وسىعان دەيىن ورىس, بۋريات, اۋعان, وسەتين, چەشەن-ينگۋش, بەلارۋس, ۋكراين, تۇركىمەن, قىرىم تاتارلارى مەن جەتىسۋ كازاكتارىنىڭ كورمەلەرى ۇيىمداستىرىلدى. بۇل كورمەلەردىڭ ماقساتى – قالامىزداعى ۇلتتىق مادەني ورتالىقتار ارقىلى ءارتۇرلى ۇلت وكىلدەرىنىڭ تۇرمىس-تىرشىلىگىمەن جەتە تانىستىرۋ. سونىمەن قاتار ۇلتتىق بىرلىك قۇندىلىقتارىنىڭ نەگىزدەرى, قازاق حالقىنىڭ تولەرانتتىعى, قازاقستان حالقى اسسامبلەياسىنىڭ ەتنوسارالىق قاتىناستار سالاسىن رەتتەۋدىڭ قوعامدىق-ساياسي ينستيتۋتى رەتىندەگى قالىپتاسۋى مەن دامۋى كورمەگە باستى تاقىرىپ رەتىندە الىنعان. ءارى مۋزەي قورىنا ءارتۇرلى ۇلت وكىلدەرىنىڭ جادىگەرلەرىن جيناقتاۋ دا كوزدەلىپ وتىر.
بۇل جولى كورمەنىڭ كەزەكتى شاراسى «يلداش» تاتار گۋمانيتارلىق دامۋ ورتالىعىنا ارنالدى.
كورمەنىڭ اشىلۋىنا جينالعان جۇرتشىلىق ەلدىڭ جارقىن كەلەشەگىنە قاتىستى جاقسى لەبىزدەرىن ءبىلدىردى. الماتى قالالىق ءماسليحاتىنىڭ دەپۋتاتى, «يلداش» تاتار گۋمانيتارلىق دامۋ ورتالىعىنىڭ توراعاسى نۋري نيازوۆا, الماتى قالاسى تاتار ەتنومادەني بىرلەستىگىنىڭ توراعاسى تۇرسىنتاي عابيتوۆ ريزاشىلىقتارىن ءبىلدىرىپ, ەلدىڭ ەسەندىگى ءۇشىن العىس ايتتى. سالتاناتتى جيىن ءتۇرلى مادەني شارالارعا, ءان-كۇيگە ۇلاستى.
ايناش ەسالي,
«ەگەمەن قازاقستان»
الماتى
