كەزىندە كسرو مەن جاپونيا اراسىندا قىرعي-قاباق سوعىس تۇتانعاندا تاپ وسى انيۆاداعى كورەيلەر قازاقستانعا جەر اۋدارىلعان ەكەن. كەڭەس وكىمەتى ولارعا سەنبەگەن.
– ءبىزدىڭ اتا-بابالارىمىزدى بۇكىل ءسىبىردىڭ ۇستىمەن توزىعى جەتكەن ەشەلونعا تيەپ قازاقستانعا جەتكىزىپتى, – دەيدى وڭتۇستىك قازاقستان وبلىسىنداعى كورەي ەتنومادەني ورتالىعىنىڭ ءتورايىمى سۆەتلانا پاك. – بەيمارال, دايىندىقسىز جۇرگەن جەرىنەن ۇستاپ, قارۋمەن قورقىتىپ ەشەلونعا قاماعان اعايىندارىمىزدىڭ جارتىسى جولدا اشتىق پەن سۋىقتان قىرىلىپ, سۇيەكتەرى شاشىلىپ قالدى. قازاق جەرىنە وسىلاي كەلدىك. اتا-انالارىمىز «سەندەردىڭ ومىرلەرىڭ ءۇشىن قازاق حالقىنا قارىزدارمىز» دەگەندى ءجيى ايتاتىن. جاس بولدىق, ءمانىن كوپ تۇسىنبەپپىز. ءبىز عانا ەمەس قازاقستانعا ايداۋمەن كەلگەن بارلىق ەتنوس وكىلدەرى وسى ازاپتى باستان كەشىردى. باۋىرمال قازاق حالقىنىڭ ارقاسىندا امان قالدىق. قازاقستان – ءبىزدىڭ ورتاق وتانىمىز. سوندىقتان دا جۇرەك قالاۋىمىزبەن قازاقستان حالقى اسسامبلەياسى اتىنان «قازاق حالقىنا مىڭ العىس» مونۋمەنتىن ورناتتىق. بۇل اش-جالاڭاش, ازىپ-توزىپ كەلگەن ءتۇرلى ەتنوسقا قۇشاعىن اشقان, قولىنداعى جارتى نانىن ءبولىپ بەرىپ, ءۇيىنىڭ تورىنەن ورىن بەرگەن قازاق ۇلتىنا قۇرمەتىمىز.
تاپ وسىعان ماعىنالاس پىكىرلەردى قاپ تاۋىنان جەر اۋدارىلعان اعايىندار دا جۇرەكتەرى جىلاپ تۇرىپ ايتادى.
اتاۋلى داتا قارساڭىندا وبلىس اكىمى جانسەيىت تۇيمەباەۆ مەرەكەلىك شارالاردى جاڭا مازمۇندا وتكىزۋگە باستاماشى بولدى. ءىس-شارا 10 كۇندى قامتيدى.
بۇل تۋرالى وقو وڭىرلىك كوممۋنيكاتسيالار قىزمەتىندە وتكەن بريفينگتە وبلىس اكىمى اپپاراتى اسسامبلەيا حاتشىلىعىنىڭ مەڭگەرۋشىسى ءمۇراتالى قالمۇراتوۆ حاباردار ەتتى.
ونىڭ ايتۋىنشا, ون كۇندىك مەرەكەنى جەر-جەرلەردە ۇيىمداستىرۋ مەن وتكىزۋدىڭ تۇجىرىمداماسى ازىرلەنىپ, ءار كۇنگە ارنايى اتاۋلار بەرىلگەن.
الداعى ۋاقىتتا وڭتۇستىك قازاقستان وبلىسىنىڭ تولىققاندى جاڭارعان ەتنوكارتاسى دايىندالىپ, وڭىردەگى اسسامبلەيا قىزمەتى تۋرالى كىتاپ ازىرلەنەتىن بولادى. سونداي-اق بيىل بەس اۋدان, قالا اۋماعىندا «دوستىق» ۇيلەرى اشىلادى. وبلىس باسشىسىنىڭ تاپسىرماسىنا سايكەس, ء«ار ەتنوستىڭ برەندى» جوباسى اياسىندا اسسامبلەيا الاڭىندا تۇراقتى شەبەرلىك دارىستەرى مەن اشىق كورمەلەر ۇيىمداستىرىلماق.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
