىنا قاراي الداعى جازدى راقاتتى, راقاتسىز بولادى دەپ بولجاۋ جاسايدى. قار تەز كەتە مە, جاز جىلدام بولا ما دەپ بولجاۋ جاسايدى. جاڭا جىل كۇنى قازاق əدەتىنشە əر ۇيدە قازان-قازان كوجە پىسىرىلەدى» دەگەن تاعىلىمدىق ماقالا دا ەنگەن. ورىس جازۋشىسى مامين-سيبيرياكتان اۋدارىلعان «اقبوز ات» əڭگىمەسىن دە كورۋگە بولادى.
سونىمەن قاتار ەۋرازيا جازۋشىلار قاۋىمداستىعىنىڭ توراعاسى ياكۋپ وماروعلىنىڭ, تۇركسوي ۇيىمىنىڭ باس حاتشىسى دۇيسەن قاسەيىنوۆتىڭ, ادەبيەتتانۋشى-عالىمدار كەمەل وسپانوۆ, فەرحات تامير, ايگۇل ىسماقوۆا, جاراسباي سۇلەيمەنوۆ, ورحان سويلەمەز, ساۋلە مالىكوۆا, سەرىكقازى قوراباي, زارقىن تايشىباي, قايىربەك كەمەڭگەر, ەربول تىلەشوۆ جانە باسقالاردىڭ زەرتتەۋ ەڭبەكتەرى توپتاستىرىلعان. انكارا قالاسىندا ماعجان جۇماباەۆتىڭ 125 جاسقا تولۋىنا وراي گازي ۋنيۆەرسيتەتىندە وتكەن حالىقارالىق كونفەرەنتسيا بارىسىنان دا مالىمەتتەر كەلتىرىلگەن. وندا قازاقستاننىڭ تۇركياداعى ەلشىسى ابزال ساپاربەك ۇلى, تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ, تۇركيا مادەنيەت جانە تۋريزم ءمينيسترىنىڭ ورىنباسارى حۇسەيىن ياايمان, گازي ۋنيۆەرسيتەتىنىڭ رەكتورى يبراحيم ۋسلان, كەچيورەن مۋنيتسيپاليتەتىنىڭ مەرى مۇستافا اك, احمەت ياساۋي ۋنيۆەرسيتەتىنىڭ وكىلەتتى كەڭەس توراعاسى مۇسا يىلدىز, تۇركييات ينستيتۋتىنىڭ ديرەكتورى حۋليا كاساپوعلۋ چەنگەل جانە باسقا زيالى قاۋىم وكىلدەرىنىڭ اقىن شىعارماشىلىعى جايلى ورتاعا سالعان ورامدى ويلارى وقىرمان نازارىنا ۇسىنىلعان. ەستەرىڭىزگە سالا كەتسەك, جۋرنال تۇركيانىڭ بارلىق ايماقتارىمەن قاتار, تۇركىتىلدەس ەلدەردىڭ شىعارماشىلىق ورتالىقتارىنا تارايدى.
قورعانبەك امانجول,
«ەگەمەن قازاقستان»
