ينۆەستيتسيالار, كولىك پەن لوگيستيكا, تسيفرلىق سالا مەن جي, ونەركاسىپ, قۇرىلىس, اۋىل شارۋاشىلىعى, تۋريزم, ءبىلىم بەرۋ جانە تاعى دا باسقا سالالارداعى ءوزارا ءىس-قيمىل ماسەلەلەرىنە نازار اۋدارىلدى.
«بۇگىن ءسىز مەملەكەت باسشىسى قاسىم-جومارت كەمەل ۇلى توقاەۆپەن ناتيجەلى كەلىسسوز جۇرگىزدىڭىز. قازاقستان ۇكىمەتى جوعارى دەڭگەيدە قول جەتكىزىلگەن بارلىق ۋاعدالاستىقتىڭ ورىندالۋىن ەرەكشە باقىلاۋعا الادى. ءبىزدىڭ دەرەكتەرىمىز بويىنشا, 2025 جىلى ءوزارا ساۋدا كولەمى 107,7 ملن دوللاردى قۇراپ, وتكەن جىلمەن سالىستىرعاندا 7,6%-عا ءوستى. بۇل كورسەتكىش ودان دا اۋقىمدى ناتيجەلەرگە قول جەتكىزۋ ءۇشىن وڭتايلى نەگىز بولا الادى. ءبىز ۇزاقمەرزىمدى ىقپالداستىقتى ودان ءارى جالعاستىرۋعا نيەتتىمىز», دەدى و.بەكتەنوۆ.
سەربيا پرەزيدەنتى الەكساندر ۆۋچيچ ەلىمىزبەن ەنەرگەتيكا, قورعانىس ونەركاسىبى, قۇرىلىس, ازاماتتىق اۆياتسيا, جاساندى ينتەللەكت جانە اقپاراتتىق تەحنولوگيالار, سونداي-اق ءبىلىم سياقتى پەرسپەكتيۆالى باعىتتار بويىنشا ارىپتەستىكتى دامىتۋعا ۇمتىلىسىن راستادى.
«قازاقستان پرەزيدەنتى قاسىم-جومارت توقاەۆ ەكەۋمىز سەرىكتەستىك اياسىنداعى بارلىق ۇدەرىستى تىكەلەي قاداعالاپ وتىرامىز. سونداي-اق بۇل ىسكە ءبىزدىڭ ەلدەردىڭ ۇكىمەتتەرى دە بەلسەندى قاتىسىپ وتىرعانىن جاقسى بىلەمىز. بىزگە قازاقستاننىڭ ءبىلىم سالاسىنداعى تاجىريبەسى قىزىقتى. وسىعان بايلانىستى قازاقستاندىق ساراپشىلاردى شەتەلدىك جوعارى وقۋ ورىندارىنىڭ كامپۋستارىن اشۋ, دۋالدى ءبىلىم بەرۋدى دامىتۋ, ستۋدەنتتەردى شەتەلدە وقىتۋ تاجىريبەسىمەن ءبولىسۋ ءۇشىن سەربياعا شاقىرعىمىز كەلەدى», دەدى سەربيا پرەزيدەنتى.
كەزدەسۋ بارىسىندا سەربيامەن تسيفرلىق ترانسفورماتسيا سالاسىنداعى ىنتىماقتاستىقتى كەڭەيتۋ الەۋەتى ۇلكەن ەكەنى اتاپ ءوتىلدى. ەلىمىزدە مەملەكەت باسشىسى جاريالاعان تسيفرلاندىرۋ جانە جاساندى ينتەللەكت جىلى اياسىندا زاماناۋي تسيفرلىق ەكوجۇيە قالىپتاسىپ جاتىر. ورتالىق ازيادا ەكى سۋپەركومپيۋتەر كلاستەرى ىسكە قوسىلدى, «Alem.ai» حالىقارالىق جاساندى ينتەللەكت ورتالىعى قۇرىلدى, «CryptoCity» پيلوتتىق ايماعى, تاعى دا باسقا دا جوبالار جۇزەگە اسىرىلىپ جاتىر.
كولىك ينتەگراتسياسى ماسەلەلەرىن تالقىلاۋ كەزىندە ورتا ءدالىزدى دامىتۋعا جانە ەلىمىزدە جۇرگىزىلىپ جاتقان جاڭا ينفراقۇرىلىمدى سالۋ جۇمىستارىنا, ونىڭ ىشىندە تەمىرجول مەن اۆتوكولىك جەلىلەرى, تەڭىز تەرمينالدارى مەن حالىقارالىق اۆياتسيالىق حابتاردى قۇرۋعا ەرەكشە نازار اۋدارىلدى.
