تۇساۋكەسەر ءراسىمىن جاساۋعا كەلگەن ەۋرازيالىق ينتەگراتسيا ينستيتۋتى ديرەكتورىنىڭ ورىنباسارى ناتاليا كالاشنيكوۆا جاڭا زەرتتەۋ ەڭبەگىنىڭ ەرەكشەلىگى مەن ماڭىزىن ءسوز ەتە وتىرىپ, ينستيتۋتتىڭ عىلىمي جوبالارىمەن دە تانىستىرىپ ءوتتى. ۇجىمدىق ىرگەلى ەڭبەكتە قازاقستانداعى الەۋمەتتىك-ساياسي ۇدەرىستەر ساراپتالىپ, ازاماتتىق قوعامنىڭ ءارى قارايعى دامۋىنىڭ كەلەشەگى, قوعامدىق سانانى قالىپتاستىرۋ مەن نىعايتۋداعى ساياسي ازاماتتىق ينستيتۋتتاردىڭ ءرولى تارقاتىلادى. مونوگرافيا ەۋرازيالىق ينتەگراتسيا ينستيتۋتى جۇرگىزگەن الەۋمەتتىك زەرتتەۋلەردىڭ ءتۇيىنىن توپتاستىرعان.
بۇگىندە قازاقستان دەموكراتيالىق, زايىرلى, قۇقىقتىق جانە الەۋمەتتىك مەملەكەت رەتىندە تولىقتاي قالىپتاستى. بۇعان ارا-جىگى بولىنبەستەن, ءوزارا تەڭدەستىرىلگەن ىشكى جانە سىرتقى ساياسات مۇمكىندىك تۋعىزدى. بىراق سوڭعى ون جىلداعى حالىقارالىق ماسەلەلەردىڭ دامۋى قاۋىپسىزدىك پارامەترلەرىن وزگەرتىپ جىبەردى. اۋقىمدى ساياسي ماسەلەلەردىڭ شيەلەنىسۋى كەزىندە حالىقارالىق قاۋىمداستىقتىڭ قاتىسۋشىلارى ەكونوميكالىق سانكتسيالاردى بەلسەندى قولدانىپ, مەملەكەت پەن قوعامنىڭ بارلىق ءومىر ءسۇرۋ سالالارىنا اسەر ەتۋدىڭ جاڭا تاسىلدەرىن پايدالانا باستادى. ءححى عاسىردا الەمنىڭ وزگەرگەنى سونشا, بۇگىندە تەك قانا باسەكەگە قابىلەتتى مەملەكەت جانە ينتەللەكتۋالدى دامىعان ۇلت قانا ۋاقىت سىناعى مەن جاھاندانۋعا قارسى تۇرا الاتىنى انىق بايقالىپ وتىر. وسىنداي بەتالىستى باعامداعان الدىڭعى قاتارلى مەملەكەتتەر ءوز دامۋىنىڭ جاڭا ستراتەگياسى مەن جۇيەسىن قولعا الدى.
مەملەكەت قۇرۋدىڭ جاڭا كەزەڭىندەگى مۇنداي دامۋ ۇلگىسىن ەلباسى ن.نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەل حالقىنا جولداعان جولداۋى مەن «بولاشاققا باعدار: رۋحاني جاڭعىرۋ» اتتى ماقالاسىندا ايقىن بەلگىلەپ بەردى. قازاقستاننىڭ الەۋمەتتىك جاڭعىرۋى تۋرالى جاڭا ەڭبەكتە پرەزيدەنتتىڭ رەفورماتور رەتىندەگى تۇلعاسى ول ۇسىنعان تىڭ يدەيالاردى تالداۋ ارقىلى دارالانا تۇسەدى. ساياساتتانۋشى ماماندار جۇرگىزگەن كەشەندى الەۋمەتتىك زەرتتەۋلەر ناتيجەسى قوعامدىق سانانى قالىپتاستىرۋدىڭ ماڭىزدى بولىگى ىسپەتتەس. ءۇشىنشى جاڭعىرۋ مىندەتتەرىن جۇزەگە اسىرۋ جولىندا, ازاماتتاردىڭ بەلسەندىلىك دەڭگەيىن زەرتتەۋدە ماماندار قۇندىلىقتار مەن ماقساتتى العا قويعان بيىك قوعامدىق قولداۋدى سەزىندى.
جالپى العاندا, ناتاليا كالاشنيكوۆانىڭ ايتۋىنشا, مونوگرافيادا تۇرعىنداردىڭ الەۋمەتتىك كوڭىل كۇيدى سەزىنۋ, قازاقستاندىق قوعامنىڭ وزىندىك دامۋى مەن ورىستەۋى, سونداي-اق حالىقتىڭ ءارتۇرلى مارتەبەدەگى توبىنىڭ جاڭعىرۋ ۇدەرىسىن قابىلداۋ دەڭگەيى سياقتى قيىن ءارى ماڭىزدى قۇبىلىس بولىپ تابىلاتىن ءارى بىرىنە-ءبىرى ۇقسامايتىن ءارتۇرلى الەۋمەتتىك-مادەني فاكتورلار جان-جاقتى زەرتتەلىپ, كەڭىنەن ساراپتالعان.
ايگۇل احانبايقىزى,
«ەگەمەن قازاقستان»
الماتى
