ءاسانالى ءاشىموۆ اتىنداعى بۇل تەاتر 2018 جىلدىڭ جەلتوقسان ايىندا الماتى قالالىق مادەنيەت جانە ارحيۆتەر باسقارماسىنا قاراستى «الماتى اۋەندەرى» كمقك قۇرامىندا اشىلعان. كوزى تىرىسىندە شىعارماشىلىق ۇجىمعا تەاتر تارلانى, كسرو حالىق ءارتىسى, ەڭبەك ەرى ءاسانالى ءاشىموۆتىڭ ءوزى جەتەكشىلىك ەتتى. تەاترداعى قازىرگى 53 اكتەردىڭ دەنى وسى كىسىنىڭ شاكىرتتەرى, ءوز تۇلەكتەرى.
قازاقستان سىنشىلار بىرلەستىگى جىل سايىن جۇرگىزىپ وتىراتىن مونيتورينگكە كوز جۇگىرتسەڭىز, «جاڭا عاسىر» تەاترى گاسترولدىك ساپارلارعا شىعۋعا كەلگەندە وتاندىق تەاترلاردىڭ وندىعىنا كىرەتىنىن كورەسىز. مىسالى, وتكەن 2025 جىلدىڭ وزىندە بۇل تەاتر ەلىمىزدىڭ تالدىقورعان, اتىراۋ, اقتاۋ, اقتوبە, ورال, قىزىلوردا, تۇركىستان, شىمكەنت, تاراز جانە استانا قالالارىن «تاعدىر تاقتاسى», «الماتى – ماحابباتىم» قويىلىمدارىمەن گاسترولدىك ىسساپارمەن ارالاپ شىققان.
اقپاننىڭ اياز قارىعان سوڭعى كۇندەرىندە «جاڭا عاسىر» تەاترى «الماتى – ماحابباتىم» اتتى ساعىنىش پەن سىرعا تولى ساحنالىق تۋىندىسىن تارتۋ ەتتى.
رەسپۋبليكا سارايىن ماحاببات پەن البىرت سەزىمدەرگە بولەگەن كونتسەرت-سپەكتاكل قالىڭ كورەرمەنگە كەشەگى كۇندەرىن ورالتىپ, الىپ-ۇشقان جاستىق شاعىنا قايتا جەتەكتەپ اكەلگەندەي اسەر سىيلادى.
رۋحاني كەشكە اينالعان قويىلىمدا شاھاردىڭ اسەم كەلبەتى عانا ەمەس, ءتۇرلى تاعدىر يەلەرىنىڭ ءومىرى, ولاردىڭ ماحابباتى مەن ساعىنىشى ادەمى انمەن ءورىلىپ, ساحنالىق كورىنىستەرمەن استاسىپ جاتتى.
كەش بارىسىندا ەسكى بولسا دا ەستى, جۇرەككە جاقىن اندەر شىرقالىپ, كورەرمەن وتكەن مەن بۇگىننىڭ اراسىنا ساپار شەكتى. ءار ءان – ءبىر تاعدىر, ءاربىر اۋەن – ءبىر عۇمىر ىسپەتتى ءورىلىپ, كاسىبي ونەردىڭ قۇدىرەتىن سەزىندىردى.
بۇل سپەكتاكلدىڭ قۇندىلىعى دا سوندا, ءدال وسى «الماتى – ماحابباتىم» ساحنا ابىزى ءاسانالى ءاشىموۆتىڭ سوڭعى قويىلىمى ەدى. اتالعان كونتسەرت يدەياسى ۇستازدارىمەن بىرگە دۇنيەگە كەلىپ, ءوزى دۇنيەدەن وزعاننان كەيىن ساحنالانعان قويىلىم. سوندىقتان دا وسىناۋ كونتسەرتتىك قويىلىمدى اڭىز اكتەردىڭ سوڭعى دا العاشقى سپەكتاكلى دەپ ايتۋعا بولادى.
كونتسەرتتىك تۋىندىنى كورۋگە اڭىز ءارتىستىڭ جارى باعدات ءاشىموۆا كەلىپ, جۇرەكجاردى لەبىزىن ءبىلدىرىپ, سپەكتاكلدىڭ اسەرلى شىققانىن اتاپ ءوتىپ ءارى ونەر ۇجىمىنا دەگەن رياسىز العىسىن جەتكىزدى. جينالعان جۇرتتى تولقىتقان كەشكە الماتى قالالىق مادەنيەت باسقارماسىنىڭ باسشىسى دانيار ابزاليدەن ۇلى مەن «جايىقتىڭ اق شاعالاسى» اتانعان اقىن اقۇشتاپ باقتىگەرەەۆا, پەسا اۆتورى بەيبىت سارىباي سىندى زيالى قاۋىم وكىلدەرى دە قاتىستى.
«الماتى – ماحابباتىم» تەك كونتسەرتتىك باعدارلاما ەمەس, بۇل – قالاعا دەگەن شىنايى سۇيىسپەنشىلىك, ادام جانىنىڭ نازىك يىرىمدەرىن بەينەلەيتىن ساحنالىق تۋىندى. سپەكتاكل ارقىلى كورەرمەن الماتىنىڭ رۋحىن تەرەڭ سەزىنىپ, ونىڭ كوشەلەرى مەن تاۋلى تابيعاتىنا دەگەن ساعىنىشىن جاڭعىرتتى.
مازمۇنى باي, سەزىمگە تولى كەش ۇلتتىق ونەرىمىزدىڭ بايراعىن كوتەرىپ, كورەرمەن جۇرەگىنەن ورىن العان اسەرلى مادەني وقيعا رەتىندە ەستە قالادى.
الماتى
