تۇركى حالىقتارىنا ورتاق ءتول مەرەكە بيىل وڭىردە استانانىڭ 20 جىلدىعى اياسىندا ءوتىپ, وبلىس ورتالىعى – وسكەمەندەگى اباي الاڭىندا ەلوردانىڭ 20 جىلدىعىنا وراي 20 كيىز ءۇي تىگىلىپ, جۇرتشىلىق «قوش كەلدىڭ, ءاز ناۋرىز» اتتى تەاترلاندىرىلعان كورىنىستەر مەن مەرەكەلىك كونتسەرتتى تاماشالادى. رەسەيدىڭ بارناۋىل قالاسىنان ارنايى كەلگەن سيقىرشىلار الاڭعا جيىلعان حالىققا ەرەكشە كوڭىل-كۇي سىيلادى.
الاڭداعى 20 كيىز ءۇيدىڭ ءبىرىن وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ ۇجىمى تىگىپتى. كيىز ءۇيدىڭ ءىشى دە ۇلتتىق جادىگەرلەرمەن بەزەندىرىلىپتى. ۋنيۆەرسيتەت رەكتورى مۇحتار تولەگەن ءبىلىم ورداسى بيىل ءاز-ناۋرىز مەيرامىنا ەرەكشە ازىرلەنگەندەرىن ايتادى. ء«بىز ناۋرىز مەرەكەسىن 21 ناۋرىز كۇنى ۋنيۆەرسيتەت قابىرعاسىندا كەڭ كولەمدە اتاپ وتتىك. مەرەكەلىك شارا بەس كەزەڭنەن تۇردى. ءبىرىنشى كەزەڭدە ەلىمىزدى مەكەندەيتىن ءارتۇرلى حالىقتاردىڭ ءداستۇرى مەن تاريحىن, ۇلتتىق تاعامدارىن كوپشىلىك نازارىنا ۇسىندىق. ەكىنشى كەزەڭدە حالقىمىزدىڭ تۇساۋ كەسۋ ءراسىمىن كورسەتتىك. وبلىس اكىمىنىڭ ورىنباسارى اسەم ءنۇسىپوۆا كىشكەنە بۇلدىرشىنگە اق جول تىلەپ, تۇساۋىن كەستى. ستۋدەنتتەرىمىز دايىنداعان كونتسەرتتىك باعدارلاما, ولار ورىنداعان ءداستۇرلى اندەر مەن ءارتۇرلى سپورتتىق سايىستار شاراعا جينالعانداردىڭ, كەلگەن قوناقتاردىڭ كوڭىلىنەن شىقتى دەپ ويلايمىن», - دەيدى مۇحتار ادىلبەك ۇلى.
ۇلىستىڭ ۇلى كۇنى مەرەكەسىنە وبلىستىق مەشىتتىڭ شاقىرۋىمەن بارقىتبەلدىڭ باۋرايىنان قولدارىنا بۇركىتتەرىن قوندىرىپ, تاتتىمبەت كاپ ۇلى مەن ەرزات بايقاداموۆ باستاعان سەرى جىگىتتەر دە كەلىپتى. قىران كورمەگەن قالالىقتار قۇس پاتشاسىمەن سۋرەتكە ءتۇسىپ ءبىر قارق بولدى. ء«بىر اللاسى, ءتورت قۇبىلاسى, بەس پارىزى, جەتى قازىناسى بار, ۇلدارى اتتىڭ جالىندا ۇيىقتاپ, كەلىندەرى تۇيەنىڭ قومىندا بوسانعان قازاق ەمەسپىز بە؟ ءبىز وزگە جۇرتتان وزساق, سالت-داستۇرىمىزبەن, ونەرىمىزبەن, ۇلتتىق قۇندىلىقتارىمىزبەن وزامىز. قانداي زامان بولسا دا ادەت-عۇرىپ, جول-جورالعىلارىمىزدى جوعالتۋعا بولمايدى. سوندىقتان قۇسبەگىلىك ونەرىمىزدى ناسيحاتتايىق, جۇرتقا كورسەتەيىك دەپ سوناۋ جەردەن ارنايى كەلدىك. بۇركىتتەردى ۇشىرىپ تا كورسەتەر ەدىك, وعان مىنا جەر قولايسىزداۋ. ايتپەسە, قىراندى قولعا شاقىرىپ, شىرعاعا تۇسىرۋگە بولار ەدى», - دەيدى ۇرجارلىق بۇركىتشى تاتتىمبەت كاپ ۇلى.
وسكەمەندەگى بۇگىنگى جارقىراعان اۋا-رايى دا تۇرعىنداردىڭ كوڭىلىن كوتەرە تۇسكەندەي. بارلىعى دا ريزا كەيىپتە ءبىر-ءبىرىن مەرەكەمەن قۇتتىقتاپ, جىلى لەبىزدەرىن ءبىلدىرىپ جاتىر. «بارشالارڭىزدى ۇلىستىڭ ۇلى كۇنىمەن شىن جۇرەكتەن قۇتتىقتايمىن. جۋاننىڭ جىڭىشكەرىپ, جىڭىشكەنىڭ ۇزىلەتىن شاعى. «توقتى تويماس, ءشومىش كەپپەس» دەيتىن كەز. بۇكىل حالىق جاڭا جىلدىڭ كەلىپ جاتقانىن, شۋاقتى كۇندەر باستالعانىن سەزىنگەندەي. ناۋرىز - ات توبەلىندەي توپتىڭ عانا ەمەس, ەلدىڭ, حالىقتىڭ مەيرامى بولۋى كەرەك. بۇگىن سوعان كۋا بولدىق», - دەيدى وسكەمەندەگى وبلىستىق دراما تەاتردىڭ كوركەمدىك جەتەكشىسى ساحان اكەلەەۆ.
سونىمەن قاتار جىلداعىداي ءداستۇرلى پالاۋ فەستيۆالى ءوتىپ, كوپشىلىككە پالاۋ تەگىن تاراتىلدى. الاڭنىڭ ءبىر شەتىندە اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلىپ, قالالىقتار ازىق-ت ۇلىكتى ارزان باعامەن ساتىپ الدى.
ازامات قاسىم,
«ەگەمەن قازاقستان»
وسكەمەن
