ناۋرىزدى وتكىزۋدى چەليابى وبلىستىق حالىقتار دوستىعى ءۇيى ۇيىمداستىرىپتى, وعان «جاقسىلىق» قازاق ۇلتتىق-مادەني قوعامدىق بىرلەستىگى دە اتسالىستى.
ء«بىز وبلىستا تۇراتىن 40 مىڭ قارالى قانداستارىمىزدىڭ انا ءتىلىمىز بەن ۇلتتىق داستۇرلەرىمىزدى ۇمىتپاۋى, وگەيسىمەۋى ءۇشىن جىل بويىنا جۇمىس جۇرگىزەمىز. بۇل ورايدا فەستيۆالدەر مەن ءتۇرلى بايقاۋلاردىڭ الاتىن ورنى ەرەكشە, جارىس سيپاتىندا وتكىزگەن شارالار ۇلتتىق نامىستى قامشىلاۋعا ىقپال ەتەدى, الىستا وتىرعان اعايىندى ۇلتتىق قۇندىلىقتارعا قۇلشىندىرادى» دەيدى «جاقسىلىق» قازاق ۇلتتىق-مادەني قوعامدىق بىرلەستىگىنىڭ جەتەكشىسى يۋليت بايداۋلەتوۆا.
قوستاناي وبلىستىق اكىمشىلىگى چەليابى وبلىسىمەن ەكونوميكالىق جانە مادەني بايلانىستار ورناتقان. وبلىستىق تىلدەردى دامىتۋ باسقارماسىنىڭ ءتىل ۇيرەتۋ ورتالىعى رەسەيلىك قازاقتار ءۇشىن جىل سايىن قازاق ءتىلىن وقىتۋ باعدارلاماسىن جاساپ بەرەدى, مۇعالىمدەرگە ارناپ سەمينار وتكىزەدى.
«چەليابى وبلىسىن جايلاعان اعايىندارىمىز ءبىزدىڭ ماماندار جاساعان باعدارلامامەن بىرنەشە جىل قاتارىنان انا ءتىلىن ۇيرەنىپ كەلەدى. ماقتانعانىمىز ەمەس, تىلدىك ورتادان شەت جۇرگەن اعايىنعا ىقشامدالعان, مۇنداي جەڭىلدەتىلگەن باعدارلاما جاساپ بەرىپ, ونىمەن سىرتتاعى قازاقتاردىڭ ءتىل ۇيرەنۋىن قاداعالاپ, قوعامدىق نەگىزدە ءتىل ۇيرەتۋمەن اينالىساتىن مۇعالىمدەر ءۇشىن سەمينارلار وتكىزىپ, ولاردىڭ بىلىكتىلىگىن كوتەرىپ وتىرعان جۇمىستار ءبىزدىڭ وبلىستىق تىلدەردى دامىتۋ باسقارماسىندا جۇرگىزىلەدى. مۇنداي باعدارلامانى ءبىزدىڭ وبلىستاعى ءتىل ۇيرەتۋ ورتالىعىنىڭ ماماندارى عانا جاسادى, ونىڭ رەسپۋبليكانىڭ باسقا وبلىستارىندا بالاماسى جوق» دەيدى قوستاناي وبلىستىق تىلدەردى دامىتۋ باسقارماسىنىڭ ءبولىم مەڭگەرۋشىسى باقىتگۇل سۇلەيمەنوۆا.
چەليابىدە وتكەن ناۋرىز مەرەكەسىنە باشقۇرت, تاتار, ازەربايجان سەكىلدى حالىقتارمەن قاتار قازاقتار دا بەلسەنە قاتىسادى ەكەن. ولار اكەلگەن ۇلتتىق تاعامنىڭ ءتۇر-ءتۇرى وزگەلەردىڭ دە نازارىن اۋداردى, ونەرگە جاستاردى باۋلىپ وتىر.
ناۋرىز مەرەكەسى چەليابى وبلىسىنداعى قازاقتار شوعىرلانىپ وتىرعان اۋداندارداعى ەلدى مەكەندەردە دە وتكىزىلدى. ترويتسك اۋدانىنداعى ساناركا سەلوسىنداعى 500 ءۇيدىڭ 50 ءتۇتىنى قازاقتار. ولار بيىل ناۋرىز مەيرامىن وتكىزدى. وعان قانداستارىمىز ترويتسك, چەسما اۋداندارى مەن پلاست قالاسىنان كەلىپ, حالىقتىڭ ءداستۇرى مەن ونەرىن كورسەتتى. وسى مەرەكەنى ۇيىمداستىرعان ساناركا اۋىلىنىڭ اقساقالى, «مۇراگەر» قازاق ۇلتتىق-مادەني ورتالىعىنىڭ جەتەكشىسى ديقان مۋسين جاستارعا, بالالارعا انا ءتىلىن, حالقىمىزدىڭ ونەرىن جالىقپاي ۇيرەتۋمەن كەلەدى.
«مەكتەپ وقۋشىلارىنا دومبىرا, ءان ۇيرەتەمىن. سول ارقىلى قازاق تىلىنە ىقىلاسى ويانادى. بىراق سوڭعى ۋاقىتتا بالا سانى ازايىپ كەتتى, جاستار سەلودا قالمايدى. وسى سەلودا بۇرىن مەن قازاق بالاسىنىڭ بارلىعىنا دومبىرا ۇستاۋدى ۇيرەتكەن ەدىم, ولار ونى وسكەندە دە ۇمىتپايدى. سوسىن ارالاس-قۇرالاس تۇرىپ جاتقان وزگە ۇلت وكىلدەرىنە قازاق اندەرىن ۇيرەتەمىن» دەيدى ديقان اعاي. ناۋرىز مەرەكەسىندە ساناركا سەلوسىنىڭ تۇرعىندارى –ورىستار, ۋكرايندار, تاتارلار مەن باشقۇرتتار قازاق اندەرىن شىرقادى.
جالپى بيىلعى ناۋرىز مەرەكەلەرىنە وبلىستىڭ 16 اۋدانى مەن قالاسىندا تۇرىپ جاتقان قازاق اعايىندار اتسالىستى.
ءنازيرا جارىمبەت
«ەگەمەن قازاقستان»
چەليابى-ترويتسك-قوستاناي
