كورمەگە تابيعاتتىڭ كۇن مەن ءتۇن تەڭەلگەن ناۋرىز مەرەكەسىن تويلاۋدىڭ ۇلتتىق داستۇرلەرىن بويىنا جىلۋ تاراي باستاعان تابيعاتتىڭ ەرەكشە شۋاقتى شاعىن بەينەلەيتىن, 50-دەن استام كارتينا مەن ءمۇسىن قويىلعان. بۇلاردىڭ كوپشىلىگى پەيزاجدىڭ قاراپايىم جانرىمەن بەرىلىپتى. ەڭ ءبىر تارتىمدىلىعى ءاربىر كوركەم سۋرەتتەن قازاق مادەنيەتىنىڭ دۇنيەتانىمدىق جانە فيلوسوفيالىق تۇسىنىكتەرىنىڭ شوعىرلانعانىن كورۋگە بولادى.
«سىمباتتى ونەر بولماعان ەلدە ماعىنالى تىرشىلىك جوق. قانداي قاۋىم, قانداي تاپتى الساق تا قانى مەن جانىنىڭ سۋرەتىن ونەر ايناسىنا تۇسىرمەي وتىرا المايدى. ونەردەن قۋات الماسا, تىرشىلىكتىڭ شىراعى وشەدى» دەگەن عۇلاما مۇحتار اۋەزوۆتىڭ ءسوزى ءدال وسى تۇستا كوكەيىڭە ەرىكسىز ورالادى. كورمەدە ۇسىنىلعان تۋىندىلار ۇلتتىق رۋحقا, تابيعاتقا دەگەن سۇيىسپەنشىلىك, باقىتتى بالالىقتىڭ ءتاتتى ەلەستەرىنە وتە باي. كەيبىر سۋرەتشىلەر كوكتەمنىڭ جاقىنداۋىن تۇستەردىڭ بىلىنەر-بىلىنبەس الماسۋىمەن بەرسە, ەندى بىرەۋلەرى كوكتەمگى شاتتىق سەزىمدى بەينەلەگەن.
كورمەگە ەرلان ايتۋاروۆ, ءماجيت بايتەنوۆ, تىلەۋجان باتانوۆ, باقىتنۇر بۋردەسبەكوۆ, ەرلان نازاركۇل سىندى تانىمال سۋرەتشىلەرمەن بىرگە انار اۋباكىر, گۇلمارال تاتىباەۆا, اسەم ابدۋللاەۆا سىندى جاستاردىڭ دا جۇمىستارى قويىلعان.
«بۇل كورمەنىڭ ءبىر ەرەكشەلىگى اعا بۋىن مەن جاستاردىڭ ساباقتاستىعىن كورسەتۋمەن قاتار, بارلىق جانردى قامتۋىندا. ناۋرىزدىڭ كەلۋىنە وراي ۇيىمداستىرىلۋىنىڭ ماڭىزى زور. سوعان وراي مەرەكەلىك كوڭىل-كۇيدى بەينەلەيتىن سۋرەتتەر كوبىرەك قويىلىپتى. بۇل سۋرەتشىلەردى شابىتتاندىرادى», دەيدى قازاقستاننىڭ ەڭبەك سىڭىرگەن قايراتكەرى سۋرەتشى تىلەۋجان باتانوۆ.
شىنىندا مۇندا تەك كوركەم تابيعات, اۋىل تىرلىگىن عانا بەينەلەپ قويماي, قالا كوكتەمىنىڭ دە ەرەكشە اسەرىن مىڭ بوياۋمەن جەتكىزگەن تۋىندىلار جەتەرلىك ەكەن. مىسالى, سەيسەنحان ماحانبەتوۆتىڭ «ارۋ قالا – استانا», «ناتيۋرمورت» جانە وزگە دە كارتينالارى سوعان دالەل. كورمەدەگى مايتالمان سۋرەتشى ەرلان ايتۋاروۆتىڭ «كۇي» كارتيناسى جەتى نوتانى جەتى بوياۋمەن بەينەلەگەن ەرەكشە تۋىندى دەسەك بولاتىنداي.
ۇلاربەك نۇرعالىم ۇلى,
«ەگەمەن قازاقستان»
