مەملەكەت باسشىسى ايتقان ءتورتىنشى الەۋمەتتىك باستامادا كاسىپكەرلىك سالاعا قولداۋ كورسەتۋ, اتاپ ايتقاندا, ميكرونەسيەلەندىرۋدى كەڭەيتۋ ماسەلەسى كوتەرىلدى. ميكرونەسيەلەندىرۋ ءىسىن ءالى دە جەتىلدىرە ءتۇسۋ حالىقتىڭ ءوزىن-ءوزى ەڭبەكپەن قامتىپ وتىرعان بولىگىنىڭ جۇمىس تابۋىنا مۇمكىندىك تۋعىزاتىنى ءسوزسىز. بارلىق دەڭگەيدەگى كاسىپكەرلىك قۇرىلىمدار ەڭبەكپەن قامتۋ ىسىندە جانە حالىقتىڭ تۇرمىس ساپاسىن كوتەرۋگە, سول ارقىلى ەلدەگى الەۋمەتتىك احۋالدى جاقسارتۋعا ىقپال ەتەتىنىن ەسكەرسەك, بۇل وتە ماڭىزدى. ەلىمىزدىڭ ودان ءارى الەۋمەتتىك-ەكونوميكالىق دامۋى وسىعان بايلانىستى.
ءسوز جوق, بۇل ماقساتقا بيزنەس ورتا مەن مەملەكەت ءوزارا تىزە قوسىپ ارەكەت ەتكەندە عانا جەتە الادى. بۇگىنگى تاڭدا مەملەكەت تاراپىنان بيزنەس سالاسىن دامىتۋعا ەرەكشە جاعداي جاسالىپ وتىر. ەندىگى كەزەكتە جەكە كاسىپكەرلىك بارىنشا قانات جايىپ, قارقىندى تۇردە دامۋعا ءتيىس. مەن بارلىق كاسىپكەرلەر مەن ەل ازاماتتارىن ەلباسى كوتەرگەن باستامالاردى جۇزەگە اسىرۋ ءۇشىن ءوزارا تىزە قوسىپ, بەلسەندى تۇردە ارەكەت ەتۋگە شاقىرامىن.
اسەن جاقسىلىقوۆ,
«گورمولزاۆود» جشس ديرەكتورى