اگروونەركاسىپ سەكتورىنداعى, ونىڭ ىشىندە سەلەكتسيا مەن تۇقىم شارۋاشىلىعى سالاسىنداعى ارىپتەستىكتى تەرەڭدەتۋ پەرسپەكتيۆالارى دا اتاپ ءوتىلدى. ولجاس بەكتەنوۆ وتاندىق وندىرۋشىلەردىڭ جوعارى ساپالى اۋىل شارۋاشىلىعى ونىمدەرىنىڭ كەڭ اسسورتيمەنتىن ەكسپورتتاۋعا, قايتا وڭدەۋ سالاسىنداعى ىنتىماقتاستىققا ءازىر ەكەندىگىن جەتكىزدى.
بەلگرادتا وتەتىن «EXPO 2027» كورمەسىن ەسكەرە وتىرىپ, ەلىمىز سەربيامەن 2017 جىلى استانادا مامانداندىرىلعان كورمەنى وتكىزۋ كەزىندە جيناقتاعان تاجىريبەسىن بولىسۋگە دايىن.
كەزدەسۋ قورىتىندىسىندا پرەمەر-مينيستر ولجاس بەكتەنوۆ پەن سەربيا پرەزيدەنتى الەكساندر ۆۋچيچ بارلىق پەرسپەكتيۆالى باعىتتار بويىنشا ەكىجاقتى ىنتىماقتاستىقتى سەرپىندى دامىتۋ مەن نىعايتۋعا بەيىلدى ەكەنىن ءبىلدىردى.
سونىمەن قاتار الەكساندر ۆۋچيچ ەلىمىزگە رەسمي ساپارى اياسىندا وتاندىق قورعانىس ونەركاسىبىنىڭ, ونىڭ ىشىندە قورعانىس-ونەركاسىپ كەشەنى سالاسىنداعى قازاق-سەرب بىرلەسكەن جوبالارىنىڭ كورمەسىنە, «استانا» حالىقارالىق قارجى ورتالىعىنا (احقو), «Alem.ai» حالىقارالىق جاساندى ينتەللەكت ورتالىعىنا باردى.
احقو-دا ورتالىق جۇمىسىنىڭ نەگىزگى باعىتتارى, ونىڭ ىشىندە ينۆەستيتسيالاردى تارتۋ, مامىلەلەردى ءبىر قۇرىلىمعا كەلتىرۋ, كاپيتال نارىعىن دامىتۋ مەن حالىقارالىق جوبالارعا قولداۋ كورسەتۋ جونىندەگى قۇرالدار كورسەتىلدى. بيزنەستى سەرۆيستىك قولداۋ ينفراقۇرىلىمىنا ەرەكشە نازار اۋدارىلدى. احقو باسقارۋشىسى رەنات بەكتۇروۆ ورتالىق تارتقان ينۆەستيتسيالاردىڭ جيىنتىق كولەمى بۇگىندە 20 ملرد دوللاردان اسقانىن باياندادى.
الەكساندر ۆۋچيچ «Alem.ai» ورتالىعىندا ەلىمىزدىڭ تسيفرلىق سالانى جانە جي-تەحنولوگيالاردى دامىتۋعا باعىتتالعان جۇيەلى تاسىلدەرىمەن تانىستى.
سەربيا پرەزيدەنتىنىڭ نازارىنا وتاندىق ازىرلەمەلەر مەن جاساندى ينتەللەكت-ستارتاپتار ۇسىنىلدى. «Astana Hub»-تا IT-ستارتاپتاردى قولداۋ جۇيەسىنە جانە جەتەكشى الەمدىك كومپانيالارمەن ىنتىماقتاستىقتى دامىتۋعا كوڭىل ءبولىندى. سونداي-اق وندا «BestVision» – ونەركاسىپ پەن تاۋ-كەن وندىرىسىنە ارنالعان ءاى-مونيتورينگى, بەينەساراپتاماسى مەن ترەكينگى بار اقىلدى كاسكا ازىرلەۋشى; «KazDream» – باعدارلامالىق قامتاماسىز ەتۋ, دەرەكتەردى تالداۋ جانە جاساندى ينتەللەكت سالاسىنداعى ستارتاپ; «Documentolog» – ەلەكتروندىق قۇجات اينالىمىن اۆتوماتتاندىرۋعا ارنالعان ۇلتتىق بۇلتتى سەرۆيس سياقتى وتاندىق ستارتاپتار تانىستىرىلدى.
